ગોંડલ રોડ શિવા હોટેલમાં દેહવ્યાપારનો ભાંડો ફૂટ્યો: 3 યુવતીઓને મુક્ત કરાવાઈ
સંચાલક-મેનેજરની ધરપકડ કરતી એ ડિવિઝન પોલીસ ઝડપાયા
અગ્ર ગુજરાત, રાજકોટ
રાજકોટ શહેરમાં ગેરકાયદેસર પ્રવૃત્તિઓ સામે પોલીસે ફરી એક વખત કડક કાર્યવાહી હાથ ધરી છે. ગોંડલ રોડ પર આવેલી એક હોટેલમાં દેહવ્યાપાર ચાલી રહ્યો હોવાની બાતમી મળતાં પોલીસએ દરોડો પાડી સમગ્ર રેકેટનો પર્દાફાશ કર્યો છે. આ કાર્યવાહીમાં હોટેલના સંચાલક અને મેનેજરને ઝડપી પાડવામાં આવ્યા છે, જ્યારે અલગ-અલગ રાજ્યોની ચાર યુવતીઓને પણ સુરક્ષિત બહાર કાઢવામાં આવી છે.
મળતી માહિતી મુજબ, ગોંડલ રોડ પર વિજય પ્લાઝા કોમ્પલેક્સના બીજા માળે આવેલી શીવા હોટેલમાં ગેરકાયદેસર પ્રવૃત્તિ ચાલી રહી હોવાની ચોક્કસ માહિતી પોલીસને મળી હતી. આ આધારે પોલીસે સુનિયોજિત રીતે કામગીરી હાથ ધરી અને ડમી ગ્રાહકને મોકલી પુરાવા મેળવ્યા બાદ દરોડો પાડ્યો હતો. ડમી ગ્રાહક પાસેથી સંકેત મળતા જ પોલીસની ટીમ તરત જ હોટેલના રૂમ નં.105માં પહોંચી હતી, જ્યાં એક યુવક અને યુવતી શંકાસ્પદ હાલતમાં મળી આવ્યા હતા. યુવતીની પૂછપરછ દરમિયાન તેણે પોતે મહારાષ્ટ્રના ઔરંગાબાદની રહેવાસી હોવાનું જણાવ્યું હતું. વધુ પૂછપરછમાં બહાર આવ્યું કે હોટેલના સંચાલક અને મેનેજર ગ્રાહકો પાસેથી રૂપિયા વસૂલતા અને યુવતીઓને તેનો એક ભાગ આપતા હતા.
પોલીસે વધુ તપાસ કરતાં હોટેલના અન્ય રૂમોમાંથી પણ ત્રણ યુવતીઓ મળી આવી હતી. તેઓ મુંબઈ, મેઘાલય અને ઉત્તરાખંડ જેવા રાજ્યોમાંથી અહીં લાવવામાં આવી હોવાનું બહાર આવ્યું છે. યુવતીઓએ કબૂલાત આપી હતી કે હોટેલ સંચાલકો દ્વારા તેમની પાસેથી દેહવ્યાપાર કરાવવામાં આવતો હતો અને દરેક ગ્રાહક દીઠ તેમને રૂપિયા આપવામાં આવતા હતા.
આ સમગ્ર રેકેટમાં ગ્રાહકો પાસેથી લગભગ ₹2500 વસૂલવામાં આવતા હતા, જેમાંથી ₹1000 યુવતીઓને આપવામાં આવતા અને બાકીના રૂપિયા સંચાલકો પોતાની પાસે રાખતા હતા. ઉપરાંત, હોટેલમાં પ્રવેશ માટે અલગથી ફી પણ લેવામાં આવતી હતી. કાર્યવાહી દરમિયાન પોલીસે હોટેલમાંથી મોબાઇલ ફોન, રોકડ રકમ, લેપટોપ તેમજ અન્ય સામગ્રી મળી કુલ ₹1.71 લાખથી વધુનો મુદ્દામાલ જપ્ત કર્યો હતો. આ ઉપરાંત તપાસ દરમિયાન હોટેલમાંથી દારૂની બોટલ પણ મળી આવી હતી, જેના આધારે પ્રોહિબિશન કાયદા હેઠળ પણ અલગ ગુનો નોંધવામાં આવ્યો છે. પોલીસે આ મામલે હોટેલના સંચાલક નિશાંત રૂપારેલીયા અને મેનેજર નિલેષ આસવાણી સામે ઇમોરલ ટ્રાફિક પ્રિવેન્શન એક્ટ હેઠળ ગુનો નોંધી તેમની ધરપકડ કરી છે. હાલ બંને આરોપીઓની પૂછપરછ ચાલી રહી છે અને આ રેકેટમાં અન્ય કોઈ લોકો સંડોવાયેલા છે કે નહીં તેની તપાસ કરવામાં આવી રહી છે. આમ શીવા હોટેલમાં ચાલતા આ દેહવ્યાપારના ભાંડો ફૂટતા શહેરમાં ચકચાર મચી ગઈ છે, જ્યારે પોલીસે ઝડપી કામગીરીથી આ ગેરકાયદેસર રેકેટને તોડી પાડવામાં સફળતા મેળવી છે.
