અંબાજીમાં પ્રસાદ વિવાદનો મામલો વધુ બીચક્યો, જાણો શું કહ્યું જિલ્લા કલેક્ટરે?

• મોહનથાળના પ્રસાદને લઈને લેવાયો નિર્ણય
  
• અંબાજી મંદિરમાં ટચ સ્ટોન ફાઉન્ડેશન બનાવશે પ્રસાદ
  
• અત્યાર સુધી મોહિની કેટરર્સ બનાવતી હતી પ્રસાદ
  

છેલ્લા કેટલાક દિવસોથી પ્રસિદ્ધ યાત્રાધામ અંબાજી તેના પ્રસાદને લઈને ચર્ચામાં છે. પહેલા નકલી ઘીના કારણે યાત્રાધામ અંબાજીનો પ્રસાદ ચર્ચામાં રહ્યો હતો. આ સમયે આ પ્રસાદની જવાબદારી મોહિની કેટરર્સની હતી. જો કે કંપનીએ આ મુદ્દે તપાસમાં પોતાના હાથ ખંખેરી દીધા હોવાનું સામે આવ્યું હતું.

ટચ સ્ટોન ફાઉન્ડેશન બનાવશે પ્રસાદ

યાત્રાધામ અંબાજીમાં ભક્તો શ્રદ્ધાથી માતાજીના ચરણોમાં શીશ નમાવે છે અને સાથે જ અહીંના વર્ષો જૂના મોહનથાળના પ્રસાદને લઈને પણ ઘણી આસ્થા જોવા મળે છે. પહેલા ભેળસેળવાળા ઘીના પ્રસાદના કારણે પણ મંદિર ચર્ચામાં રહ્યું હતું. હવે કંપનીનો કોન્ટ્રાક્ટ પૂરો થતાં હવેથી ટચ સ્ટોન ફાઈન્ડેશનને આ કોન્ટ્રાક્ટ આપવામાં આવ્યો છે. એટલે કે હવે મોહનથાળનો પ્રસાદ ટચ સ્ટોન ફાઉન્ડેશન બનાવશે.

પ્રસાદમાં દૂધની જગ્યાએ ગરમ પાણીમાં પાવડર નાખતું ટચ સ્ટોન ફાઉન્ડેશન

શ્રી ટચ ઈન ફાઉન્ડેશન એ ભૂતકાળમાં મોહનથાળના પ્રસાદમાં દૂધની જગ્યાએ ગરમ પાણીમાં પાવડર નાખતું હતું. તંત્રએ અંબાજીમાં પ્રસાદ માટે ચોરને કાઢી ઘંટી ચોરને લાવ્યાની ચર્ચાઓએ જોર પકડ્યું છે. અંબાજીમાં પ્રસાદ બનાવવાની કામગીરી સાથે સંકળાયેલી વ્યક્તિએ અગાઉ જણાવ્યું હતું કે અંબાજીના મોહનથાળના પ્રસાદમાં ઘી, ખાંડ અને બેસનનું પ્રમાણ અનુક્રમે 3:6:4 હોય છે. શરૂઆતમાં બેસન સાથે દૂધ અને ઘી ભેળવવામાં આવે છે, જેના માટે ‘ધાબું દેવું’ એવો શબ્દપ્રયોગ કરવામાં આવે છે. એ પછી લોટને ધીમા તાપે બદામી રંગનો થવા દેવામાં આવે છે. એ પછી સામાન્ય વિધિ મુજબ જ મોહનથાળ બનાવવામાં આવે છે.

