ગીરગઢડા નજીક સાંગાવાડી નદીમાં હાથ-પગ ધોવા ગયેલા 10 વર્ષના બાળકને મગર ખેંચી ગયો
હરમડીયા અને એભલવડ ગામ વચ્ચે દુઃખદ ઘટના, વન વિભાગ-ફાયર વિભાગ દ્વારા શોધખોળ શરૂ, સમગ્ર પંથકમાં શોક
અગ્ર ગુજરાત, ઉના
ગીર સોમનાથ જિલ્લાના ગીર ગઢડા તાલુકાના હરમડીયા અને એભલવડ ગામ વચ્ચેથી પસાર થતી સાંગાવાડી નદી માં એક અત્યંત દુઃખદ ઘટના સામે આવી છે. નદી કિનારે હાથ-પગ ધોવા ગયેલા 10 વર્ષના બાળક ને અચાનક મગર પાણીમાં ખેંચી જતા સમગ્ર વિસ્તારમાં અરેરાટી ફેલાઈ ગઈ છે.
પ્રાપ્ત માહિતી મુજબ, હરમડીયા ગામનો 10 વર્ષીય બાળક બપોરના સમયે સાંગાવાડી નદી કિનારે હાથ-પગ ધોવા ગયો હતો. તે દરમિયાન અચાનક પાણીમાંથી આવેલા મગરે બાળક પર હુમલો કરી તેને પાણીમાંખેંચી ગયો હતો નજરે જોનાર લોકોએ બૂમાબૂમ કરતા આસ પાસના લોકો દોડી આવ્યા હતા, પરંતુ ત્યાં સુધીમાંમગર બાળકને ઊંડા પાણીમાં લઈ ગયો હતો.
ઘટનાની જાણ થતા જ વનવિભાગઅનેફાયરવિભાગની ટીમો તાત્કાલિક ઘટનાસ્થળે પહોંચી હતી. બોટની મદદ થી નદીમાં બાળકની શોધખોળ હાથ ધરવામાં આવી છે. સ્થાનિક તરવૈયાઓપણબચાવકામગીરીમાંજોડાયા છે. મોડી સાંજ સુધી બાળકનો કોઈ પત્તો લાગ્યો નથી. વન વિભાગ દ્વારા મગરને ટ્રેસ કરવા માટે પણ કાર્યવાહી શરૂ કરાઈ છે.
આ ઘટનાને પગલે હરમડીયા, એભલવડ સહિત સમગ્ર ગીર ગઢડા પંથકમાં ભય અને શોકનો માહોલ છવાયો છે. સ્થાનિક લોકોમાં નદી વિસ્તારમાં મગરોની વધતી અવરજવર અંગે ભારે ચિંતા જોવા મળી રહી છે. ગ્રામજનોએ વન વિભાગ સમક્ષ નદી કિનારે મગરોના આતંકને ડામવા અને સુરક્ષા વધારવા માંગ કરી છે.
વન વિભાગ અને સ્થાનિક તંત્રએ નદી-તળાવ કિનારે જતા લોકોને સાવચેતી રાખવા અપીલ કરી છે. ખાસ કરીને બાળકોને એકલા નદી કિનારે ન મોકલવા અને ઊંડા પાણીમાં ન જવા તાકીદ કરવામાં આવી છે. ઉનાળાની ઋતુમાં મગર ખોરાકની શોધમાં કિનારા નજીક આવતા હોવાથી વધુ સાવધાની રાખવી જરૂરી છે.હાલ બાળકની શોધખોળ યુદ્ધના ધોરણે ચાલુ છે. વહીવટી તંત્ર અને વન વિભાગના ઉચ્ચ અધિકારીઓ પણ ઘટનાસ્થળે પહોંચી પરિસ્થિતિ પર નજર રાખી રહ્યા છે.
