સરકારી દાખલાઓ અને અરજીની પહોંચ પર જોવા મળશે મતદાનનો સંદેશ
જનસેવા કેન્દ્રો હવે મતદાનની યાદ અપાવશે અરજદારોને
અગ્ર ગુજરાત, રાજકોટ
રાજકોટ જિલ્લા વહીવટી તંત્ર દ્વારા આગામી સ્થાનિક સ્વરાજ્યની ચૂંટણી – ૨૦૨૬ માં મહત્તમ મતદાન થાય તે હેતુથી એક નવો પ્રયોગ હાથ ધરવામાં આવ્યો છે. ‘સ્વેપ’ (svap) પ્રવૃત્તિ અંતર્ગત હવે રાજકોટના જનસેવા કેન્દ્રો અને મહાનગરપાલિકાની ટેક્સ બ્રાન્ચમાં આવતા નાગરિકોને મતદાનની પવિત્ર ફરજની યાદ અપાવવામાં આવશે.
જનસેવા કેન્દ્રમાં વિવિધ દાખલાઓ, પ્રમાણપત્રો કે ટેક્સ ભરવા આવતા ગ્રાહકોને અપાતી બિલની પહોંચ પર ‘મારો મત મારો અધિકાર – મતદાન અચૂક કરીએ’ અને ‘તા. ૨૬ એપ્રિલના રોજ અચૂક મતદાન કરો’ તેવો ખાસ સ્ટેમ્પ લગાવવામાં આવી રહ્યો છે.
રોજબરોજ સેંકડો નાગરિકો સરકારી કામકાજ માટે જનસેવા કેન્દ્રની મુલાકાત લેતા હોય છે, ત્યારે આ સ્ટેમ્પ સીધો જ મતદારના હાથમાં પહોંચશે અને તેને પોતાની લોકશાહી ફરજની યાદ અપાવશે.
જનસેવા કેન્દ્રો અને કોર્પોરેશનની ટેક્સ બ્રાન્ચ લોકો સાથે સીધી રીતે જોડાયેલા વિભાગો છે. આ માધ્યમથી ૨૬ એપ્રિલના રોજ યોજાનાર તાલુકા-જિલ્લા પંચાયત અને મહાનગરપાલિકાની ચૂંટણી માટે લોકોમાં ઉત્સાહ જગાડવાનો પ્રયાસ કરાઇ રહ્યો છે.
જનસેવા કેન્દ્રમાં આવતા અરજદારો પણ આ નવીન પહેલને આવકારી રહ્યા છે. પહોંચ પર મારેલો સ્ટેમ્પ જોઈને નાગરિકો લોકશાહીના આ પર્વમાં સહભાગી થવા અને ૨૬મી તારીખે અચૂક મતદાન કરવા માટે પોતાની પ્રતિબદ્ધતા દર્શાવી રહ્યા છે.
