ગોંડલ યાર્ડમાં મરચાની સિઝનના પ્રારંભે જ વિવાદ: કંતાનના વજનના વિરોધમાં હરાજી અટકી
પૂરેપૂરુ વજન જોખવું અથવા રૂ.૨૦ આપવા ખેડૂતોની માંગણી
અગ્ર ગુજરાત, ગોંડલ
ગોંડલ માર્કેટિંગ યાર્ડમાં આજરોજ સિઝનની મરચાની સૌપ્રથમ આવકના ‘શ્રી ગણેશ’ કરવામાં આવ્યા હતા, પરંતુ મુહૂર્તના દિવસે જ કંતાનના વજનના પ્રશ્ને વિરોધ જોવા મળ્યો હતો. યાર્ડમાં મરચાની આશરે 700 જેટલી ભારીની આવક નોંધાઈ હતી, પરંતુ વજનમાં કરાતી કાપકૂપને લઈને ખેડૂતોએ હરાજી અટકાવી દીધી હતી.
મરચાની હરાજી શરૂ થાય તે પહેલાં જ ખેડૂતો રોષે ભરાયા હતા. ખેડૂતોની મુખ્ય ફરિયાદ એ હતી કે વેપારીઓ દ્વારા મરચાની ભારીનું વજન કરતી વખતે કંતાનનો 500 ગ્રામ વજન બાદ કરવામાં આવે છે, જ્યારે વાસ્તવિકતામાં એક કંતાનની કિંમત આશરે રૂ. 120 થાય છે. આ પ્રથાના કારણે ખેડૂતોને સીધું આર્થિક નુકસાન વેઠવું પડે છે. આ બાબતે મરચા લઈને આવેલા આશરે 50 જેટલા ખેડૂતોએ એક થઈને હરાજી શરૂ થતાની સાથે જ વિરોધ નોંધાવ્યો હતો.
ખેડૂતોએ ઉગ્ર વિરોધ નોંધાવી ગોંડલ યાર્ડની ઓફિસ પાસે નીચે બેસી જઈને કામગીરી ઠપ કરી દીધી હતી. ખેડૂતોનો આ ઉગ્ર રોષ જોઈને મામલો થાળે પાડવા માટે ગોંડલ યાર્ડના ડિરેક્ટરો પ્રફુલભાઈ ટોળીયા, જીતુભાઈ જીવાણી, દલાલ મંડળના પ્રમુખ યોગેશભાઈ ક્યાડા તેમજ યાર્ડના સેક્રેટરી તરુણભાઈ પાંચાણી સહિતના અગ્રણીઓ ખેડૂતો સાથે નીચે જમીન પર બેસી ગયા હતા અને ખેડૂતોના તમામ પ્રશ્નો તેમજ રજૂઆતો ધ્યાનપૂર્વક સાંભળ્યા હતા.
ખેડૂતોએ માંગ કરી છે કે, “મરચાની ભારીનું વજન કરતી વખતે કંતાન સહિતનું પૂરેપૂરું વજન જોખવામાં આવે અથવા તો એક કંતાન દીઠ રૂ. 120નું વળતર આપવામાં આવે.” ખેડૂતોએ ચીમકી ઉચ્ચારી છે કે જ્યાં સુધી આ માંગણી નહીં સંતોષાય ત્યાં સુધી મરચાની હરાજી શરૂ થવા દેવામાં આવશે નહીં.
”અમે ઘણા વર્ષોથી ગોંડલ યાર્ડમાં મરચા વેચવા આવીએ છીએ. અમે જે મરચાની ભારી લાવીએ છીએ તેમાં વપરાતું કંતાન રૂ. 120 નું આવે છે, પરંતુ વેપારીઓ ખરીદી કરતી વખતે માત્ર 500 ગ્રામ વજન બાદ કરીને અમને સીધું નુકસાન કરે છે. અમારી એક જ માંગ છે કે કાં તો કંતાનનું વજન બાદ ન કરવું અથવા રૂ. 120 વળતર આપવું. માંગ ન સંતોષાય ત્યાં સુધી હરાજી બંધ રહેશે.”
આ અંગે ગોંડલ માર્કેટિંગ યાર્ડના સેક્રેટરી તરુણભાઈ પાંચાણીએ જણાવ્યું હતું કે, ”આજરોજ યાર્ડમાં મરચાની આવકના શ્રી ગણેશ થયા છે. મરચાની ભારીના વજનમાં કંતાન બાદ થતો હોવાથી ખેડૂતોએ ઉગ્ર વિરોધ નોંધાવી હરાજી અટકાવી છે. ખેડૂતો સાથે બેસીને તેમની રજૂઆતો સાંભળવામાં આવી છે. હવે વેપારીઓ સાથે મિટિંગ યોજીને આ પ્રશ્નનું વહેલી તકે સુખદ નિરાકરણ લાવવામાં આવશે.” તેવા તમામ પ્રયાસો હાથ ધરવામાં આવશે…
