ST નિગમમાં રોજગારીનો મોટો વરસાદ : ૯ હજારથી વધુ જગ્યાઓ પર ભરતીનો નિર્ણય
નિગમ દ્વારા ૨૨૬૩ ડ્રાઈવર, ૪૪૮૫ કંડક્ટર અને ૨૩૪૪ હેલ્પરની નવી ભરતી કરાશે ; કોરોના વોરિયર્સના પરિવારોને પણ સહાય
અગ્ર ગુજરાત, અમદાવાદ
અમદાવાદમાં ગુજરાત રાજ્ય માર્ગ વ્યવહાર નિગમ એટલે કે GSRTC દ્વારા એક મહત્વપૂર્ણ અને રાહતભર્યો નિર્ણય લેવામાં આવ્યો છે. રાજ્યમાં જાહેર પરિવહન વ્યવસ્થા વધુ મજબૂત બને અને યુવાઓને રોજગારીની નવી તક મળે તે હેતુથી એસટી નિગમમાં મોટા પાયે ભરતી કરવાની જાહેરાત કરવામાં આવી છે. આગામી સમયમાં કુલ ૯૦૯૨ જગ્યાઓ ભરવાની પ્રક્રિયા હાથ ધરાશે, જેમાં ડ્રાઈવર, કંડક્ટર અને હેલ્પર જેવી વિવિધ પોસ્ટનો સમાવેશ થાય છે.
મળતી માહિતી મુજબ, નિગમ દ્વારા ૨૨૬૩ ડ્રાઈવર, ૪૪૮૫ કંડક્ટર અને ૨૩૪૪ હેલ્પરની નવી જગ્યાઓ ઊભી કરવાનો નિર્ણય લેવામાં આવ્યો છે. લાંબા સમયથી ભરતી ન થતાં અનેક ડેપોમાં સ્ટાફની અછત અનુભવાઈ રહી હતી, જેના કારણે બસ વ્યવસ્થા અને મુસાફરોને મળતી સેવાઓ પર અસર પડી રહી હતી. હવે નવી ભરતી થવાથી એસટીની કામગીરી વધુ સુચારૂ બને તેવી આશા વ્યક્ત કરવામાં આવી રહી છે.
તાજેતરમાં યોજાયેલી GSRTCની ૬૬૭મી બોર્ડ બેઠકમાં મુસાફરોની સુવિધા, કર્મચારીઓના હિત અને નિગમની કાર્યક્ષમતા વધારવા સંબંધિત અનેક મહત્વપૂર્ણ નિર્ણયો લેવામાં આવ્યા હતા. બેઠકમાં ખાસ કરીને ડ્રાઈવર અને કંડક્ટરની ખાલી જગ્યાઓને કારણે ઉભી થયેલી સમસ્યાઓ અંગે ચર્ચા કરવામાં આવી હતી. જેના આધારે ભરતી પ્રક્રિયા ઝડપી બને તે માટે નિયમોમાં પણ જરૂરી સુધારા કરવાનો નિર્ણય લેવામાં આવ્યો છે. રાજ્ય સરકાર અને નિગમનું માનવું છે કે નવી ભરતી થવાથી માત્ર બેરોજગાર યુવાઓને નોકરી મળશે એટલું જ નહીં, પરંતુ ગ્રામ્ય અને શહેરી વિસ્તારોમાં એસટી બસોની સેવા વધુ અસરકારક રીતે ઉપલબ્ધ બની શકશે. ખાસ કરીને લાંબા રૂટ પર બસો ચલાવવામાં સ્ટાફની અછતને કારણે થતી મુશ્કેલીઓમાં રાહત મળશે.
આ બેઠકમાં કર્મચારીઓના હિતને ધ્યાનમાં રાખીને અન્ય મહત્વપૂર્ણ નિર્ણય પણ લેવામાં આવ્યો હતો. કોરોનાકાળ દરમિયાન ફરજ બજાવતા અને બાદમાં કોરોનાના કારણે મૃત્યુ પામેલા એસટી નિગમના ૧૧૮ અધિકારી-કર્મચારીઓને કોરોના વોરિયર્સ તરીકે માન્યતા આપવાનો નિર્ણય લેવામાં આવ્યો છે. સાથે જ તેમના પરિવારજનોને પ્રતિ કર્મચારી ૨૫ લાખ રૂપિયાનું વળતર ચૂકવવામાં આવશે.
ઉલ્લેખનીય છે કે કોરોનાની મહામારી દરમિયાન એસટી નિગમ દ્વારા અનેક ઈમર્જન્સી સેવાઓ સંચાલિત કરવામાં આવી હતી. તે સમયે ઘણા કર્મચારીઓએ પોતાની જાનની પરવા કર્યા વિના ફરજ બજાવી હતી. પરંતુ મૃત્યુ પામેલા કર્મચારીઓના પરિવારને વળતર અંગેનો પ્રશ્ન લાંબા સમયથી અટવાયેલો હતો. હવે આ નિર્ણયથી પરિવારોને મોટી રાહત મળશે તેવી લાગણી વ્યક્ત કરવામાં આવી રહી છે.
એસટી નિગમની સેવાઓને ભવિષ્યમાં વધુ મજબૂત બનાવવા માટે રાજ્યના નાયબ મુખ્યમંત્રી હર્ષ સંઘવી તથા નિગમના યુનિયન પ્રતિનિધિઓ વચ્ચે પણ મહત્વપૂર્ણ બેઠક યોજાઈ હતી. બેઠકમાં મુસાફરોને વધુ સારી સુવિધા કેવી રીતે મળી શકે અને નિગમની આવક તથા કાર્યક્ષમતા કેવી રીતે વધારી શકાય તે મુદ્દાઓ પર વિસ્તૃત ચર્ચા કરવામાં આવી હતી. ડિજિટલ ટેક્નોલોજી તરફ વધતા વલણને ધ્યાનમાં રાખીને એસટી નિગમ દ્વારા ડિજિટલ પેમેન્ટ વ્યવસ્થાને પણ વધુ પ્રોત્સાહન આપવામાં આવી રહ્યું છે. હાલ મુસાફરો દ્વારા ચૂકવાતા ભાડામાંથી લગભગ ૩૯ ટકા જેટલી આવક કેશલેસ અને ડિજિટલ પેમેન્ટ માધ્યમથી મળી રહી હોવાનું જણાવાયું છે. જેના કારણે પારદર્શિતા વધવા ઉપરાંત રોકડ વ્યવહારની મુશ્કેલીઓમાં પણ ઘટાડો થયો છે.
નિગમના અધિકારીઓનું કહેવું છે કે આગામી સમયમાં મુસાફરોને વધુ આરામદાયક અને સમયસર સેવા મળે તે માટે ટેક્નોલોજી આધારિત વ્યવસ્થાઓમાં પણ વધારો કરવામાં આવશે. નવી ભરતી, આધુનિકીકરણ અને ડિજિટલ સેવાઓના કારણે એસટી નિગમને વધુ મજબૂત અને કાર્યક્ષમ બનાવવાનો પ્રયાસ થઈ રહ્યો છે.
રાજ્યમાં રોજગારીની તકો વધારવા સાથે જાહેર પરિવહન વ્યવસ્થાને મજબૂત બનાવતા આ નિર્ણયને યુવાઓ અને એસટી કર્મચારીઓ બંને તરફથી સકારાત્મક પ્રતિસાદ મળી રહ્યો છે. હવે ભરતી પ્રક્રિયા ક્યારે શરૂ થશે અને તેની જાહેરાત ક્યારે બહાર પડશે તેની રાહ હજારો યુવાનો જોઈ રહ્યા છે.
