વેપન કાર્ટેલ રેકેટમાં વધુ ત્રણ શખ્સોને 3 દેશી પિસ્ટલ સાથે ઝડપી લેતુ PCB
અત્યાર સુધી 17 આરોપીઓની ધરપકડ, કુલ 34 દેશી બનાવટના હથિયારો અને 32 જીવતા કાર્ટીસ કબજે; મુખ્ય આરોપી સકીલ મન્સુરીની પૂછપરછમાં વધુ ત્રણ નામ ખુલ્યા
અગ્ર ગુજરાત, રાજકોટ
રાજકોટ શહેર પોલીસની ક્રાઇમ પ્રિવેન્શન બ્રાન્ચ (PCB)એ ગેરકાયદેસર હથિયારોના વેચાણ કરતી “વેપન કાર્ટેલ” સામેની કાર્યવાહી વધુ તેજ બનાવી છે. અગાઉ ઝડપાયેલા મુખ્ય આરોપી સકીલ સાદિક મન્સુરીની પૂછપરછ દરમિયાન સામે આવેલા ત્રણ વધુ શખ્સોને દેશી બનાવટની એક-એક પિસ્ટલ સાથે ઝડપી પાડવામાં આવ્યા છે. આ કાર્યવાહી બાદ સમગ્ર કેસમાં ઝડપાયેલા આરોપીઓની સંખ્યા વધીને 17 થઈ છે, જ્યારે કુલ 34 દેશી બનાવટના હથિયારો અને 32 જીવતા કાર્ટીસ કબજે કરવામાં આવ્યા છે.
પોલીસ કમિશનર બ્રજેશ કુમાર ઝાના માર્ગદર્શન હેઠળ શહેરમાં કાયદો-વ્યવસ્થા જળવાઈ રહે, ગુનાખોરી પર અંકુશ આવે અને ગેરકાયદેસર હથિયારોના નેટવર્કને તોડી પાડવા માટે સતત કાર્યવાહી ચાલી રહી છે. તે અંતર્ગત PCB પોલીસ ઇન્સ્પેક્ટર એમ.આર. ગોંડલીયાના માર્ગદર્શન હેઠળની ટીમે અગાઉ વેપન કાર્ટેલના 14 આરોપીઓને ઝડપી પાડ્યા હતા. આરોપી સકીલ સાદિક મન્સુરીની વધુ પૂછપરછ દરમિયાન તેણે કિશોરભાઈ ઉર્ફે ભગત વજાભાઈ કોબીયા, વિપુલ ઉર્ફે ભોલુ ભરતભાઈ સાંકળીયા અને સાવન કેશુભાઈ ડાભીને ગેરકાયદેસર દેશી બનાવટના હથિયારો આપ્યા હોવાનું કબૂલ્યું હતું. તેના આધારે પોલીસે ત્રણેય આરોપીઓને ઝડપી પાડી તેમની પાસેથી ત્રણ દેશી બનાવટની પિસ્ટલ કબજે કરી કાયદેસરની કાર્યવાહી હાથ ધરી છે.
પકડાયેલા આરોપીઓમાં ખેરડી (ચોટીલા)ના કિશોર ઉર્ફે ભગત કોબીયા, ચોટીલાના ગોકુળઘામ સોસાયટીમાં રહેતા વિપુલ ઉર્ફે ભોલુ સાંકળીયા અને રાજકોટના માલધારી સોસાયટી વિસ્તારમાં રહેતા સાવન કેશુભાઈ ડાભીનો સમાવેશ થાય છે. ત્રણેય પાસેથી અંદાજે રૂ.30 હજારની કિંમતની ત્રણ દેશી બનાવટની પિસ્ટલ જપ્ત કરવામાં આવી છે.
પોલીસના જણાવ્યા મુજબ વેપન કાર્ટેલના મૂળ નેટવર્ક સુધી પહોંચવા અને ગેરકાયદેસર હથિયારો કોને-કોને સપ્લાય કરવામાં આવ્યા છે તેની દિશામાં તપાસ હજુ પણ ચાલુ છે. આગામી દિવસોમાં વધુ આરોપીઓ ઝડપાય તેવી શક્યતા વ્યક્ત કરવામાં આવી રહી છે.
આ સમગ્ર સફળ કામગીરી PCB પોલીસ ઇન્સ્પેક્ટર એમ.આર. ગોંડલીયા, પી.એસ.આઈ. પી.બી. ત્રાજીયા, આર.કે. જાડેજા સહિત PCBની ટીમના અધિકારીઓ અને કર્મચારીઓએ સંયુક્ત રીતે પાર પાડી હતી.
