- લેબનાન સરહદ પર ઈઝરાયેલના હુમલા બાદ હિઝબુલ્લાએ શનિવારે જોરદાર મિસાઈલ હુમલા કર્યા
- લેબનાનમાં શુક્રવારે થયેલા હુમલામાં એક બાળક સહિત ઓછામાં ઓછા 8 લોકો માર્યા ગયા હતા
- હિઝબુલ્લાહના હુમલાથી ઈઝરાયેલના લોકો હચમચી ગયા છે
ઈઝરાયેલ અને લેબનાનના હિઝબુલ્લાહ વચ્ચે યુદ્ધની સ્થિતિ છે. શનિવારે હિઝબુલ્લાએ ઈઝરાયેલ તરફ ઝડપી મિસાઈલ હુમલા કર્યા હતા. આ હુમલામાં ઈઝરાયેલની સરહદની અંદર સ્થિત ઘણા મકાનો ધ્વસ્ત થઈ ગયા હતા. આ હુમલા બાદ IDF એ પોતાના એક્સ એકાઉન્ટ પર વીડિયો શેર કર્યો છે, જેમાં ઘણા ઘરો સળગતા જોઈ શકાય છે. હિઝબુલ્લાહે આ હુમલો શુક્રવારે ઈઝરાયેલના હુમલાના જવાબમાં કર્યો છે.
હિઝબુલ્લાના સ્થાનોને નિશાન બનાવીને કરવામાં આવ્યા હુમલા
શુક્રવારે ઈઝરાયેલે લેબનાન સરહદે અનેક હવાઈ હુમલા કર્યા હતા. હિઝબુલ્લાના સ્થાનોને નિશાન બનાવીને કરવામાં આવેલા હુમલામાં એક બાળક સહિત આઠ લોકો માર્યા ગયા હતા અને ઘણા લોકો ઘાયલ થયા હતા. આ હુમલામાં અનેક મકાનો અને વાહનોને પણ નુકસાન થયું છે. ઈઝરાયેલી સેનાએ આ હુમલામાં હિઝબુલ્લાહના ડ્રોન અને રોકેટ યુનિટના ઓપરેટર મોહમ્મદ મહમૂદ નાઝેમને માર્યો હોવાનો દાવો કર્યો છે. હિઝબુલ્લાએ પણ નાઝેમના મૃત્યુની પુષ્ટિ કરી છે.
હિઝબુલ્લાના જૂથના સભ્યોના થયા મૃત્યુ
આ સાથે હિઝબુલ્લાએ તેના જૂથના અન્ય ચાર સભ્યોની હત્યાની વાત સ્વીકારી છે. મૃતક બાળકોમાંથી એકના કાકા અબ્દુલ્લા મુર્તદાએ હુમલા બાદ કહ્યું કે, અમે શહીદોના દેશમાં રહીએ છીએ. અમે શહીદી આપીએ છીએ. અમે કોઈ દેશ કે તેના હુમલાથી ડરતા નથી. અમારા બાળકો, અમારી મહિલાઓ, અમારા પુત્રો શહીદી માટે તૈયાર છે. અમને આ માનનીય બાળકની શહાદત પર ગર્વ છે, જે જબલ આમેલ (દક્ષિણ લેબનાન)નું પ્રતીક છે.
હિઝબુલ્લાહ અને ઈઝરાયેલ વચ્ચે જોરદાર ગોળીબાર
ઈઝરાયેલે હિઝબુલ્લાહના સ્થાનો પર હુમલો કર્યા પછી, તેને ઈઝરાયેલી સીમામાં રોકેટ છોડ્યા. ઈઝરાયેલની હવાઈ સંરક્ષણ પ્રણાલી દ્વારા મોટાભાગના રોકેટોને હવામાં નષ્ટ કરવામાં આવ્યા હતા. કેટલાક રોકેટ ઈઝરાયલી શહેરોની બહાર ખેતરોમાં પડ્યા હતા. ગયા વર્ષે ઓક્ટોબરમાં ગાઝા પર ઈઝરાયેલના હુમલા બાદથી હિઝબુલ્લાહ અને ઈઝરાયેલ વચ્ચે જોરદાર ગોળીબાર ચાલી રહ્યો છે. આ હુમલાઓમાં લેબનાનમાં 500થી વધુ લોકો માર્યા ગયા છે.
