કચ્છના અમુક વિસ્તાર અને મહેસાણા જિલ્લામાં કમોસમી વરસાદ ખાબકયો

 ઠંડી અને પવન વચ્ચે માવઠાની આફત : બેવડી ઋતુનો અનુભવ

મિશ્ર વાતાવરણ વચ્ચે કમોસમી વરસાદ પડતા ખેતી પાકને નુકશાન જવાની ભીતિ

અગ્ર ગુજરાત, રાજકોટ

ગુજરાતમાં હવામાનનો અનોખો મિજાજ જોવા મળી રહ્યો છે. નાગરિકો બેવડી ઋતુનો અનુભવ કરી રહ્યાં છે. તો બીજી તરફ કચ્છના નારાયણ સરોવર, વર્માનગર, ગૃહર સહિતના પંથકમાં કમોસમી વરસાદ પડયો હતો. જયારે મહેસાણા જિલ્લામાં વરસાદી ઝાપટા વરસ્યા હતાં. માવઠાના કારણે ખેતી પાકને નુકશાન જવાની ભીતિ સેવાઇ રહી છે. હવામાન વિભાગની આગાહી મુજબ રાજયના અનેક ભાગોમાં હળવાથી મધ્યમ માવઠાની શકયતા છે.

હવામાનમાં આવેલા પલટાની સૌથી વધુ અસર સરહદી જિલ્લા કચ્છમાં જોવા મળી છે. પાકિસ્તાન પર સર્જાયેલું ‘કોલ્ડ ફ્રન્ટ’ કચ્છ તરફ આગળ વધતા નારાયણ સરોવર, વર્માનગર અને ગુહર સહિતના પંથકોમાં કમોસમી વરસાદ ખાબક્યો છે. આ અણધાર્યા વરસાદને કારણે ખેતીના પાકને મોટાપાયે નુકસાન થવાની ભીતિ સેવાઈ રહી છે. બીજી તરફ, નલિયા 10.4 ડિગ્રી સાથે રાજ્યનું સૌથી ઠંડુ શહેર નોંધાયું છે.
રાજ્યના મુખ્ય શહેરોમાં તાપમાનની સ્થિતિ મુજબ સમગ્ર રાજ્યમાં લઘુત્તમ તાપમાન સરેરાશ 15 થી 19 ડિગ્રી સેલ્સિયસ વચ્ચે નોંધાયું છે, જેમાં ઉત્તર-પશ્ચિમી પવનની ગતિ વધવાને કારણે વહેલી સવારે અને મોડી રાત્રે કડકડતી ઠંડીનો અનુભવ થાય છે જ્યારે બપોરે ગરમી લાગતા નાગરિકો બેવડી ઋતુનો સામનો કરી રહ્યા છે. તાપમાનની વિગતો મુજબ, વડોદરા 19.0 ડિગ્રી સાથે સૌથી ગરમ રહ્યું છે, જ્યારે અમરેલીમાં 14.6 અને રાજકોટમાં 14.8 ડિગ્રી તાપમાન નોંધાયું છે; આ ઉપરાંત સુરતમાં 17.8, અમદાવાદમાં 16.8 અને રાજ્યના પાટનગર ગાંધીનગરમાં 16.0 ડિગ્રી તાપમાન રહેતા ઠંડી અને ગરમીનું મિશ્ર વાતાવરણ જોવા મળી રહ્યું છે.

હવામાન વિભાગની આગાહી મુજબ, આગામી દિવસોમાં પવનનું જોર હજુ વધશે. વેસ્ટર્ન ડિસ્ટર્બન્સની અસર હેઠળ રાજ્યના અનેક ભાગોમાં હળવા થી મધ્યમ માવઠાની શક્યતા છે. આ બદલાતા હવામાનને કારણે વાયરલ ઇન્ફેક્શન અને શરદી-ઉધરસના કેસોમાં પણ વધારો જોવા મળી રહ્યો છે. ખાસ કરીને ખેડૂતોને તૈયાર પાકને સુરક્ષિત જગ્યાએ ખસેડવા સૂચના આપવામાં આવી છે.

