એક પિતાએ પોતાના પુત્ર હરીશ માટે સુપ્રીમ કોર્ટમાં ઈચ્છામૃત્યુની માંગણી કરી છે. આ કેસ ગાઝિયાબાદનો છે, જ્યાં 32 વર્ષીય વ્યક્તિ ક્વાડ્રિપ્લેજિયાથી પીડાતા 13 વર્ષથી પથારીવશ છે. હરીશ AIIMSમાં સારવાર લઈ રહ્યો છે, અને ડોકટરો કહે છે કે તેની રિકવરી લગભગ અશક્ય છે. તેથી, હરીશના પિતાએ સુપ્રીમ કોર્ટમાં તેમના પુત્રને ઈચ્છામૃત્યુ આપવા માટે અપીલ કરી છે. કોર્ટે હરીશને આત્મહત્યા કરવાની પરવાનગી આપતા પહેલા આ મામલાની સુનાવણી 13 જાન્યુઆરીએ મુલતવી રાખી છે. આ કેસની સુનાવણી જસ્ટિસ જે.બી.પારડીવાલાની અધ્યક્ષતાવાળી બેન્ચ દ્વારા કરવામાં આવી રહી છે.
ક્યારે મળે છે ઈચ્છામૃત્યુની મંજૂરી?
ભારતમાં, ઈચ્છામૃત્યુ ફક્ત એવી વ્યક્તિને જ માન્ય છે જે કોઈ અસાધ્ય રોગથી પીડાઈ રહી હોય અને ડોકટરો માટે તેને બચાવવું અશક્ય હોય, અથવા તે બીમારી દરમિયાન ભારે પીડા અને વેદના સહન કરી રહી હોય. ઈચ્છામૃત્યુ અથવા પેસિવ યૂથનેશિયાની વિનંતી કરવા માટે, જે વ્યક્તિને ઈચ્છામૃત્યુની મંજૂરી જોઈએ છે તેને પોતાની બીમારી અને સ્થિતિની સંપૂર્ણ સમજ હોવી જોઈએ અને તે માનસિક રીતે સભાન હોવો જોઈએ. આ સાથે પરિવારની સંમતિ પણ જરૂરી છે. આનો અર્થ એ છે કે પરિવારના સભ્યો આ નિર્ણયથી વાકેફ હોવા જોઈએ અને તેને ટેકો આપવો જોઈએ, અથવા ઓછામાં ઓછું તેનો વિરોધ ન કરવો જોઈએ.
ભારતમાં ઈચ્છામૃત્યુને લઈ શું છે કાયદો?
ભારતમાં, પેસિવ યૂથનેશિયામાં વ્યક્તિમાંથી લાઈફ સપોર્ટ સિસ્ટમ દૂર કરવામાં આવે છે, જેનાથી જે તે વ્યક્તિનું કુદરતી રીતે મૃત્યુ થાય છે. જો કોઈ વ્યક્તિ ઈચ્છામૃત્યુ માંગે છે, તો તેની પાસે લિવિંગ વીલ હોવું જરૂરી છે. ત્યારબાદ એક મેડિકલ બોર્ડ દર્દીની સ્થિતિ અને લિવિંગ વીલની તપાસ કરે છે. મંજૂરી મળ્યા પછી, કેસ હાઇકોર્ટમાં જાય છે, જ્યાં કોર્ટ અંતિમ આદેશ જારી કરે છે.
ભારતમાં પેસિવ યૂથનેશિયા ફક્ત અસાધ્ય અથવા અંતિમ તબક્કાની બીમારીના કિસ્સાઓમાં જ માન્ય છે, જેમ કે એડવાન્સ્ડ કેન્સર, કાયમી કોમા, ગંભીર ન્યુરોલોજીકલ ડિસઓર્ડર અથવા બ્રેન ડેડ. જ્યારે ડોકટરોના મતે દર્દીના સ્વસ્થ થવાની કોઈ શક્યતા નથી અને કોર્ટ પાસેથી મંજૂરી મળે તો તે વ્યક્તિ ઈચ્છામૃત્યુ અપનાવી શકે છે.
આ પણ વાંચો: Live News ગમે ત્યાં ગમે ત્યારે, દરેક OTT પ્લેટફોર્મ્સ પર જોવા મળે છે સંદેશ ન્યૂઝ…
