મોટામવામાં ફિલ્ડ માર્શલ રોડ પર ગંદકીના ઢગ: તંત્ર ક્યારે જાગશે?
કોસમોસ, શાલીગ્રામ, પેન્ટાગોન અને તુલસી ઇમ્પિરિયાના રહીશોનું જીવવું હરામ; સ્પીડવેલ પાર્ટી પ્લોટ પાસે કચરાના ઢગલાથી રોગચાળાની ભીતિ
અગ્ર ગુજરાત, રાજકોટ
સ્માર્ટ સિટીના દાવાઓ કરતી રાજકોટ મહાનગરપાલિકાના પોકળ વચનોની પોલ ખોલતો કિસ્સો મોટા મવા વિસ્તારમાંથી સામે આવ્યો છે. મોટા મવા વિસ્તારમાં યસ બેંક / ICICI બેંક સામે, સ્પીડવેલ પાર્ટી પ્લોટની બાજુમાં આવેલા ફિલ્ડ માર્શલ રોડ પર ખુલ્લા મેદાનમાં ગંદકીના ગંજ ખડકાતા આખો વિસ્તાર ‘રોગચાળાનું ઘર‘ બની ગયો છે. તંત્રની કાન આડા હાથ કરવાની નીતિથી કંટાળેલા સ્થાનિક લોકોમાં ભારે રોષ અને આક્રોશ જોવા મળી રહ્યો છે.
અહીં ચારેય બાજુ કરોડોના ખર્ચે બનેલી આલીશાન હાઈ-રાઈઝ બિલ્ડિંગો આવેલી છે. કોસમોસ પ્રાઈડ ફ્લેટ્સ, શાલીગ્રામ ફ્લેટ્સ, પેન્ટાગોન ફ્લેટ્સ અને તુલસી ઇમ્પિરિયા ફ્લેટ્સ જેવા પોશ વિસ્તારના રહીશો પોતાના ઘરની બાજુમાં જ નર્કાગાર જેવી સ્થિતિ ભોગવવા મજબૂર બન્યા છે. ખુલ્લા મેદાનમાં કચરાના ઢગલા, પ્લાસ્ટિક અને અસહ્ય દુર્ગંધના કારણે મચ્છર અને ઝેરી જીવજંતુઓનો ઉપદ્રવ ચિંતાજનક હદે વધી ગયો છે.
અહીંના રહીશો પાસેથી મનપા દ્વારા તમામ પ્રકારના ટેક્સ અને વેરા પૂરેપૂરા વસૂલવામાં આવે છે, પરંતુ જ્યારે સફાઈ અને આરોગ્યની સુવિધા આપવાની વાત આવે ત્યારે મનપાનું આરોગ્ય અને ઘન કચરા વ્યવસ્થાપન વિભાગ ઘોર નિદ્રામાં પોઢેલું જોવા મળે છે. ચોમાસાની ઋતુમાં આ ગંદકીના કારણે ડેન્ગ્યુ, મલેરિયા અને ચિકનગુનિયા જેવા રોગચાળાનો વિસ્ફોટ થવાની ભીતિ સેવાઈ રહી છે.
સ્થાનિક રહીશોએ ઉગ્ર ચેતવણી આપતા જણાવ્યું છે કે, જો આ ગંદકીના ઢગલા તાત્કાલિક અસરથી હટાવીને સફાઈ કરવામાં નહીં આવે અને જવાબદારો સામે પગલાં નહીં ભરાય, તો આગામી દિવસોમાં મનપા કચેરીએ જઈને હલ્લાબોલ અને ઉગ્ર આંદોલન કરવામાં આવશે.
