મોચી જ્ઞાતિ સમાજ ટ્રસ્ટ દ્વારા વિધવા બહેનોને આર્થિક સહાયનો કાર્યક્રમ યોજાયો
મોચી મંદિર વાડી ખાતે પ્રત્યેક લાભાર્થી બહેનને ₹૧૨૦૦ની રોકડ સહાય અને મોમેન્ટો અર્પણ કરાયા : જ્ઞાતિ અગ્રણીઓ અને દાતાઓની ઉપસ્થિતિમાં આયોજન
અગ્ર ગુજરાત ,રાજકોટ
શહેરના ઘી કાંટા રોડ, કડિયા નવ લાઈન ખાતે આવેલ મોચી મંદિર વાડી ૧૦માં ‘શ્રી મોચી જ્ઞાતિ સમાજ (ટ્રસ્ટ)’ દ્વારા એક ગરિમાપૂર્ણ અને માનવતાવાદી કાર્યક્રમનું આયોજન કરવામાં આવ્યું હતું. પવિત્ર પુરુષોત્તમ માસના મંગલ અવસરે તથા સંત શ્રી લાલાબાપાની કૃપાથી યોજાયેલા આ કાર્યક્રમનો મુખ્ય હેતુ રાજકોટ શહેરમાં વસતા મોચી જ્ઞાતિના વિધવા અને એકલવાયું જીવન જીવતા સિનિયર સિટીઝન બહેનોને આર્થિક તેમજ સામાજિક પીઠબળ પૂરું પાડવાનો હતો. આ પવિત્ર માસ નિમિત્તે સંસ્થા દ્વારા તમામ લાભાર્થી બહેનો માટે ઉષ્માપૂર્વક ભોજન સમારંભનું આયોજન કરવામાં આવ્યું હતું, જેમાં જ્ઞાતિના વડીલ બહેનોએ ભાગ લીધો હતો અને ઉપસ્થિત સૌ કોઈને પોતાના હૃદયપૂર્વકના આશીર્વાદ આપ્યા હતા.
આ સેવાયજ્ઞમાં માત્ર ભોજન જ નહીં, પરંતુ તમામ લાભાર્થી બહેનો સ્વાવલંબી અનુભવે તે માટે આર્થિક સહાયનું પણ વિતરણ કરવામાં આવ્યું હતું. શ્રી મોચી જ્ઞાતિ સમાજ મોચી મંદિર દ્વારા પ્રત્યેક લાભાર્થીને ₹૫૦૦ રોકડા રૂબરૂમાં આપવામાં આવ્યા હતા. આ ઉપરાંત, સમાજના પ્રમુખ બીપીનભાઈ જેઠવા તરફથી વ્યક્તિદીઠ ₹૧૦૦ રોકડા અને પાણીની બોટલ ભેટ આપવામાં આવી હતી. જ્ઞાતિના અગ્રણી દાતા અને રાહુલ ઓર્નામેન્ટના પ્રોપ્રાયટર હસમુખભાઈ પરમાર તરફથી દરેક વ્યક્તિને ₹૨૦૦ રોકડા, અલ્પા ફર્નિચરવાળા અમિતભાઈ પરમાર તરફથી ₹૨૦૦ રોકડા, રાજકોટ ચેરિટી કમિશનર ઓફિસના નયનભાઈ ચાવડા તરફથી ₹૧૦૦ રોકડા તથા એકાઉન્ટન્ટ રાજેશભાઈ ચાવડા તરફથી પણ ₹૧૦૦ રોકડાની આર્થિક સહાય અર્પણ કરવામાં આવી હતી. આ સાથે પરમ આર્ટના કિરણભાઈ ચાવડા તરફથી દરેક બહેનોને સ્મૃતિચિહ્ન સ્વરૂપે ભગવાન વિષ્ણુની સુંદર છબી ભેટ આપવામાં આવી હતી. કાર્યક્રમમાં અન્ય સંસ્થાઓ દ્વારા સ્વેચ્છિક ફાળો પણ આપવામાં આવ્યો હતો, જેમાં શ્રી સીતારામ ધુન મંડળ તરફથી ₹૧૧૦૦, નામલ ધામ ગ્રુપના બળવંતભાઈ ચૌહાણ તરફથી ₹૧૦૦૦ અને એડવોકેટ પિયુષભાઈ ઝાલા તરફથી ₹૫૦૦ની સહાય પ્રાપ્ત થઈ હતી. આમ, ટ્રસ્ટ અને દાતાઓના સંયુક્ત સહયોગથી પ્રત્યેક લાભાર્થી બહેનને કુલ ₹૧૨૦૦ની રોકડ સહાય ચૂકવવામાં આવી હતી.
આ ગરિમામય કાર્યક્રમને સફળ બનાવવા માટે શ્રી મોચી જ્ઞાતિ સમાજ ટ્રસ્ટના હોદ્દેદારો અને જ્ઞાતિના શ્રેષ્ઠીઓ મોટી સંખ્યામાં ઉપસ્થિત રહ્યા હતા. જેમાં પ્રમુખ બીપીનભાઈ જેઠવા, મંત્રી રસિકભાઈ ઝાલા, ખજાનચી સુરેશભાઈ ચૌહાણ, ઉપપ્રમુખ ચંદ્રેશભાઇ ચૌહાણ, ઉપપ્રમુખ દિનેશભાઈ ચૌહાણ, ટ્રસ્ટી લાલજીભાઈ ગોહેલ તેમજ ટ્રસ્ટી દિવ્યેશભાઈ પરમારે હાજર રહી વ્યવસ્થા સંભાળી હતી. આ ઉપરાંત, સમાજના મુખ્ય દાતાઓ અને અગ્રણીઓ જેવા કે હસમુખભાઈ પરમાર, અમિતભાઈ પરમાર, નયનભાઈ ચાવડા, રાજેશભાઈ ચાવડા, કિરણભાઈ ચાવડા, પ્રિયકાન્તભાઈ ચાવડા (સીતારામ ધુન મંડળ), જગદીશભાઈ વાળા, જીગ્નેશભાઈ ચાવડા (નામલ ધામ ગ્રુપ), જય લાલાબાપા સેવા સમિતિના પ્રમુખ યોગેશભાઈ જાદવ, યુવા સેનાના ચેરમેન નિલેશભાઈ વાઘેલા, તેજસભાઈ ચૌહાણ, ગુજરાત મિરર ન્યૂઝના ક્રાઇમ જર્નાલિસ્ટ ચિરાગ ચાવડા અને એડવોકેટ પિયુષભાઈ ઝાલા વિશેષ રૂપે ઉપસ્થિત રહ્યા હતા. આ તમામ મહાનુભાવોના હસ્તે લાભાર્થી બહેનોનું આદરપૂર્વક સન્માન કરીને સહાયની રકમ સુપ્રત કરવામાં આવી હતી. કાર્યક્રમના અંતમાં તમામ વડીલ લાભાર્થી બહેનો અને હાજર રહેલા જ્ઞાતિના તમામ આગેવાનો તથા અગ્રણીઓએ એકસાથે બેસીને સામૂહિક પ્રીતિભોજન લીધું હતું, જેનાથી સમગ્ર વાતાવરણ કૌટુંબિક સ્નેહ અને સમરસતાથી છલકાઈ ઉઠ્યું હતું.
