વિંછીયા પંથકમાં ભડકાઉ વિડીયો વાયરલ કરનાર યુટ્યુબર સામે પોલીસની કાર્યવાહી
કોળી-ભરવાડ સમાજ વચ્ચે વૈમન્યસ્ય ફેલાવવાનો પ્રયાસ; આરોપી હરજી બાવળિયા સકંજામાં, ગુનો નોંધાયો
અગ્ર ગુજરાત, રાજકોટ
રાજકોટ જિલ્લાના વિંછીયા પંથકમાં સોશિયલ મીડિયા મારફતે બે સમાજ વચ્ચે તણાવ ઉભો કરવાનો પ્રયાસ કરનાર યુટ્યુબર સામે પોલીસ તંત્રે કડક પગલાં લીધા છે. ભડકાઉ અને ઉશ્કેરણીજનક વિડીયો વાયરલ થતાં મામલો ગંભીર બનતા પોલીસે તાત્કાલિક કાર્યવાહી કરીને આરોપી વિરુદ્ધ ગુનો દાખલ કરી તેને સકંજામાં લીધો છે.
પોલીસ સૂત્રોના જણાવ્યા મુજબ, વિંછીયા તાલુકાના દેવધરી ગામનો રહેવાસી હરજી બાવળિયા નામનો વ્યક્તિ વોટ્સએપ ગ્રુપ અને યુટ્યુબ ચેનલ મારફતે વિડીયો અપલોડ કરી રહ્યો હતો. આ વિડીયોમાં તેણે જસદણ-વિંછીયા વિસ્તારમાં રહેતા કોળી સમાજ અંગે અપમાનજનક અને ઉશ્કેરણીજનક નિવેદનો કર્યા હતા. સાથે જ જસદણના શિવરાજપુર વિસ્તારમાં થયેલા એક હત્યાકાંડમાં ભરવાડ સમાજના વ્યક્તિનો હાથ હોવાનું જણાવી બંને સમાજ વચ્ચે અવિશ્વાસ અને વૈમન્યસ્ય ફેલાવવાનો પ્રયાસ કર્યો હતો.
આ વિડીયો સોશિયલ મીડિયા પર ઝડપથી વાયરલ થતાં સ્થાનિક સ્તરે તણાવની સ્થિતિ ઊભી થવાની શક્યતા ઊભી થઈ હતી. મામલાની ગંભીરતા ધ્યાનમાં રાખીને પોલીસે તાત્કાલિક એક્શન લીધું હતું. પોલીસને જાણ થતાં જ સંબંધિત વિડીયો અને તેની અસરનું મૂલ્યાંકન કરવામાં આવ્યું અને આરોપી હરજી બાવળિયા સામે કાયદેસર ગુનો નોંધવામાં આવ્યો.
પોલીસે આરોપીને ઝડપી લઈને સઘન પૂછપરછ હાથ ધરી છે. પ્રાથમિક તપાસમાં સામે આવ્યું છે કે આરોપી દ્વારા જાણપૂર્વક ઉશ્કેરણીજનક ભાષાનો ઉપયોગ કરીને બંને સમાજ વચ્ચે વિખવાદ ઉભો કરવાનો પ્રયાસ કરવામાં આવ્યો હતો. પોલીસ દ્વારા તેની ડિજિટલ પ્રવૃત્તિઓની પણ તપાસ કરવામાં આવી રહી છે, જેમાં અન્ય પ્લેટફોર્મ પર પણ આવા કન્ટેન્ટ અપલોડ થયા છે કે નહીં તે બાબત ચકાસવામાં આવી રહી છે.
પોલીસ તંત્રએ આ ઘટનાને ગંભીરતાથી લેતાં જણાવ્યું છે કે, સોશિયલ મીડિયા પર કોઈપણ સમાજ, જાતિ અથવા ધર્મ વિરુદ્ધ અપમાનજનક કે ઉશ્કેરણીજનક ટિપ્પણીઓ કરવી કાયદેસર ગુનો છે. આવી હરકતો સમાજમાં અશાંતિ ફેલાવી શકે છે અને કાયદો-વ્યવસ્થાને ખલેલ પહોંચાડી શકે છે.
આ સાથે જ પોલીસે નાગરિકોને અપીલ કરી છે કે તેઓ સોશિયલ મીડિયા પર કોઈપણ અપ્રમાણિત અથવા ઉશ્કેરણીજનક સામગ્રી શેર કરતા પહેલા તેની સાચી માહિતી તપાસે અને આવી પ્રવૃત્તિઓથી દૂર રહે. જો કોઈ વ્યક્તિ આવા કન્ટેન્ટ બનાવે કે પ્રસારિત કરે તો તેની જાણ તાત્કાલિક પોલીસને કરવાની પણ વિનંતી કરવામાં આવી છે. વિંછીયા પંથકમાં સમયસર પોલીસ દ્વારા કરવામાં આવેલી કાર્યવાહીથી સંભવિત તણાવ ટળી ગયો હોવાનું માનવામાં આવી રહ્યું છે.
