વેરાવળના ડામોર ગામમાં મગરના બચ્ચાઓ રસ્તા પર આવી ચડતા ભય
વન્ય પશુઓના ત્રાસ બાદ વધુ એક જોખમ ઉભુ થતાં સ્થાનિકોમાં ચિંતા
અગ્ર ગુજરાત, વેરાવળ
ગીર સોમનાથ જિલ્લાના વેરાવળ તાલુકાના ડાભોર ગામમાં છેલ્લા 3 દિવસથી મગરના બચ્ચાં જાહેર માર્ગો પર આવી ચડતાં સ્થાનિકોમાં ચિંતા અને ભયનો માહોલ સર્જાયો છે. ગામની ભાગોળેથી પસાર થતી દેવકા નદીમાં મોટા પ્રમાણમાં મગરોનો વસવાટ છે. ચોમાસાની સિઝન અથવા અન્ય કારણોસર નદીમાંથી બહાર નીકળેલા મગરના નાના બચ્ચાં ગ્રામ પંચાયત કચેરી તેમજ સરકારી શાળાના મુખ્ય માર્ગ સુધી પહોંચી રહ્યા છે.
જાહેર રોડ પર વન્યજીવ આવી જતાં અકસ્માત થવાની અથવા અન્ય કોઈ અઘટિત ઘટના સર્જાવાની આશંકા સેવાઈ રહી છે. જોકે, ગામના જાગૃત યુવાનોએ માનવતા દાખવીને આ બચ્ચાંને કોઈ પણ નુકસાન પહોંચાડ્યા વિના સુરક્ષિત રીતે પકડી ફરી દેવકા નદીના કાંઠા વિસ્તારમાં મુક્ત કર્યા છે. વારંવાર મગરના બચ્ચાં રહેણાંક વિસ્તાર તરફ આવતા હોવાથી ખાસ કરીને શાળાએ જતા બાળકો અને રાહદારીઓની સલામતી સામે પ્રશ્નાર્થ ઊભો થયો છે. સ્થાનિકોના જણાવ્યા અનુસાર, જો મગરના બચ્ચાં આટલી મોટી સંખ્યામાં બહાર આવતા હોય તો આસપાસ પુખ્ત વયના મોટા મગર હોવાની શક્યતા પણ નકારી શકાય નહીં.
સમગ્ર મામલે ગ્રામજનોએ વન વિભાગને તાત્કાલિક સ્થળ પર પહોંચી પરિસ્થિતિની સમીક્ષા કરવા અને મગરોને સુરક્ષિત સ્થળે સ્થળાંતરિત કરવા માંગ કરી છે. આ સાથે જ દેવકા નદી કાંઠાના વિસ્તારોમાં વન વિભાગ દ્વારા નિયમિત પેટ્રોલિંગ ગોઠવવામાં આવે તેવી રજૂઆત કરાઈ છે.
ડાભોર અને તાતીવેલા ગામમાંથી પસાર થતી દેવકા નદીમાં અનેક મગરો હોવાની વિગતો અગાઉ પણ સામે આવી ચૂકી છે. થોડા દિવસો પૂર્વે જ વન વિભાગે આ વિસ્તારમાંથી 1 મહાકાય મગરનું સફળ રેસ્ક્યૂ કર્યું હતું. હવે ફરીથી મગરના બચ્ચાં ખોરાકની શોધમાં અથવા કુદરતી પ્રક્રિયાના ભાગરૂપે બહાર આવી રહ્યા હોવાથી વન વિભાગ વહેલી તકે કોઈ નક્કર પગલાં ભરે તે જરૂરી બન્યું છે.
