ઉપલેટામાં પુરૂષોત્તમ માસે અઘેરા પરિવાર દ્વારા ભવ્ય ઉજવણી કરાઇ
આયોજકોએ પાવન માસમાં જાતે ભોજન પીરસી ધન્યતા અનુભવી
અગ્ર ગુજરાત, ઉપલેટા
પવિત્ર પુરુષોત્તમ માસ એટલે ભક્તિ, તપ અને પરમાર્થનો પાવન અવસર. આ પવિત્ર મહિનામાં કોઈ ભૂખ્યાને અન્ન આપવું એ સાક્ષાત પ્રભુ સેવા સમાન ગણાય છે. આ જ ગૌરવશાળી ભાવના સાથે, ઉપલેટાના વાલ્મીકિ નગર સ્થિત, કંટેસરિયા સમાજની બાજુમાં આવેલા રામદેવપીર મંદિર ચોક ખાતે ૧૫ જૂન ૨૦૨૬ ના રોજ એક એવો ભાવસભર નજારો જોવા મળ્યો જેણે સમગ્ર પંથકના લોકોના દિલ જીતી લીધા. નીતિનભાઈ અઘેરા અને સમગ્ર અઘેરા પરિવાર દ્વારા આયોજિત પ્રભુભોજન પ્રસાદનો આ મહોત્સવ માત્ર એક ભોજન સમારંભ નહીં, પરંતુ સાચી માનવતા અને લાગણીઓનો જીવંત દસ્તાવેજ બની રહ્યો.
અઘેરા પરિવારના સ્નેહભર્યા નિમંત્રણને માન આપીને સમગ્ર પંથકમાંથી હજારોની સંખ્યામાં ધર્મપ્રેમી જનમેદની ઉમટી પડી હતી. દરેકના ચહેરા પર પ્રસાદ અદકેરો આનંદ અને શ્રદ્ધા સ્પષ્ટ દેખાતા હતા. આ ધાર્મિક ભોજનમાં સૌથી હૃદયસ્પર્શી ક્ષણ એ હતી જ્યારે કોઈ પણ પ્રકારના ઊંચ-નીચ કે જ્ઞાતિના ભેદભાવ વિના અઢારેય વરણના લોકોએ એક જ પંગતમાં સાથે બેસીને ભોજન લીધું હતું. આ અદભુત દ્રશ્યએ સમાજમાં પરસ્પર પ્રેમ અને ભાઈચારો દ્રઢ કર્યો, જે જોઈને ત્યાં ઉપસ્થિત દરેક ભાવિકનું હૃદય આદરની લાગણીથી છલકાઈ આવ્યું હતું.
આ આયોજનની સૌથી મોટી વિશેષતા એ હતી કે નીતિનભાઈ અઘેરા, તેમના પરિવારજનો અને નિઃસ્વાર્થ સેવકોએ પોતે જ આગળ આવીને પોતાના હસ્તે લોકોને અત્યંત પ્રેમપૂર્વક ભોજન પીરસ્યું હતું. વડીલોના ચરણોમાં વંદન કરી, બાળકોને વ્હાલથી અને સૌને આગ્રહપૂર્વક ભોજન પીરસવાની આ નિઃસ્વાર્થ સેવાભાવનાએ ઉપસ્થિત હજારો લોકોના હૃદયને સ્પર્શી લીધું હતું. પોતાના હાથે પ્રભુના રૂપે આવેલા ભાવિકોને તૃપ્ત કરી અઘેરા પરિવારે પુરુષોત્તમ માસની સાચી ઉજવણી કરી પુણ્યતા અને પરમ સંતોષની અનુભૂતિ કરી હતી. આ લાગણીસભર અને દિવ્ય આયોજનની સરાહના આજે આખું ઉપલેટા કરી રહ્યું છે.
