ધારીમાં ખેડૂતો પરના હુમલા બાદ ભાજપના ધારાસભ્યોનો પોલીસ વિરૂધ્ધ જ મોરચો
વેકરીયાપરાના રહિશો દ્વારા કરાયેલા વિરોધ પ્રદર્શનમાં નેતાઓની હાજરી : કાયદો અને વ્યવસ્થા ન જળવાતી હોવાની હૈયાવરાળ
અગ્ર ગુજરાત, અમરેલી
અમરેલી જિલ્લાના ધારી પંથકમાં કાયદો અને વ્યવસ્થાની સ્થિતિને લઈને ભારે રાજકીય ગરમાવો જોવા મળી રહ્યો છે. વેકરીયાપરા વિસ્તારમાં બે ખેડૂતો પર થયેલા હુમલા બાદ સ્થાનિકોમાં ભારે રોષ ફાટી નીકળ્યો છે. આ ઘટનાના વિરોધમાં ખેડૂતો, વેપારીઓ, મહિલાઓ અને રાજકીય આગેવાનો રસ્તા પર ઉતરી આવ્યા હતા. ખાસ વાત એ છે કે રાજ્યમાં ભાજપની સરકાર હોવા છતાં ભાજપના જ વર્તમાન અને પૂર્વ ધારાસભ્યોએ પોલીસ તંત્રની કામગીરી સામે ખુલ્લેઆમ સવાલો ઉઠાવ્યા છે.
મળતી માહિતી મુજબ, ધારીના વેકરીયાપરા વિસ્તારમાં અસામાજિક તત્ત્વોએ બે ખેડૂતો પર હુમલો કર્યો હતો. બંને ખેડૂતોને ગંભીર ઇજાઓ પહોંચી હતી અને હાલ તેઓ સારવાર હેઠળ હોવાનું જાણવા મળ્યું છે.આ ઘટનાને પગલે સમગ્ર પંથકમાં અસંતોષ ફેલાયો હતો. ખેડૂતો અને સ્થાનિક આગેવાનો દ્વારા કાયદો-વ્યવસ્થાની સ્થિતિ સુધારવાની માંગ સાથે આવેદનપત્ર આપવામાં આવ્યું હતું.
વિરોધ પ્રદર્શન દરમિયાન સ્થાનિક આગેવાનોએ આક્ષેપ કર્યો હતો કે વિસ્તારમાં દારૂનું દૂષણ અને અસામાજિક પ્રવૃત્તિઓ સતત વધી રહી છે.પ્રદર્શનકારીઓએ દાવો કર્યો કે આવા તત્ત્વો સામે કડક કાર્યવાહી ન થવાને કારણે ગુનાખોરીમાં વધારો થઈ રહ્યો છે અને સામાન્ય નાગરિકો અસુરક્ષિત અનુભવ કરી રહ્યા છે.
વિરોધ કાર્યક્રમમાં ધારીના વર્તમાન ધારાસભ્ય જે.વી. કાકડિયા, પૂર્વ ધારાસભ્ય નલિન કોટડિયા તેમજ પૂર્વ ધારાસભ્ય મનસુખ ભુવા સહિતના અનેક આગેવાનો હાજર રહ્યા હતા.નેતાઓએ કાયદો-વ્યવસ્થા જાળવવા અને વિસ્તારમાં ચાલતી ગેરકાયદેસર પ્રવૃત્તિઓ સામે કડક કાર્યવાહી કરવાની માંગણી કરી હતી.
આગેવાનોએ ચેતવણી આપી હતી કે જો અસામાજિક તત્ત્વો સામે અસરકારક કાર્યવાહી નહીં થાય અને ગેરકાયદેસર પ્રવૃત્તિઓ પર નિયંત્રણ નહીં આવે તો આગામી સમયમાં વધુ ઉગ્ર આંદોલન કરવામાં આવશે.તેમણે ખેડૂતોની સુરક્ષા અને સામાન્ય નાગરિકોના હિત માટે કડક પગલાં લેવાની પણ માંગ કરી હતી.
આ સમગ્ર ઘટનાએ સ્થાનિક રાજકારણમાં નવી ચર્ચા જગાવી છે. સત્તાધારી પક્ષના નેતાઓ દ્વારા જ પોલીસ તંત્ર સામે અસંતોષ વ્યક્ત કરવામાં આવતા અનેક રાજકીય પ્રશ્નો ઊભા થયા છે.હાલ ખેડૂતો પર હુમલાની ઘટનાને લઈને પોલીસ તપાસ ચાલુ છે અને જવાબદાર તત્ત્વો સામે કાર્યવાહી કરવાની માંગ ઉગ્ર બની રહી છે.
