કાલાવડ રોડ પરથી 54.73 ગ્રામ મેફેડ્રોન સાથે ગોકુલનગરનો શખ્સ ઝડપાયો
SOG એ 2.59 લાખનો મુદ્દામાલ કબજે કર્યો, અગાઉ ચોરી સહિતના બે ગુનામાં ઝડપાઈ ચૂક્યો હોવાનો ખુલાસો
અગ્ર ગુજરાત, રાજકોટ
રાજકોટ શહેરમાં યુવાધનને નશાના રવાડે ચડતું અટકાવવા માટે ચાલી રહેલા “SAY NO TO DRUGS” અભિયાન અંતર્ગત રાજકોટ શહેર SOGએ કાલાવાડ રોડ પર કાર્યવાહી કરી મેફેડ્રોનના જથ્થા સાથે એક શખ્સને ઝડપી પાડ્યો છે. પોલીસે આરોપીના કબજામાંથી 54.730 ગ્રામ મેફેડ્રોન, મોબાઇલ ફોન, મોટરસાઇકલ, રોકડ સહિત કુલ રૂ.2,59,510નો મુદ્દામાલ કબજે કર્યો છે.
પોલીસ કમિશનર બ્રજેશકુમાર ઝા તથા ઉચ્ચ પોલીસ અધિકારીઓની સૂચનાથી SOG PI એન.બી. ચૌધરીની રાહબરી હેઠળ PSI વી.વી. ધ્રાંગુના માર્ગદર્શન હેઠળ ટીમ નશીલા પદાર્થોના વેચાણ અને હેરાફેરી અંગે બાતમીના આધારે વોચમાં હતી. દરમિયાન તા.19 ઓગસ્ટે SOGના કર્મચારીઓને બાતમી મળી હતી કે, અગાઉ ચોરીના ગુનામાં પકડાયેલ તોશીફભાઈ આરીફભાઈ તુરીયા મોટરસાઇકલ નં. GJ-03-PL-5916 લઈને કાલાવાડ રોડ પર રામેશ્વર પાર્ટી પ્લોટના ખૂણા પાસે આવવાનો છે અને તેની પાસે MD ડ્રગ્સનો જથ્થો છે.
બાતમીના આધારે પોલીસ ટીમે સ્થળ પર પહોંચી વોચ ગોઠવી હતી. બાતમી મુજબનો શખ્સ મોટરસાઇકલ સાથે ત્યાં પહોંચતા પોલીસે તેને કોર્ડન કરી ઝડપી લીધો હતો. અંગજડતી દરમિયાન તેના કબજામાંથી મેફેડ્રોનનો જથ્થો મળી આવતા પોલીસે NDPS એક્ટ હેઠળ કાર્યવાહી હાથ ધરી હતી.
પોલીસે આરોપી પાસેથી 54.730 ગ્રામ મેફેડ્રોનનો જથ્થો, અંદાજે રૂ.1,64,190ની કિંમતનો, તેમજ રૂ.80,000ની કિંમતની હોન્ડા સાઇન મોટરસાઇકલ, વિવો કંપનીનો ટચસ્ક્રીન મોબાઇલ ફોન, રૂ.320 રોકડા અને મેફેડ્રોનના પેકિંગ માટેની પ્લાસ્ટિકની નાની વેક્યુમ પેક કોથળીઓ મળી કુલ રૂ.2,59,510નો મુદ્દામાલ કબજે કર્યો છે.
ઝડપાયેલ આરોપીની ઓળખ તોશીફભાઈ સ/ઓ આરીફભાઈ તુરીયા (ઉ.વ.26), વ્યવસાયે ડ્રાઇવિંગ, રહે. ગોકુલનગર શેરી નં.3, કોઠારિયા મેઇન રોડ, નિઝામબાપુના મકાનમાં ભાડેથી, રાજકોટ તરીકે થઈ છે. પોલીસ તપાસમાં આરોપી વિરુદ્ધ અગાઉ રાજકોટના એ ડિવિઝન પોલીસ સ્ટેશનમાં વર્ષ 2022માં IPC કલમ 379 હેઠળ ચોરીનો તેમજ વર્ષ 2021માં IPC કલમ 269 સહિતની કલમો હેઠળ ગુનો નોંધાયેલો હોવાનું બહાર આવ્યું છે.
આ મામલે રાજકોટ તાલુકા પોલીસ સ્ટેશનમાં NDPS એક્ટ હેઠળ ગુનો નોંધી આગળની કાયદેસરની કાર્યવાહી હાથ ધરવામાં આવી છે. મેફેડ્રોનનો જથ્થો ક્યાંથી મેળવ્યો હતો અને કોને પહોંચાડવાનો હતો તે સહિતની વિગતો મેળવવા પોલીસ દ્વારા વધુ તપાસ હાથ ધરવામાં આવી છે. પ્રાથમિક પરીક્ષણ અંગે FSL અધિકારી કે.એમ. તાવીયાએ અભિપ્રાય આપ્યો હોવાનું પોલીસે જણાવ્યું છે. SOGની કાર્યવાહીમાં PI એન.બી. ચૌધરી, PSI વી.વી. ધ્રાંગુ સહિતના અધિકારીઓ અને કર્મચારીઓ જોડાયા હતા.
