પતિ-પુત્રને મારી નાખીશ’ કહી રિક્ષા ચાલકે ચાર વર્ષ સુધી પરિણીતા પર આચર્યું દુષ્કર્મ
ધમકી અને ભય બતાવી અવારનવાર હવસનો શિકાર બનાવતો, આખરે પરિણીતાએ મૌન તોડી પતિને હકીકત જણાવતાં પ્ર.નગર પોલીસે આરોપીને ઝડપી લીધો
અગ્ર ગુજરાત, રાજકોટ
રાજકોટના રેલનગર વિસ્તારમાં રહેતી એક પરિણીત મહિલાએ ચાર વર્ષ સુધી સહન કરેલા શારીરિક અને માનસિક ત્રાસનો અંત લાવતાં પોતાના પડોશમાં રહેતા રિક્ષાચાલક વિરુદ્ધ પ્ર.નગર પોલીસ સ્ટેશનમાં ગંભીર ફરિયાદ નોંધાવી છે. મહિલાના આક્ષેપ મુજબ, આરોપી છેલ્લા ચાર વર્ષથી પતિ અને પુત્રને જાનથી મારી નાખવાની ધમકી આપી તેની સાથે અવારનવાર બળજબરીપૂર્વક દુષ્કર્મ કરતો રહ્યો હતો. ફરિયાદ મળતાં પોલીસે તાત્કાલિક કાર્યવાહી કરીને આરોપી અમિત ઘાવરીને ઝડપી લીધો છે.
પોલીસમાં નોંધાયેલી ફરિયાદ મુજબ, પીડિતા પોતાના પરિવાર સાથે રેલનગર વિસ્તારમાં રહે છે, જ્યારે તેનો પતિ સિવિલ હોસ્પિટલમાં સિક્યુરિટી ગાર્ડ તરીકે ફરજ બજાવે છે. ચાર વર્ષ પહેલાં પડોશમાં રહેતા અમિત ઘાવરી સાથે સામાન્ય ઓળખાણ થઈ હતી. શરૂઆતમાં પાડોશી તરીકે વાતચીત શરૂ કરનાર આરોપીએ બાદમાં મહિલાનો મોબાઇલ નંબર મેળવી સતત સંપર્કમાં રહેવાનો પ્રયાસ કર્યો હતો. આરોપી મહિલાના પતિના નોકરીના સમય અને ઘરમાં મહિલાની એકલતાનો અંદાજ રાખતો હતો. એક પ્રસંગે પતિ ફરજ પર ગયા બાદ મહિલાના ઘરમાં ઘૂસી જઈ તેની મરજી વિરુદ્ધ બળજબરીપૂર્વક શારીરિક સંબંધ બાંધ્યાનો આરોપ છે. ઘટનાના વિરોધમાં મહિલા કોઈને જાણ ન કરે તે માટે આરોપીએ પતિ અને પુત્રની હત્યા કરી નાખવાની ધમકી આપી હતી.
પરિવારની સુરક્ષાની ચિંતામાં મહિલાએ મૌન ધારણ કર્યું હતું. આ જ મજબૂરીનો લાભ ઉઠાવી આરોપી વારંવાર ધમકી આપીને ઘરે આવતો અને દુષ્કર્મ આચરતો રહ્યો હોવાનું ફરિયાદમાં જણાવાયું છે. આ દરમિયાન પીડિતાને સતત માનસિક દબાણ અને ભયના માહોલમાં જીવવું પડ્યું હતું.
સમય જતાં આરોપીનો ત્રાસ વધી જતાં મહિલાની સહનશક્તિનો અંત આવ્યો હતો. આખરે તેણે પોતાના પતિને સમગ્ર હકીકત જણાવી હતી. પત્ની પાસેથી છેલ્લા ચાર વર્ષથી ચાલી રહેલા અત્યાચારની વાત સાંભળીને પતિ પણ સ્તબ્ધ થઈ ગયો હતો. ત્યારબાદ બંનેએ હિંમત દાખવી પ્ર.નગર પોલીસ સ્ટેશનનો સંપર્ક કર્યો હતો. પોલીસે મહિલાની ફરિયાદના આધારે આરોપી અમિત ઘાવરી વિરુદ્ધ દુષ્કર્મ, જાનથી મારી નાખવાની ધમકી તથા અન્ય સંબંધિત કલમો હેઠળ ગુનો નોંધ્યો હતો. ફરિયાદ નોંધાતાં જ પીએસઆઇ ડી. એમ. ગજેરા અને તેમની ટીમે ઝડપી કાર્યવાહી હાથ ધરી આરોપીને સકંજામાં લઈ લીધો હતો.
પ્રાથમિક તપાસ દરમિયાન એવી માહિતી પણ સામે આવી છે કે આરોપી પરિણીત છે અને તેના લગ્નને અંદાજે પાંચ વર્ષ થયા છે. હાલ પોલીસ સમગ્ર મામલે વધુ તપાસ કરી રહી છે. ફરિયાદમાં થયેલા આક્ષેપોની દિશામાં પુરાવા એકત્ર કરવાની તેમજ અન્ય જરૂરી કાર્યવાહી હાથ ધરવામાં આવી રહી છે. આ ઘટના ફરી એકવાર દર્શાવે છે કે ધમકી અને ભયના કારણે અનેક પીડિતાઓ લાંબા સમય સુધી મૌન રહેતી હોય છે. જોકે સમયસર હિંમત કરીને કાયદાનો આશરો લેવાથી આવા ગંભીર ગુનાઓ સામે કાર્યવાહી શક્ય બને છે.