હવામાન વિભાગના ડાયરેક્ટર ડો. એ. કે. દાસના જણાવ્યા અનુસાર, યલો એલર્ટ સાથે કચ્છ, બનાસકાંઠા અને પાટણમાં કમોસમી વરસાદની આગાહી કરવામાં આવી છે. વેસ્ટર્ન ડિસ્ટર્બન્સને કારણે માવઠું પડવાની શક્યતા છે. વીજળીના કડાકા સાથે વરસાદ પડી શકે છે. આગામી દિવસોમાં માછીમારોને બે દિવસ દરિયો ન ખેડવા સૂચના આપવામાં આવી છે. મહેસાણા જિલ્લામાં હળવા વરસાદી ઝાપટા વરસ્યા હતા. માવઠાંની અસર ગુજરાત ઉપરાંત પાડોશી રાજ્ય રાજસ્થાનમાં પણ જોવા મળશે. રાજસ્થાનના 6 જિલ્લામાં માવઠાંની આગાહી કરવામાં આવી છે. આ ઉપરાંત આગામી અઠવાડિયા દરમિયાન કમોસમી વરસાદની શક્યતા પણ વ્યકત કરવામાં આવી છે.

રાજ્યમાં માવઠાની આગાહી વચ્ચે મહેસાણાના વાતાવરણમાં પલટો જોવા મળ્યો હતો. હળવા વરસાદી ઝાપટા વરસતા રસ્તાઓ ભીંજાયા હતા. આગામી 24 કલાક બાદ બે દિવસ માટે રાજ્યમાં ઠંડીનું જોર વધશે. 2થી 3 ડિગ્રી સેલ્સિયસ લઘુતમ તાપમાનમાં ઘટાડો નોંધાશે. ત્યાર બાદ ફરી લઘુતમ તાપમાનમાં વધારો થવાની શક્યતા છે. આજે અમદાવાદમાં 16.8, અમરેલીમાં 14.6, વડોદરામાં 19, ભાવનગરમાં 17.2, ભુજમાં 15.4, દાહોદમાં 14.3, દમણમાં 18.2, ડાંગમાં 15.7, ડીસામાં 15.3, દીવમાં 16, દ્વારકા 17.8, ગાંધીનગર 16, કંડલા 16.5, નલિયા 10.4, ઓખામાં 19, પોરબંદરમાં 16, રાજકોટમાં 14.8, સુરતમાં 17.8 અને વેરાવળમાં 18 ડિગ્રી સેલ્સિયસ લઘુત્તમ તાપમાન નોંધાયું હતું.

અગાઉ હવામાન નિષ્ણાત પરેશ ગોસ્વામીએ આગાહી કરી હતી કે 21થી 26 જાન્યુઆરી દરમિયાન રાજ્યમાં ફરી માવઠું પડવાની શક્યતા છે. સમગ્ર રાજ્યમાં વાદળછાયું વાતાવરણ જોવા મળશે. ઉત્તર ગુજરાત અને કચ્છના કેટલાક ભાગોમાં કમોસમી વરસાદ પડવાની શક્યતા છે.

સોમવાર સુધી દેશના અનેક ભાગોમાં વરસાદની શકયતા

જ્યોતિષ અને હવામાન નિષ્ણાત જયપ્રકાશ માઢકે જણાવ્યું હતું કે 20 જાન્યુઆરીથી 26 જાન્યુઆરી દરમિયાન દેશના અનેક ભાગોમાં કમોસમી વરસાદ, બરફવર્ષા, ઠંડીની લહેર અને ધુમ્મસ જોવા મળી શકે છે. પંજાબ, હરિયાણા, દિલ્હી, ઉત્તરપ્રદેશ, રાજસ્થાન, મધ્યપ્રદેશ તેમજ ગુજરાતમાં ફરી એક વખત ઠંડીની લહેર આવશે. ગુજરાતના કચ્છ, ઉત્તર ગુજરાત અને સૌરાષ્ટ્રમાં 21થી 25 જાન્યુઆરી દરમિયાન હળવો વરસાદ પડી શકે છે. અમુક વિસ્તારોમાં માત્ર વાદળછાયા વાતાવરણ બાદ તીવ્ર ઠંડી અનુભવાશે. ખાસ કરીને રાત્રિના સમયે ઠંડી વધારે લાગશે.