એસ્ટરોઇડ ઘણીવાર પૃથ્વીની નજીકથી પસાર થાય છે, પરંતુ તેમાંથી બહુ ઓછા પૃથ્વીના વાતાવરણમાં પ્રવેશ કરે છે. બુધવારે આવી જ દુર્લભ ઘટના બની જ્યારે 2014 RW1 નામનો એસ્ટરોઇડ પૃથ્વીના વાતાવરણમાં પ્રવેશ્યો. US સ્પેસ એજન્સી નાસાએ જણાવ્યું હતું કે, અંદાજે 1 મીટર વ્યાસ ધરાવતો આ એસ્ટરોઇડ ભારતીય સમય અનુસાર બુધવારે રાત્રે 10:09 કલાકે ફિલિપાઇન્સના લુઝોન આઇલેન્ડ પર પૃથ્વીના વાતાવરણમાં પ્રવેશ્યા બાદ બળીને ખાખ થઇ ગયો હતો.
એસ્ટરોઇડ પૃથ્વીના વાતાવરણમાં પ્રવેશ્યો
બુધવારે સવારે કેટાલિના સ્કાય સર્વે દ્વારા આ એસ્ટરોઇડની પ્રથમ શોધ કરવામાં આવી હતી. વૈજ્ઞાનિકોના મતે સળગતા પહેલા તે ફિલિપાઈન્સના ઉત્તરીય ટાપુની ઉપર આકાશમાં 63,360 કિલોમીટર પ્રતિ કલાકની આશ્ચર્યજનક ઝડપે ચમકી રહ્યો હતો. ખગોળશાસ્ત્રીઓનો અંદાજ છે કે આ કદના એસ્ટરોઇડ લગભગ દર બે અઠવાડિયે પૃથ્વી પર પડે છે. જોકે, સ્પેસ એજન્સીનું કહેવું છે કે, તેઓ વાતાવરણમાં પ્રવેશતા પહેલા ક્યારેય જોવા મળે તે દુર્લભ છે. નાસાએ પહેલા જ કહ્યું હતું કે, એસ્ટરોઇડની પૃથ્વીના વાતાવરણ પર કોઈ હાનિકારક અસર નહીં પડે અને તે ઉત્તરી ફિલિપાઈન્સના પૂર્વ કિનારે આગના ગોળામાં ફેરવાઈ જશે.
ટાયફૂનને કારણે નજારો અસ્પષ્ટ થયો
નિરીક્ષકોએ એસ્ટરોઇડ વિખેરાઈ જતાં અદભૂત અગનગોળા જોવાની અપેક્ષા રાખી હતી, પરંતુ ઉત્તર ફિલિપાઈન્સને પ્રભાવિત કરી રહેલ ટાયફૂન યાગીએ આમાં અવરોધ ઉભો કર્યો હતો. ટાયફૂન તૂફાન 3 શ્રેણીમાં બદલી ગયો હતો. તેણે ઉત્તરી ફિલિપાઈન્સના આકાશને વાદળોથી ઢાંકી દીધું હતું, જેના કારણે આ દ્રશ્ય આંશિક રીતે અસ્પષ્ટ થઈ ગયું હતું.
પૃથ્વી પર કોઈ ખતરો નહોતો
વૈજ્ઞાનિકોએ કહ્યું કે, એસ્ટરોઇડના નાના કદના કારણે તે કોઈ ખાસ ખતરો નથી. જો કે, આ ઘટનાએ વૈજ્ઞાનિક સંશોધન માટે મહત્વપૂર્ણ ડેટા પ્રદાન કર્યા છે. આનાથી પૃથ્વીની નજીકના નાના પદાર્થોને ઓળખવા માટે વર્તમાન ટ્રેકિંગ સિસ્ટમ્સની ક્ષમતા દર્શાવવામાં આવી છે. અધિકારીઓએ લુઝોન અને આસપાસના વિસ્તારોના રહેવાસીઓને સતર્ક રહેવાની સલાહ આપી હતી, પરંતુ ઘટના બાદ કોઈ નોંધપાત્ર કાટમાળ કે નુકસાનની જાણ થઈ નથી.
