નવા શૈક્ષણિક વર્ષથી વાલીઓ પર તોળાતો વધુ એક વધારો, સ્કૂલ વાનના ભાડાનો બોઝ
પેટ્રોલ-ડિઝલ અને CNGના ભાવમાં સતત વધારો થતા એસો. દ્વારા સ્કુલ વર્ધીમાં ભાડુ વધારવા ચાલતી તૈયારીઓ : વેકેશન બાદ નિર્ણય
અગ્ર ગુજરાત, રાજકોટ
રાજકોટ સહિત રાજયભરમાં નવા શૈક્ષણિક સત્રની શરૂઆત સાથે જ વાલીઓ પર વધુ એક આર્થિક બોજો આવી શકે છે. શહેરમાં સ્કૂલ વાન અને રિક્ષાના ભાડામાં વધારો કરવાની તૈયારી શરૂ થઈ છે. CNGના સતત વધતા ભાવોને કારણે સ્કૂલ વર્ધી એસોસિએશન દ્વારા ભાડા વધારાની માંગ ઉઠાવવામાં આવી છે.
મળતી માહિતી મુજબ, જૂન મહિનાની શરૂઆતમાં સ્કૂલ વર્ધી એસોસિએશનની મહત્વપૂર્ણ બેઠક યોજાનાર છે. આ બેઠકમાં હાલના ભાડા દરોમાં વધારો કરવો કે નહીં તે અંગે અંતિમ નિર્ણય લેવામાં આવશે. એસોસિએશનના આગેવાનોનું કહેવું છે કે 2024ની સરખામણીએ CNGના ભાવમાં પ્રતિ કિલો આશરે 10 રૂપિયાનો વધારો થયો છે, જેના કારણે હાલના દરે સ્કૂલ વર્ધી ચલાવવી મુશ્કેલ બની રહી છે.
હાલમાં સ્કૂલ વાન માટે પ્રતિ કિલોમીટર મહિને અંદાજે 1200 રૂપિયા ફી લેવામાં આવે છે. જો વિદ્યાર્થીનું ઘર એક કિલોમીટરથી વધુ અંતરે હોય તો પ્રતિ કિલોમીટર વધારાના 200 રૂપિયા લેવામાં આવે છે. બીજી તરફ, સ્કૂલ રિક્ષાનું મિનિમમ ભાડું 750 રૂપિયા છે અને તેમાં પણ પ્રતિ કિલોમીટર 100 રૂપિયા વધારાનો ચાર્જ વસૂલવામાં આવે છે.
સ્કૂલ વર્ધી એસોસિએશન દ્વારા છેલ્લે વર્ષ 2024માં ભાડામાં વધારો કરવામાં આવ્યો હતો. હવે ફરી એકવાર વધતા ઇંધણ ખર્ચ અને મેન્ટેનન્સના વધતા બોજાને ધ્યાનમાં રાખીને ભાડા સુધારાની ચર્ચા તેજ બની છે. જો બેઠકમાં ભાવ વધારાને મંજૂરી મળશે તો નવા શૈક્ષણિક સત્રથી વાલીઓને વધુ ખર્ચ સહન કરવો પડી શકે છે.
ટેક્સી ભાડામાં કિલોમીટર દીઠ રૂ.૩નો વધારો, રાજકોટમાં ૪૨ હજાર ઓટો રીક્ષા
પેટ્રોલિયમ પેદાશોના ભાવવધારાથી હવે ટેક્સીનો ધંધો પણ બાકાત રહ્યો નથી. નાના ટેક્સી ઓપરેટરોએ કિલોમીટર દીઠ 2થી 3 રૂપિયાનો ભાવવધારો કરી નાખ્યો છે, જ્યારે મોટા ઓપરેટરો હજુ ભાવવધારા બાબતે અવઢવમાં છે. ટેક્સી ઓપરેટરે જણાવ્યું કે આ વખતે આમ પણ ટેક્સીના ધંધામાં મંદી છે. છેલ્લા 23 વર્ષમાં આ પ્રકારની મંદી પહેલી વખત જોઇ છે. તેમાં પણ ડીઝલ, સીએનજીના ભાવવધારાએ અમારા ધંધાની કમર તોડી નાખી છે.
અમારે પણ હવે નાછૂટકે ભાડા વધારવા પડે તેમ છે. પરંતુ જો તેવું કરવા જઇએ તો ગ્રાહકો ગુમાવવાનો ડર લાગે છે એટલે હાલ અમે ભાડા વધાર્યા નથી. પરંતુ હાલમાં જે સ્થિતિ છે તે જોતાં ટૂંક સમયમાં ભાડા વધારવા જ પડશે તેવું જણાય છે. કેન્દ્ર સરકાર એક ઝાટકે પેટ્રોલિયમ પેદાશોનાં ભાવવધારાને બદલે થોડા-થોડા ભાવ વધારી રહી છે. આ પણ વધારવાના મૂડમાં છે પરંતુ કહે છે કે જો ભાડા વધારે તો એસટી સાથેની હરિફાઇમાં ગ્રાહકો ગુમાવવા પડે તે ડરથી ભાડા વધારી શકતા નથી. રાજકોટમાં ૪૨ હજાર ઓટો રીક્ષા છે. રિક્ષા એસોસિયેશનનાં જણાવ્યાનુસાર, અમે હજુ ભાડું વધાર્યું નથી પરંતુ જો સીએનજીનો ભાવ હજુ પણ વધશે તો અમારે પણ નાછૂટકે ભાડું વધારવું પડશે. શહરોમાં કેબના ભાડા પણ આવતા માસથી વધારી દેવાય તેવા સંકેતો મળ્યા છે. આ તમામ પાસા જોતાં પહેલેથી જ મોંઘવારીની ચક્કીમાં પીંસાતી પ્રજાને આગામી દિવસોમાં ભાવ વધારાના ડામ સતત સહન કરવા પડે તેવી સ્થિતિનું નિર્માણ થયું છે.
