રીબડા અમિત ખૂંટ આપઘાત કેસમાં રાજદીપસિંહ જાડેજાને શરતી જામીન

રીબડા અમિત ખૂંટ આપઘાત કેસમાં રાજદીપસિંહ જાડેજાને શરતી જામીન

ગોંડલ સેશન્સ કોર્ટનો મહત્વપૂર્ણ ચુકાદો, 72 દિવસના જેલવાસ બાદ આરોપી જેલમુક્ત

અગ્ર ગુજરાત, ગોંડલ

રીબડા ગામના ચર્ચિત અમિત ખૂંટ આપઘાત પ્રકરણમાં મુખ્ય આરોપી રાજદીપસિંહ જાડેજાને ગોંડલની સેશન્સ અદાલતે શરતી જામીન મંજૂર કર્યા છે. કોર્ટના આદેશ બાદ રાજદીપસિંહ 72 દિવસના જેલવાસ પછી મુક્ત થયો છે, જેના કારણે સમગ્ર પંથકમાં આ કેસ ફરી ચર્ચાનો વિષય બન્યો છે.
પ્રાપ્ત વિગતો મુજબ, અમિત ખૂંટ આપઘાત કેસ નોંધાયા બાદ રાજદીપસિંહ જાડેજા લાંબા સમય સુધી પોલીસ પકડથી દૂર રહ્યો હતો. તેણે હાઈકોર્ટ તેમજ સુપ્રીમ કોર્ટમાં આગોતરા જામીન માટે અરજીઓ કરી હતી, પરંતુ ત્યાંથી કોઈ રાહત ન મળતાં અંતે તા. 10 નવેમ્બર, 2025ના રોજ રાત્રિના સમયે ગોંડલ તાલુકા પોલીસ સ્ટેશનમાં આત્મસમર્પણ કર્યું હતું. ત્યારબાદ પોલીસ રિમાન્ડ પૂર્ણ થતાં તા. 13 નવેમ્બરે તેને જૂનાગઢ જેલમાં મોકલવામાં આવ્યો હતો.
આ કેસમાં ગોંડલની એડિશનલ ડિસ્ટ્રિક્ટ એન્ડ સેશન્સ કોર્ટના જજ શ્રી એચ. એ. ત્રિવેદી સમક્ષ જામીન અરજીની સુનાવણી હાથ ધરાઈ હતી. ફરિયાદ પક્ષ તરફથી સ્પેશિયલ પબ્લિક પ્રોસિક્યુટર નીમવામાં આવ્યા હતા, જ્યારે બચાવ પક્ષે કાયદેસર પુરાવા અને તપાસના દસ્તાવેજોને આધારે વિસ્તૃત દલીલો રજૂ કરી હતી.
પોલીસ તપાસના કાગળો, ચાર્જશીટ અને ઉપલબ્ધ પુરાવાઓનું અવલોકન કર્યા બાદ કોર્ટે બચાવ પક્ષની દલીલોને માન્ય રાખી રાજદીપસિંહ જાડેજાને શરતી જામીન આપવા આદેશ કર્યો હતો. કોર્ટ દ્વારા આરોપી ઉપર અનેક કડક શરતો લાદવામાં આવી છે.
જામીનની શરતો અનુસાર આરોપી પુરાવા સાથે છેડછાડ કરી શકશે નહીં તેમજ કોઈ પણ સાક્ષીને ફોસલાવવાનો કે ધમકાવવાનો પ્રયાસ કરી શકશે નહીં. આરોપીને તા. 1 એપ્રિલ, 2026 સુધી રાજકોટ જિલ્લાની હદ બહાર જવા પર પ્રતિબંધ મૂકવામાં આવ્યો છે અને ત્યારબાદ પણ કેસનો નિકાલ ન આવે ત્યાં સુધી કોર્ટની મંજૂરી વગર ગુજરાત રાજ્ય બહાર જવાની મનાઈ રહેશે. જો આરોપી પાસે પાસપોર્ટ હોય તો તે સાત દિવસમાં કોર્ટમાં જમા કરાવવાનો રહેશે, અને પાસપોર્ટ ન હોય તો તે અંગે સોગંદનામું રજૂ કરવું ફરજિયાત રહેશે.
આ ઉપરાંત ટ્રાયલ દરમિયાન નિયમિત હાજરી આપવી, પોતાનું રહેઠાણ તથા મોબાઈલ નંબરની માહિતી લેખિત રૂપે કોર્ટ અને તપાસ અધિકારીને આપવી તેમજ જામીન દરમ્યાન કોઈ પણ ગુનાહિત પ્રવૃત્તિમાં સંડોવાવું નહીં એવી સ્પષ્ટ સૂચના પણ કોર્ટ દ્વારા આપવામાં આવી છે. કોર્ટએ ચેતવણી આપી છે કે શરતોના ભંગના કિસ્સામાં જામીન રદ કરવામાં આવશે.