અમેરિકાએ ઈરાન વિરુદ્ધ તેનું સૌથી ઝડપી અને સૌથી ખતરનાક લશ્કરી ઓપરેશન ‘ઓપરેશન મિડનાઈટ હેમર’ સફળતાપૂર્વક પાર પાડ્યું હતુ. આ ઓપરેશનમાં, ઈરાનના ત્રણ મહત્વપૂર્ણ પરમાણુ ઠેકાણાઓને માત્ર 25 મિનિટમાં ધ્વસ્ત કરવામાં આવ્યા હતા. યુએસ વાયુસેનાએ ઈરાનમાં ફોર્ડો, નાતાન્ઝ અને ઇસ્ફહાનમાં સ્થિત ત્રણ પરમાણુ ઠેકાણાઓ પર હવાઈ હુમલા કર્યા છે. આ હુમલાઓ 7 સ્ટીલ્થ બી-2 બોમ્બર દ્વારા કરવામાં આવ્યા હતા. જેમાં 12 મોટા બોમ્બ ફેંકવામાં આવ્યા હતા. આ ગુપ્ત લશ્કરી મિશનમાં 125થી વધુ વિમાનો સામેલ હતા અને એક ખાસ વ્યૂહરચના પણ અપનાવવામાં આવી હતી.
અમેરિકન જનરલે શું કહ્યું?
વ્હાઇટ હાઉસ ખાતે જોઈન્ટ ચીફ્સ ઓફ સ્ટાફના અધ્યક્ષ જનરલ ડેન કેને કહ્યું કે આ ઓપરેશનમાં 7 સ્ટીલ્થ બી-2 બોમ્બરોએ ભાગ લીધો હતો. આ બોમ્બરોએ ઈરાનના ફોર્ડો અને નાતાન્ઝ પરમાણુ સ્થળો પર 30 હજાર પાઉન્ડ વજનના બંકર બસ્ટર બોમ્બ ફેંક્યા હતા. જ્યારે ઇસ્ફહાન પર ટોમાહોક ક્રુઝ મિસાઇલોથી હુમલો કરવામાં આવ્યો હતો.
મિશનની શરૂઆત અને માર્ગ
અમેરિકન બી-2 સ્ટીલ્થ બોમ્બરોએ મિઝોરીના એરબેઝ પરથી ઉડાન ભરી હતી. આ 18 કલાક લાંબા મિશનને શાંતપૂર્વક હાથ ધરવામાં આવ્યો હતો. જનરલ ડેન કેને જણાવ્યું હતું કે સાત બી-2 બોમ્બરમાં દરેકમાં 2 ક્રૂ હતા અને સમગ્ર મિશન સંદેશાવ્યવહાર ઓછો રાખીને હાથ ધરવામાં આવ્યું હતું જેથી દુશ્મનને કોઈ સંકેત ન મળે. ભારતીય સમય મુજબ રવિવારે સવારે 4:10 વાગ્યે અમેરિકન હુમલો શરૂ કર્યો હતો. આ બી-2 બોમ્બરોએ પહેલા ફોર્ડો પરમાણુ સ્થળ પર બે મોટા બંકર બસ્ટર બોમ્બ ફેંક્યા. આ પછી તરત જ, અન્ય બી-2 બોમ્બરોએ નાતાન્ઝ અને એસ્ફહાન પર હુમલો કર્યો. રવિવારે સવારે 4:35 વાગ્યા સુધીમાં બધા અમેરિકન વિમાનો ઈરાની હવાઈ ક્ષેત્ર છોડી ગયા હતા.
‘ડિકોય’ વ્યૂહરચના અપનાવાઇ
જનરલ કેનના મતે, ઈરાનને મૂંઝવણમાં રાખવા માટે કેટલાક બોમ્બર વિમાનોને ઇરાદાપૂર્વક પેસિફિક મહાસાગર તરફ મોકલવામાં આવ્યા હતા. આને ડિકોય મિશન કહેવામાં આવતું હતું અને ફક્ત થોડા વરિષ્ઠ અધિકારીઓ જ તેનાથી વાકેફ હતા. આ હુમલો યુએસ પ્રમુખ ડોનાલ્ડ ટ્રમ્પના નિવેદન પછી થયો છે. જેમાં તેમણે કહ્યું હતું કે તેઓ આગામી બે અઠવાડિયામાં નક્કી કરશે કે ઈરાન પરના હુમલામાં યુનાઇટેડ સ્ટેટ્સ ઇઝરાયલને ટેકો આપશે કે નહીં. પરંતુ માત્ર બે દિવસ પછી, તેમણે વ્હાઇટ હાઉસના સિચ્યુએશન રૂમમાંથી મિશનનું નિરીક્ષણ કરતી વખતે હુમલાઓનો આદેશ આપ્યો.
