લેબનોનના ઘણા વિસ્તારોમાં ઈઝરાયલના હવાઈ હુમલા ચાલુ છે. ઈઝરાયલની સેનાએ હિઝબુલ્લાહના સેંકડો ઠેકાણાઓને નિશાન બનાવવાનો દાવો કર્યો છે, જ્યારે લેબનીઝ આરોગ્ય મંત્રાલયનું કહેવું છે કે, સામાન્ય લેબનીઝ નાગરિકો ઈઝરાયલના હુમલામાં મોત થયા છે. ઈઝરાયેલ ડિફેન્સ ફોર્સ એટલે કે IDFએ લેબનોન પર હુમલાને લઈને મોટો દાવો કર્યો છે. IDFએ કહ્યું છે કે, હિઝબુલ્લાહ 7 ઓક્ટોબરની જેમ ઈઝરાયલ પર હુમલાની યોજના બનાવી રહ્યો હતો.
‘7 ઓક્ટોબર જેવા હુમલાની યોજના બનાવી રહ્યો હતો હિઝબુલ્લાહ’
મિડિલ ઈસ્ટમાં ચાલી રહેલા સંઘર્ષ વચ્ચે ઈઝરાયલે મોટો દાવો કર્યો છે. ઈઝરાયલ ડિફેન્સ ફોર્સનું કહેવું છે કે, જે રીતે હમાસે ઈઝરાયલમાં ઘૂસણખોરી કરી હતી અને ગયા વર્ષે 7 ઓક્ટોબરે હુમલો કર્યો હતો તે જ રીતે આ વખતે હિઝબુલ્લાના લડવૈયાઓ ઉત્તરી ઈઝરાયલમાં ઘૂસણખોરી કરવાની યોજના બનાવી રહ્યા હતા. ઈઝરાયલનો દાવો છે કે, તેને હિઝબુલ્લાહના પ્લાનિંગ વિશે સમયસર ખબર પડી ગઈ હતી અને તેને નિષ્ફળ બનાવવા માટે ઈઝરાયલની સેનાએ લેબનોનમાં હિઝબુલ્લાહના ઠેકાણાઓ પર હુમલો કર્યો હતો.
હિઝબુલ્લાહે યોજના અંગે ગુપ્ત બેઠક કરી હતી!
IDFના પ્રવક્તા રિયર એડમિરલ ડેનિયલ હગારીએ કહ્યું છે કે, હિઝબુલ્લાહ ઈઝરાયલ પર મોટા હુમલાની યોજના બનાવી રહ્યો હતો, પરંતુ ઈઝરાયલની સેનાએ તેને નિષ્ફળ બનાવી દીધી છે. હગારીએ કહ્યું છે કે, હિઝબુલ્લાહના નિશાન પર ઉત્તરી ઈઝરાયલના ગેલીલી વિસ્તારના લોકો હતા. તેણે કહ્યું કે, હિઝબુલ્લાહ લડવૈયાઓ ઈઝરાયલમાં ઘૂસીને લોકોની હત્યા કરવા અને બંધક બનાવવાનું કાવતરું ઘડી રહ્યા હતા. જેમ કે ગયા વર્ષે 7 ઓક્ટોબરે હમાસ લડવૈયાઓએ કર્યું હતું. હગારીએ કહ્યું છે કે, આને અંજામ આપવા માટે હિઝબુલ્લાએ એક ગુપ્ત બેઠક પણ કરી હતી અને આ ષડયંત્રને અંજામ આપવાની જવાબદારી રદવાન ફોર્સને સોંપવામાં આવી હતી.
ષડયંત્ર નિષ્ફળ, માસ્ટરમાઇન્ડ માર્યો ગયો
IDFના પ્રવક્તાએ કહ્યું છે કે, આ ષડયંત્રનો માસ્ટરમાઈન્ડ હિઝબુલ્લાહ કમાન્ડર ઈબ્રાહિમ અકીલ હતો. ઇબ્રાહિમ અકીલ 20 સપ્ટેમ્બરના રોજ બેરૂતમાં ઈઝરાયલના હવાઈ હુમલામાં માર્યો ગયો હતો, તે હિઝબુલ્લાહની લશ્કરી પાંખના ટોચના કમાન્ડરોમાંનો એક હતો. અકીલ પર યુએસ દ્વારા એપ્રિલ 1983માં બેરૂતમાં યુએસ એમ્બેસીમાં થયેલા ટ્રક બોમ્બ વિસ્ફોટમાં ભૂમિકા ભજવવાનો આરોપ મૂકવામાં આવ્યો હતો, જેમાં 63 લોકો માર્યા ગયા હતા.
ઈઝરાયલ અને હિઝબુલ્લા વચ્ચે સંઘર્ષ
ઈઝરાયલ અને હિઝબુલ્લાહ બન્નેએ જાહેરાત કરી છે કે તેઓ હવે ‘સંપૂર્ણ યુદ્ધ’ કરી રહ્યા છે. એક તરફ ઈઝરાયલ લેબનોનની રાજધાની બેરૂત સહિત અનેક વિસ્તારોમાં હવાઈ હુમલા કરી રહ્યું છે, તો બીજી તરફ હિઝબુલ્લાએ બેલેસ્ટિક મિસાઈલ વડે તેલ અવીવને નિશાન બનાવવાનો પ્રયાસ કર્યો છે. જો કે, ઈઝરાયલની સેનાનું કહેવું છે કે, તેણે ડેવિડ સ્લિંગ ડિફેન્સ સિસ્ટમ દ્વારા હિઝબુલ્લાહના રોકેટને હવામાં તોડી પાડ્યું છે. હિઝબુલ્લાહના જણાવ્યા અનુસાર તેણે પેજર અને વોકી-ટોકી વિસ્ફોટોનો બદલો લેવા માટે તેલ અવીવમાં મિસાઇલ છોડી હતી.
