- ભારતના રક્ષા મંત્રી રાજનાથ સિંહ આજથી 4 દિવસ અમેરિકાના પ્રવાસે
- અમેરિકા અને ભારતે સિક્યોરિટી ઑફ સપ્લાય એરેન્જમેન્ટ પર કર્યો હસ્તાક્ષર
- આ કરાર બન્ને દેશોની રાષ્ટ્રીય સુરક્ષા જરૂરિયાતોને પહોંચી વળવામાં મદદ કરશે
ભારતીય રક્ષા મંત્રી રાજનાથ સિંહ આજથી એટલે કે, 23 ઓગસ્ટથી ચાર દિવસીય અમેરિકાના પ્રવાસે જઈ રહ્યા છે. તેમની આ મુલાકાત ભારત અને અમેરિકા વચ્ચે રક્ષા સહયોગને પ્રોત્સાહન આપવા માટે ખૂબ જ મહત્વપૂર્ણ માનવામાં આવે છે. રક્ષા મંત્રી અમેરિકાના પ્રવાસે છે, ત્યારે ગુરુવારે અમેરિકા અને ભારતે સિક્યોરિટી ઑફ સપ્લાય એરેન્જમેન્ટ (SOSA) પર હસ્તાક્ષર કર્યા છે.
આ કરાર બન્ને દેશોની રાષ્ટ્રીય સુરક્ષામાં મદદ કરશે
આ કરાર અમેરિકાના રક્ષા વિભાગ (DOD) અને ભારત સરકારના રક્ષા મંત્રાલય (MOD) વચ્ચે રક્ષા મંત્રી રાજનાથ સિંહની અમેરિકા પ્રવાસ દરમિયાન 22 ઓગ્સ્ટના રોજ કરવામાં આવ્યો છે. આ કરાર દ્વિપક્ષીય રક્ષા સંબંધોને પ્રોત્સાહન આપતા બન્ને દેશોની રાષ્ટ્રીય સુરક્ષા જરૂરિયાતોને પહોંચી વળવામાં મદદ કરશે.
કરારથી ભારત અને અમેરિકાને ફાયદો
અમેરિકાના ડિફેન્સ ડિપાર્ટમેન્ટે જણાવ્યું હતું કે, આ કરાર સાથે અમેરિકા અને ભારત રાષ્ટ્રીય સુરક્ષાને પ્રોત્સાહન આપતી સેવાઓ માટે એકબીજાને સહાય પૂરી પાડવા માટે સહમત થયા છે. આ કરાર રક્ષા વિભાગને અમેરિકની કંપનીઓ સાથે કરાર કરવાની મંજૂરી આપે છે. આ કરાર હેઠળ બન્ને દેશો જરૂરતના સમયે એકબીજાને મહત્વપૂર્ણ સામાન, ખનિજો અને ટેકનોલોજી પ્રદાન કરી શકે છે.
ભારત પહેલા આ દેશોએ SOSA પર હસ્તાક્ષર કર્યા હતા
ભારત અમેરિકા સાથે SOSA પર હસ્તાક્ષર કરનાર 18મો દેશ છે. આ પહેલા ઓસ્ટ્રેલિયા, કેનેડા, ડેનમાર્ક, એસ્ટોનિયા, ફિનલેન્ડ, ઇઝરાયલ, ઇટાલી, જાપાન, લાતવિયા, લિથુઆનિયા, નેધરલેન્ડ, નોર્વે, કોરિયા, સિંગાપોર, સ્પેન, સ્વીડન અને UKએ અમેરિકા સાથે આ કરાર પર હસ્તાક્ષર કર્યા છે.
સિક્યોરિટી ઑફ સપ્લાય એરેન્જમેન્ટ પર હસ્તાક્ષર
અમેરિકાના ડિફેન્સ ડિપાર્ટમેન્ટના એક નિવેદન અનુસાર અમેરિકા અને ભારત વચ્ચે આ કરાર પર હસ્તાક્ષર કરવા માટે અમેરિકા તરફથી રક્ષા વિભાગના મુખ્ય નાયબ સહાયક સચિવ ડો. વિક રામદાસ અને ભારત તરફથી એડિશનલ સેક્રેટરી અને ડિરેક્ટર જનરલ સમીર કુમાર સિન્હાએ હસ્તાક્ષર કર્યા છે .
રાજનાથ સિંહનો US પ્રવાસ કેમ ખાસ છે?
દેશના વડાપ્રધાન મોદી હાલમાં યુક્રેનના પ્રવાસે છે. આ દરમિયાન ભારતના રક્ષા મંત્રી રાજનાથ સિંહ 4 દિવસના અમેરિકાના પ્રવાસે છે. તેમનો પ્રવાસ 23 ઓગસ્ટથી શરૂ થશે. રાજનાથ સિંહની આ મુલાકાતનો હેતુ ભારત અને અમેરિકા વચ્ચે રક્ષા સહયોગને પ્રોત્સાહન અને મજબૂત કરવાનો છે. તેમજ અમેરિકાની ડિફેન્સ કંપનીઓ સાથે ભાગીદારી મજબૂત કરવાનો છે. આ માટે રાજનાથ સિંહ અમેરિકાના રક્ષા સચિવ લોયડ ઓસ્ટિન સાથે પણ બેઠક કરશે. આ સિવાય તેઓ અમેરિકાના ડિફેન્સ ઈન્ડસ્ટ્રીના મોટા દિગ્ગજો સાથે પણ વાતચીત કરશે. રાજનાથ સિંહની આ મુલાકાતથી ભારતનું ડિફેન્સ વધુ મજબૂત બનશે.
