ઇઝરાયેલી વાયુ સેનાએ ગુરુવારે ખુલાસો કર્યો હતો કે, તેણે સીરિયામાં એક સર્જિકલ સ્ટ્રાઇક કરી હતી. ઇઝરાયેલી વાયુ સેનાએ જણાવ્યું કે તે તેના સૌથી મુશ્કેલ અને જાંબાજ મિશનમાંનું એક ઓપરેશન હતું, જેનું કોડનેમ ઓપરેશન મેની વેઝ હતું. જેમાં સ્પેશિયલ ફોર્સના 120 કમાન્ડોએ સીરિયામાં ઘૂસીને ઈરાન ફંડેડ અંડરગ્રાઉન્ડ મિસાઇલ ફેક્ટરી નષ્ટ કરી નાખી હતી.
ઇઝરાયેલે જણાવ્યું કે આ ગુપ્ત અને મહત્ત્વપૂર્ણ ઓપરેશન ગઈ આઠ સપ્ટેમ્બરે કરવામાં આવ્યું હતું.મીડિયા રિપોર્ટ્સ અનુસાર, ઈરાનની આ મિસાઇલ ફેક્ટરીમાં બનેલી મિસાઇલોનો ઉપયોગ હિઝબુલ્લાહ અને સીરિયાની અસદ સરકાર દ્વારા કરવામાં આવતો હતો. જે ફેક્ટરી પર હુમલો કરવામાં આવ્યો તે સાયન્ટિફિક સ્ટડીઝ એન્ડ રિસર્ચ સેન્ટરના નામથી અને ડીપ લેયરના નામે ઓળખાતી હતી; જે સીરિયામાં રાજધાની અલેપ્પોની નજીક આવેલી પહાડી પર સ્થિત હતી.
આ ફેક્ટરી ઇઝરાયેલી સીમાથી સીરિયામાં લગભગ 200 કિમી દૂર હતી. હિઝબુલ્લાહને હથિયારોની સપ્લાય માટે આ ફેક્ટરી ઘણી મહત્ત્વની હતી. આ ઓપરેશનમાં ઇઝરાયેલના એક પણ સૈનિકનું મૃત્યુ નહોતું થયું. હવે, અસદ સરકાર સીરિયાની સત્તામાંથી બહાર થયા બાદ આ ઓપરેશનની માહિતી જાહેર થઈ છે.
ફેક્ટરીની ક્ષમતા 100થી 300 મિસાઇલ બનાવવાની હતી
ઇઝરાયેલી સેના 2017થી જ ઈરાનની આ મિસાઇલ ફેક્ટરી વિશેની માહિતી ધરાવતી હતી. ભૂમિગત હોવાના કારણે ઇઝરાયેલ અહીં હવાઈ હુમલો નહોતું કરી શકતું. આ ફેક્ટરીમાં રોકેટ મિસાઇલનાં એન્જિન બનાવાતાં હતાં. ફેક્ટરીની ક્ષમતા વાર્ષિક 100-300 મિસાઇલ બનાવવાની હતી. જે સ્થળે આ ફેક્ટરી હતી તે લેબનનની નજીકનું સ્થળ હતું. સીરિયાની ફેક્ટરીમાં મિસાઇલ બનાવીને તેને લેબનનમાં હિઝબુલ્લાહને મોકલી દેવાતી હતી.
જમીનમાં 100 ફૂટ નીચે ફેક્ટરી હતી
સીરિયાના જમરાયામાં સાયન્ટિફિક સ્ટડીઝ એન્ડ રિસર્ચ સેન્ટરમાં જમીનની ઉપર રોકેટ એન્જિન નિર્માણ સ્થળ પર ઇઝરાયેલી હુમલા બાદ ઈરાનની આ મિસાઇલ ફેક્ટરીનું નિર્માણ 2017માં શરૂ થયું હતું. આ હુમલાના કારણે ઈરાને પોતાની મિસાઇલ ઉત્પાદન ક્ષમતાઓને ભવિષ્યના હવાઈ હુમલાથી સુરક્ષિત રાખવાના હેતુથી પોતાનાં ઓપરેશન ભૂગર્ભમાં કરવા પડયાં.
