- અમેરિકાના પોર્ટલેન્ડમાં મોટી દુર્ઘટના
- પોર્ટલેન્ડના પૂર્વીય વિસ્તારમાં વિમાન અથડાયુ ઘર સાથે
- અનેક ઘરોમાં લાગી આગ, 3 ના મોત
અમેરિકાના પોર્ટલેન્ડમાં એક મોટો અકસ્માત થયો છે. અહીં પોર્ટલેન્ડના પૂર્વ વિસ્તારમાં શનિવારે સવારે એક નાનું પ્લેન કેટલાક ઘર સાથે અથડાયું હતું. વિમાનની ટક્કરને કારણે અનેક ઘરોમાં આગ પણ લાગી હતી. આ અકસ્માતમાં ત્રણ લોકોના મોત થયા છે. આ અંગે માહિતી આપતા અધિકારીઓએ જણાવ્યું કે વિમાનમાં બે લોકો સવાર હતા અને ઓછામાં ઓછો એક રહેવાસી ગુમ છે. આ ઘટના બાદ એક વીડિયો પણ સામે આવ્યો છે. જેમાં ઘરમાં આગ લાગી અને ધુમાડો પણ નીકળતા જોવા મળી રહ્યો છે.
4 ઘરોમાં લાગી આગ
ગ્રેશમ ફાયર ચીફ સ્કોટ લેવિસે જણાવ્યું હતું કે આગ ઓછામાં ઓછા ચાર ઘરોમાં ફેલાઈ હતી અને છ પરિવારો જગ્યા છોડી દીધી હતી. તેમણે કહ્યું કે ઘટનાસ્થળે બે લોકોની સારવાર કરવામાં આવી હતી, પરંતુ તેઓ કેવી રીતે ઘાયલ થયા હતા અથવા તેમની ઈજાની ગંભીરતા વિશે તેમણે જણાવ્યું ન હતું. ફેડરલ એવિએશન એડમિનિસ્ટ્રેશને પ્લેનની ઓળખ ટ્વીન એન્જિન સેસ્ના 421C તરીકે કરી હતી. તેમણે કહ્યું કે પ્લેન પોર્ટલેન્ડથી લગભગ 30 મિનિટ પૂર્વમાં ટ્રાઉટડેલ એરપોર્ટ નજીક સવારે 10:30 વાગ્યે ક્રેશ થયું હતું.
પ્લેન થઇ ગયુ ક્રેશ
મુલ્ટનોમા કાઉન્ટી શેરિફ ઓફિસના જણાવ્યા અનુસાર પ્લેન નીચે પડતાં એક પોલ અને પાવર લાઈનો તૂટી ગઈ હતી. જેના કારણે નજીકના ખેતરમાં આગ લાગી હતી. ફેરવ્યુ શહેરના રહેણાંક વિસ્તારમાં મકાનો સાથે અથડાયા બાદ વિમાનના ટુકડા થઈ ગયા હતા. આ વિસ્તારમાં લગભગ 10,000 લોકો રહે છે. લેવિસે જણાવ્યું હતું કે આગ વિશેનો પ્રથમ કોલ ટ્રાઉટડેલ એરપોર્ટ કંટ્રોલ ટાવર સ્ટાફ દ્વારા કરવામાં આવ્યો હતો. ધુમાડાના ગોટેગોટા ઉછળતા જોયા હતા, પરંતુ પ્રારંભિક અહેવાલોથી જાણકારી મળી કે વિમાન દુર્ઘટનાગ્રસ્ત થતા પહેલા આકસ્મિક સ્થિતિને લઇને કોઇ કોલ આવ્યો નથી. રાષ્ટ્રીય પરિવહન સુરક્ષા બોર્ડ દુર્ઘટનાની તપાસ કરી રહ્યુ છે.
