રાજુલાના મોટા આગરીયા ગામે પે સેન્ટર શાળામાં પોક્સો એક્ટ અંતર્ગત જાગૃતિ કાર્યક્રમ યોજાયો
સરળ શબ્દોમાં પોક્સો એક્ટ-૨૦૧૨ અંગે કાનૂની માર્ગદર્શન અપાયું
અગ્ર ગુજરાત, રાજુલા
અમરેલી જિલ્લા મહિલા અને બાળ અધિકારીની કચેરીના માર્ગદર્શન હેઠળ રાજુલા તાલુકાના મોટા આગરીયા ગામની સરકારી પે સેન્ટર શાળા ખાતે ‘બેટી બચાઓ, બેટી પઢાઓ’ યોજના અંતર્ગત ‘પોક્સો એક્ટ-૨૦૧૨ વિષય પર એક વિશેષ જાગૃતિકરણ કાર્યક્રમનું ભવ્ય આયોજન કરવામાં આવ્યું હતું. સૌપ્રથમ પધારેલા મહેમાનોના હસ્તે દીપ પ્રાગટ્ય કરી કાર્યક્રમને ખુલ્લો મુકવામાં આવ્યો હતો. ત્યારબાદ મહેમાનોનું પુષ્પગુચ્છ આપી સ્વાગત કરાયું. જિલ્લા મહિલા અને બાળ અધિકારી શેલેષભાઇ કણઝરીયાએ ઉપસ્થિત રહીને ‘બેટી બચાઓ, બેટી પઢાઓ’ અભિયાનના ઉદ્દેશ્યો અને સમાજમાં દીકરીઓના શિક્ષણ તેમજ સુરક્ષાના મહત્વ વિશે વિસ્તૃત અને ઉપયોગી માહિતી પૂરી પાડી હતી. આ કાર્યક્રમમાં રાજુલાના સીનીયર એડવોકેટ હેમુભાઇ રાઠોડ દ્વારા બાળકોની સુરક્ષા માટેના કડક કાયદા પોક્સો એક્ટ-૨૦૧૨ વિશે તેમજ કાયદાકીય માહિતીઓ ખૂબજ સરળ અને પ્રભાવશાળી શબ્દોમાં ઉપસ્થિત સૌને માહિતગાર કરવામાં આવ્યા હતાં. આ તકે શાળાની ધોરણ-૮ માં પ્રથમ અને દ્વિતીય સ્થાન મેળવનારી તેજસ્વી વિદ્યાર્થીનીઓને શૈક્ષણિક કીટનું વિતરણ કરીને સન્માનિત કરવામાં આવી હતી. આ જાગૃતિ કાર્યક્રમમાં મોટા આગરીયા ગામના સરપંચ- ઉપસરપંચ, આગેવાનો, સ્ટાફગણ, વાલીઓ તેમજ મોટી સંખ્યામાં વિદ્યાર્થીઓ ઉપસ્થિત રહ્યા હતાં.
