ભચાઉના વોંધ ઓવરબ્રિજ નજીક ધોળા દિવસે ગોળી ધરબી વૃધ્ધની કરી હત્યા
પોઇન્ટ બ્લેન્ક રેન્જથી અજાણ્યા શખ્સો દ્વારા અંધાધૂંધ ગોળીબાર : જાહેરમાં ખેલાયેલા ખેલથી શહેરમાં ભયનો માહોલ
અગ્ર ગુજરાત, કચ્છ
સરહદી જિલ્લા કચ્છના ભચાઉમાં કાયદો અને વ્યવસ્થાના લીરેલીરા ઉડાવતી એક ભયાનક ઘટના સામે આવી છે. ભચાઉના વ્યસ્ત એવા વોંધ ઓવરબ્રિજ પાસે ધોળા દિવસે અજાણ્યા શખ્સોએ અંધાધૂંધ ગોળીબાર કરી એક વૃદ્ધની કરપીણ હત્યા કરી નાખતા સમગ્ર પંથક ફફડાટ વ્યાપી ગયો છે. ધોળા દિવસે થયેલા આ અંધાધૂંધ ફાયરિંગથી કચ્છની શાંતિ ડહોળાઈ છે.
મળતી માહિતી મુજબ, વોંધ ઓવરબ્રિજ પાસે જ્યારે જનજીવન સામાન્ય હતું, ત્યારે અચાનક ગોળીબારના અવાજથી આખો વિસ્તાર ગુંજી ઉઠ્યો હતો. બાઈક કે અન્ય વાહન પર આવેલા હુમલાખોરોએ એક વૃદ્ધને નિશાન બનાવી તેમના પર પોઈન્ટ બ્લેન્ક રેન્જથી ફાયરિંગ કર્યું હતું. હુમલો એટલો જોરદાર હતો કે ગોળી વાગતાની સાથે જ વૃદ્ધ લોહીલુહાણ હાલતમાં જમીન પર ઢળી પડ્યા હતા અને તેમનું ઘટનાસ્થળે જ કમકમાટીભર્યું મોત નીપજ્યું હતું.
પ્રાથમિક તપાસમાં આ હત્યા પાછળ પારિવારિક અદાવત અથવા કોઈ જૂનું વેર કારણભૂત હોવાની આશંકા સેવાઈ રહી છે. હુમલાખોરો કોઈ ચોક્કસ આયોજન સાથે જ આવ્યા હોય તેમ જણાય છે, કારણ કે હત્યા કર્યા બાદ તેઓ પળવારમાં ત્યાંથી રફુચક્કર થઈ ગયા હતા. જોકે, પોલીસ તપાસ બાદ જ ખબર પડશે કે હત્યા પાછળનું અસલી કારણ જમીન વિવાદ છે કે અંગત અદાવત.
ઘટનાની ગંભીરતા જોતા ભચાઉપોલીસનો મોટો કાફલો તરત જ સ્થળ પર પહોંચ્યો હતો. પોલીસે મૃતદેહને પોસ્ટમોર્ટમ માટે હોસ્પિટલ ખસેડ્યો છે અને પુરાવા એકઠા કરવાની કામગીરી શરૂ કરી છે. ફરાર હુમલાખોરોને પકડી પાડવા માટે કચ્છ જિલ્લાની તમામ સરહદો અને હાઈવે પર કડક નાકાબંધી કરી દેવામાં આવી છે.
પોલીસ દ્વારા ઘટનાસ્થળની આસપાસના સીસીટીવીફૂટેજ ચકાસવામાં આવી રહ્યા છે જેથી હુમલાખોરો કઈ દિશામાં ગયા અને કયા વાહનનો ઉપયોગ કર્યો તેની માહિતી મળી શકે. સ્થાનિક લોકોના નિવેદનો પણ લેવામાં આવી રહ્યા છે. પોલીસની અલગ-અલગ ટીમો બનાવીને આરોપીઓના સંભવિત ઠેકાણાઓ પર દરોડા પાડવામાં આવી રહ્યા છે.
