વિરપુરમાં લોખંડના બેરલમાં છુપાવાયેલો વિદેશી શરાબનો મોટો જથ્થો ઝડપાયો
રૂરલ એલસીબીની કાર્યવાહીથી રૂ.9 લાખથી વધુ કિંમતની 3804 બોટલ કબ્જે, મુખ્ય આરોપી ફરાર
અગ્ર ગુજરાત, રાજકોટ
રાજકોટ જિલ્લાના વિરપુર વિસ્તારમાં ગેરકાયદેસર રીતે સંગ્રહિત વિદેશી દારૂ સામે રૂરલ એલસીબીની ટીમે મોટી કાર્યવાહી કરી છે. લોખંડના બેરલમાં છુપાવી રાખવામાં આવેલ વિદેશી શરાબનો મોટો જથ્થો પકડી પાડતા વિસ્તારમાં ખળભળાટ મચી ગયો છે. એલસીબી પોલીસે કુલ રૂ.9 લાખથી વધુ કિંમતનો દારૂ કબ્જે કરી કાયદેસરની કાર્યવાહી હાથ ધરી છે, જ્યારે દારૂનો જથ્થો રાખનાર અતુલ સખીયા ફરાર થઈ જતાં તેની શોધખોળ શરૂ કરવામાં આવી છે.
વિરપુર
પોલીસ પાસેથી મળેલી માહિતી મુજબ, રાજકોટ રેન્જના આઈજી અશોકકુમાર યાદવ અને જિલ્લા એસપી વિજયસિંહ ગુર્જર દ્વારા વિદેશી દારૂના કેશ શોધી કાઢવા ખાસ સૂચનાઓ આપવામાં આવી હતી. આ સૂચનાઓના પગલે રૂરલ એલસીબીના અધિકારીઓએ પેટ્રોલિંગ અને બાતમીના આધારે કાર્યવાહી શરૂ કરી હતી.
એલસીબી પીએસઆઈ એચ.સી. ગોહીલ અને આર.વી. ભીમાણીની આગેવાની હેઠળ અલગ અલગ ટીમો પેટ્રોલિંગમાં હતી. દરમિયાન મળેલી ચોક્કસ બાતમીના આધારે વિરપુરમાં રહેતા અતુલ મનજી સખીયાએ પોતાના ભાઈના કબ્જાના રહેણાંક મકાન પાછળ આવેલા વાડામાં વિદેશી દારૂનો મોટો જથ્થો ઉતાર્યો હોવાનું જાણવા મળ્યું હતું. બાતમીને આધારે ટીમે તાત્કાલિક દરોડો પાડી સ્થળની તપાસ હાથ ધરી હતી.
રૂરલ એલસીબી
દરોડા દરમિયાન એલસીબી ટીમને આરોપીના મકાન પાછળ આવેલા વાડામાં લોખંડના અનેક બેરલ નજરે પડ્યા હતા. બેરલ તોડી તપાસ કરતાં અંદરથી અલગ અલગ બ્રાન્ડની વિદેશી દારૂની બોટલો મળી આવી હતી. પોલીસે કુલ 14 લોખંડના બેરલમાંથી 3804 બોટલ વિદેશી દારૂ કબ્જે કરી હતી, જેની અંદાજિત કિંમત રૂ.9.06 લાખ થાય છે. તમામ મુદ્દામાલ જપ્ત કરી કાયદેસર કાર્યવાહી શરૂ કરવામાં આવી છે.
દરોડાની કાર્યવાહી દરમિયાન દારૂનો જથ્થો રાખનાર અતુલ મનજી સખીયા પોલીસને ચકમો આપી ફરાર થઈ ગયો હતો. એલસીબી પોલીસે જણાવ્યું છે કે આરોપીની ધરપકડ માટે અલગ અલગ ટીમો બનાવી તપાસ તેજ કરવામાં આવી છે. આ સાથે દારૂ ક્યાંથી લાવવામાં આવ્યો હતો અને કોને સપ્લાય થવાનો હતો તે દિશામાં પણ તપાસ ચાલુ રાખવામાં આવી છે.
રૂરલ એલસીબીની આ સફળ કાર્યવાહીથી જિલ્લામાં ગેરકાયદેસર દારૂના વેપારમાં સંડોવાયેલા તત્વોમાં ફફડાટ ફેલાયો છે.
