રાજુલામાં હોમગાર્ડ જવાને મહિલા સાથે ગેરવર્તન કર્યાનો ગંભીર આક્ષેપ
રાત્રિના સમયે રસ્તા વચ્ચે ટ્રેક્ટર ચાલકની દાદાગીરીની રજૂઆત કરવા ગયેલી મહિલા સાથે હોમગાર્ડે કર્યું ગેરવર્તન
અગ્ર ગુજરાત, રાજુલા
રાજુલા શહેરમાં કાયદો અને વ્યવસ્થા જાળવવાની જેમની જવાબદારી છે તેવા સુરક્ષાકર્મીએ જ મહિલાઓ સાથે ઉદ્ધતાઈભર્યું વર્તન કરતા હોવાનો એક ચોંકાવનારો કિસ્સો સામે આવ્યો છે. રાજુલા પોલીસ સ્ટેશનમાં ફરજ પર હાજર એક હોમગાર્ડ જવાને રજૂઆત કરવા આવેલી જાગૃત મહિલા સાથે બેહુદું વર્તન કરી સન્માન આપવાના બદલે તુકારો કરીને હાંકી કાઢી હોવાનો ગંભીર આક્ષેપ લાગતા સ્થાનિક સ્તરે ભારે રોષ જોવા મળી રહ્યો છે. મળતી માહિતી મુજબ, રાજુલા શહેરના મેઈન બજાર રોડ પર પત્રકારત્વ સાથે સંકળાયેલા સચિનદેવ મહેતાના પત્ની માધવીબેન મહેતા ગત રાત્રિના આશરે ૧૧:૩૦ વાગ્યાની આસપાસ હવેલી ચોક ખાતે આવેલા પોતાના પિતાના ઘરેથી સસરાના ઘર તરફ જઈ રહ્યા હતા. આ દરમિયાન મેઈન બજાર રોડ પર પોલીસ સ્ટેશન નજીક શાક માર્કેટ અને મહાદેવ મોલ પાસે એક ટ્રેક્ટર રસ્તાની વચ્ચોવચ આડું પડેલું હતું. ટ્રેક્ટર એવી રીતે ઊભું રાખવામાં આવ્યું હતું કે ત્યાંથી કોઈ પગપાળા વ્યક્તિ પણ પસાર થઈ શકે તેમ નહોતી. મહિલાએ એકલા હોવા છતાં હિંમત બતાવીને ટ્રેક્ટર ચાલકને વિનંતી કરી હતી કે, ભાઈ તમારું ટ્રેક્ટર થોડું સાઈડમાં લઈ લો તો હું નીકળી જાઉં. પરંતુ ટ્રેક્ટર ચાલકે કહ્યું કે, ટ્રેક્ટર અહીંથી નહીં હટે તમારે જવું હોય તો બીજા રસ્તેથી ચાલ્યા જાવ. રાત્રિના સમયે અન્ય કોઈ વિકલ્પ ન હોવાથી મહિલાને નાછૂટકે જવાહર રોડ પરથી પસાર થવું પડ્યું હતું. આ મામલે રજૂઆત કરવા માટે મહિલા તાત્કાલિક નજીકમાં આવેલા પોલીસ સ્ટેશને પહોંચી હતી. એ સમયે સ્ટેશન પર એક હોમગાર્ડ જવાન હાજર હતો. મહિલાએ પોતાની સાથે બનેલી આપવીતી અને ટ્રેક્ટર ચાલકની દાદાગીરી અંગે હોમગાર્ડને રૂબરૂ રજૂઆત કરી હતી. પરંતુ આ જવાને મહિલાની વાત સાંભળવાના બદલે ઉદ્ધતાઈભર્યું વર્તન શરૂ કર્યું હતું. હોમગાર્ડે મહિલાને માન આપવાના બદલે ‘તુકારો’ કરીને કહ્યું તારે કોઈ ફરિયાદ હોય તો અંદર સાહેબને જઈને કહી આવ. જાગૃત મહિલા સાથે અપમાનજનક વર્તન થાય તો સામાન્ય મહિલાઓની સુરક્ષાનું શું? તેવા ગંભીર સવાલો ઉઠી રહ્યા છે. ત્યારે હોમગાર્ડ સામે તંત્ર દ્વારા કેવા પગલાં લેવાય છે તે જોવું રહ્યું.
