અમદાવાદના નરેન્દ્ર મોદી ક્રિકેટ સ્ટેડિયમમાં મિચેલ માર્શનું બેટ જોરથી ગર્જયું. લખનૌ સુપર જાયન્ટ્સના આ બેટ્સમેને ગુજરાત ટાઈટન્સ સામે વિસ્ફોટક બેટિંગ કરીને શાનદાર સદી ફટકારી.
મિચેલ માર્શ શરૂઆતથી જ ખૂબ જ લયમાં જોવા મળ્યો અને તેને ટેબલ ટોપર ટીમના બોલરોને મુશ્કેલીમાં મુક્યા હતા. ગુજરાતનો દરેક બોલર મિચેલ માર્શ સામે લાચાર જોવા મળ્યા અને તેને રાશિદ ખાનની માત્ર એક ઓવરમાં 25 રન બનાવ્યા. આ મિચેલ માર્શની આઈપીએલમાં પહેલી સદી છે.
મિચેલ માર્શે મચાવી ધૂમ
ટોસ હારીને પહેલા બેટિંગ કરવાનો નિર્ણય લીધા બાદ, લખનૌ સુપર જાયન્ટ્સની ઓપનિંગ જોડીએ મિચેલ માર્શ અને એડન માર્કરામે ધમાકેદાર શરુઆત કરી. મિચેલ માર્શ અને માર્કરામે પ્રથમ વિકેટ માટે 9.5 ઓવરમાં 91 રન બનાવ્યા. માર્શે વધુ આક્રમક અભિગમ સાથે બેટિંગ કરી અને માત્ર 23 બોલમાં પોતાની અડધી સદી પૂરી કરી.
માર્કરામ 36 રન બનાવીને આઉટ થયા બાદ માર્શને નિકોલસ પૂરનનો સારો સાથ મળ્યો. પોતાની અડધી સદી પૂર્ણ કર્યા પછી, મિચેલ માર્શે પોતાની જબરદસ્ત બેટિંગ ચાલુ રાખી અને 56 બોલમાં પોતાની સદી પૂર્ણ કરી. માર્શે સદી પૂરી કરતા 10 ચોગ્ગા અને 6 છગ્ગા ફટકાર્યા.
રાશિદની ઓવરમાં 25 રન ફટકારાયા
ઈનિંગની 12મી ઓવરમાં, મિચેલ માર્શે ખાસ કરીને રાશિદ ખાનને નિશાન બનાવ્યો. રાશિદની પહેલી જ ઓવરમાં માર્શે ચોગ્ગા અને છગ્ગાનો વરસાદ કર્યો. મિચેલ માર્શ એક શક્તિશાળી છગ્ગાથી ઓવરની શરૂઆત કરે છે. આ પછી, લખનૌના બેટ્સમેને બીજા બોલ પર જોરદાર ચોગ્ગો ફટકાર્યો. માર્શે ફરીથી ત્રીજો બોલ ભીડમાં મોકલવામાં સફળ રહ્યો, જ્યારે ચોથા બોલે તેના બેટે ચોગ્ગો ફટકાર્યો. માર્શે પાંચમા બોલ પર બીજો ચોગ્ગો ફટકાર્યો અને ઓવરમાંથી કુલ 25 રન બનાવ્યા. માર્શે ગુજરાતના બાકીના બોલરોને પણ મુશ્કેલીમાં મુક્યા, મેદાનના ખૂણે ખૂણે કેટલાક શાનદાર શોટ ફટકાર્યા.
