જિલ્લા પંચાયતમાં આપના કાર્યકરો સાયકલ પર પહોંચ્યા, ભાજપના તાયફાઓનો વિરોધ
વડાપ્રધાનની અપીલનો ભાજપના ૮ કાર્યકરોએ છેદ ઉડાડયાના આક્ષેપ
અગ્ર ગુજરાત, રાજકોટ
રાજકોટ જિલ્લાના ગોંડલ તાલુકાની મોવિયા જિલ્લા પંચાયત સીટ પરથી આમ આદમી પાર્ટીના ઉમેદવાર તરીકે જીત હાંસલ કરનાર આરતીબેન નરેશભાઈ જેતાણી ને જિલ્લા પંચાયત ખાતે વિપક્ષ નેતા તરીકે રજૂ કરવા માટે જિલ્લા કાર્યકરો મોટી સંખ્યામાં ઉપસ્થિત રહ્યા હતા.
આ પ્રસંગે આમ આદમી પાર્ટી દ્વારા ગુજરાતની જનતાને સ્પષ્ટ સંદેશ આપવામાં આવ્યો કે દેશના પ્રધાનમંત્રી નરેન્દ્ર મોદી દેશવાસીઓને પેટ્રોલ-ડીઝલની બચત કરવા માટે અપીલ કરે છે, જ્યારે બીજી બાજુ ભાજપના નેતાઓ મોટા ગાડીઓના કાફલાઓ સાથે પેટ્રોલ-ડીઝલનો વ્યાપક બગાડ કરી રહ્યા છે. આ ભાજપની કહેવાતી નીતિ અને વર્તનમાં સ્પષ્ટ વિરોધાભાસ દર્શાવે છે.
આ કાર્યક્રમ દરમિયાન આરતીબેન જેતાણી જિલ્લા પંચાયત ખાતે સાયકલ પર આવી પહોંચ્યા હતા, જે દ્વારા સામાન્ય જનતાને સંદેશ આપવામાં આવ્યો કે સરળતા અને બચતનો માર્ગ અપનાવવો આજના સમયની જરૂરિયાત છે.
આ કાર્યક્રમમાં આમ આદમી પાર્ટીના પ્રદેશ નેતા જીગીશા પટેલ તથા રાજકોટ જિલ્લા પ્રમુખ તેજસ ગાજીપરા ખાસ ઉપસ્થિત રહ્યા હતા. તેજસ ગાજીપરાએ કાર્યકરોને માર્ગદર્શન આપી સંગઠનને વધુ મજબૂત બનાવવાનો સંદેશ આપ્યો હતો.