જાણો શું કહ્યું જિલ્લા કલેક્ટરે

ટચ સ્ટોન સંસ્થાને પ્રસાદની કામગીરી સોપાયા બાદ જિલ્લા કલેકટરનું નિવેદન સામે આવ્યું છે. વરુણ બરનવાલનું કહેવું છે કે 3-4 લોકો મીડિયાનો દૂર ઉપયોગ કરી મંદિરને બદનામ કરવાનું કામ કરે છે. ભાદરવી પૂનમનો મેળો પૂર્ણ થયા બાદ મોહીની કેટરર્સની કામગીરી અટકાવ્યા બાદ પ્રસાદની કામગીરી સરકારની મંજૂરી લઈને ટચ સ્ટોન સંસ્થાને આપી હતી. આ બાદ વહીવટી પ્રોસેસ કરી કામગીરી શરૂ કરાવી છે. તે સમયે કોઈ વિવાદ ન હતો. એક દિવસ જ પ્રસાદમાં દૂધની જગ્યાએ દૂધ પાવડર વાપર્યો હતો અને તે બાદ તેને દંડ પણ કરાયો હતો. આકસ્મિક સમયે આપડે વધુ પ્રસાદ બનાવવાનું કહ્યું અને તેમની પાસે દૂધનો જથ્થો ન હોવાથી પાવડર વાપર્યો હતો. 

નથી કરાયું ટેન્ડર રીન્યૂ

મોહિની કેટરર્સ વિવાદમાં આવ્યા બાદ તેનું ટેન્ડર રીન્યુ કરવામાં આવ્યું નહોતું. છેલ્લા કેટલાય દિવસોથી અંબાજી મંદિર દ્વારા પ્રસાદ બનાવવામાં આવતો હતો. પરંતુ હવે હવે ટચ સ્ટોન ફાઉન્ડેશન દ્વારા પ્રસાદ બનાવવાની શરૂઆત કરાઈ છે. જો કે ટચ સ્ટોન ફાઉન્ડેશન ઉપર પહેલાં પણ પ્રસાદ બનાવવા મામલે આરોપ લાગેલો છે.

કેવી રીતે શરૂ થયો મોહિની કેટરર્સનો વિવાદ

ભાદરવી પૂનમના મેળા પહેલાં ફૂડ વિભાગે અંબાજી મંદિરના ભોજનાલયમાં પ્રસાદના સ્થળેથી ઘીના સેમ્પલ લીધા હતા. જે બાદ રિપોર્ટમાં ખુલાસો થયો કે ઘીમાં ભેળસેળ હતી. અંબાજી મંદિરમાં મોહનથાળના આ પ્રસાદ બનાવવાનો કોન્ટ્રાક્ટ મોહિની કેટરર્સને અપાયો હતો. મોહિની કેટરર્સના સંચાલક પ્રમાણે અમૂલના લોગોવાળું ઘી અમદાવાદથી લાવવામાં આવ્યું હતું. ઘી શંકાસ્પદ લાગતા તેનો ઉપયોગ નહોતો કરાયો અને બાદમાં બનાસ ડેરીમાંથી ઘી લવાયું હતું. સંચાલકે તો દાવો કર્યો હતો કે તેમની સાથે છેતરપિંડી થઈ છે કેમ કે તેમને જ નકલી ઘી પધરાવી દેવામાં આવ્યું હતું. તો આ અંગે ફૂડ એન્ડ ડ્રગ કંટ્રોલ વિભાગના કમિશ્નર ડૉ. હેમંત કોશિયાના જણાવ્યા પ્રમાણે મોહિની કેટરર્સે જ સસ્તાની લ્હાયમાં ભેળસેળિયું ઘી લીધું હતું.

દર 100 ગ્રામ મોહનથાળમાં 30 ગ્રામ બેસન, 46 ગ્રામ ખાંડ, 23 ગ્રામ ઘી વપરાય છે

અનેક વિવાદો બાદ અંબાજી મંદિર દ્વારા વેંચવામાં આવતા મોહનથાળના પ્રસાદના પૅકેટ પર આપવામાં આવેલી વિગત પ્રમાણે, દર 100 ગ્રામ મોહનથાળમાં 30 ગ્રામ બેસન, 46 ગ્રામ ખાંડ, 23 ગ્રામ ઘી તથા એક ગ્રામમાં દૂધ અને એલચીનો ઉપયોગ કરવામાં આવે છે. અંબાજીના મંદિર દ્વારા આપવામાં આવતા મોહનથાળના પ્રસાદનું FSSAI (ફૂડ સૅફ્ટી ઍન્ડ સ્ટાન્ડર્ડ્સ ઑથૉરિટી ઑફ ઇન્ડિયા) રજિસ્ટ્રેશન થયેલું છે. નિયમ મુજબ, પ્રસાદ બનાવનારે પણ આ સર્ટિફિકેટ લેવાનું રહે છે.