- પાકિસ્તાનમાં આગામી સામાન્ય ચૂંટણીને લઇ અટકળો તેજ
- ઈમરાનને ઈસ્લામાબાદની કોર્ટે ભ્રષ્ટાચાર કેસમાં દોષિત ઠેરવ્યો
- PTI કાર્યકર્તાઓને તેમના ઉમેદવારી પત્ર ભરવા માટે અપાઇ સૂચના
પાકિસ્તાન જેલમાં બંધ પૂર્વ PM ઈમરાન ખાન આગામી સામાન્ય ચૂંટણીમાં 3 સીટો પરથી ચૂંટણી લડશે. ઈમરાન ખાનની PTI પાર્ટીએ બુધવારે આની જાહેરાત કરી હતી. ભૂતપૂર્વ ક્રિકેટરમાંથી રાજકારણી બનેલા ઈમરાનને ઈસ્લામાબાદની નીચલી કોર્ટે 5 ઓગસ્ટે તોશાખાના ભ્રષ્ટાચાર કેસમાં દોષિત ઠેરવ્યો હતો. ચૂંટણી પંચ (ECP) દ્વારા કેસ દાખલ કરવામાં આવ્યો હતો.
ઈમરાન ત્રણ સીટો પરથી ચૂંટણી લડશે
આ નિર્ણય સાથે તેમને પાંચ વર્ષ માટે ચૂંટણી લડવા માટે ગેરલાયક ઠેરવવામાં આવ્યા હતા. જોકે, થોડા દિવસો બાદ ઈસ્લામાબાદ હાઈકોર્ટે તેની ત્રણ વર્ષની સજા રદ કરી હતી. પરંતુ અન્ય કેસમાં તે હજુ પણ જેલમાં છે. ઈમરાન સરકારમાં કાર્યકારી કાયદા અને ન્યાય મંત્રી રહેલા બેરિસ્ટર અલી ઝફરે અદિયાલા જેલની બહાર મીડિયાને કહ્યું, ‘ઈમરાન ખાન સાહેબે કહ્યું કે તેઓ પાકિસ્તાનના ઓછામાં ઓછા ત્રણ મતવિસ્તારોમાંથી ચૂંટણી લડશે.’
HC તરફથી ટૂંક સમયમાં નિર્ણયની અપેક્ષા
ઝફર ડૉન અખબારના સમાચાર અનુસાર, તેમણે કહ્યું કે ઈસ્લામાબાદ હાઈકોર્ટ તોશાખાના કેસમાં દોષિત ઠરાવીને પડકારતી ખાનની અરજી પર પોતાનો નિર્ણય આપવા જઈ રહી છે. તેમણે કહ્યું, ‘અમને આશા છે કે ચૂંટણીનો કાર્યક્રમ જાહેર થતાં જ નિર્ણયની જાહેરાત કરવામાં આવશે.’
PTIએ નામાંકન ભરવા માટે સૂચના આપી
ઝફરે કહ્યું કે PTI કાર્યકર્તાઓને તેમના ઉમેદવારી પત્ર ભરવા માટે સૂચના આપવામાં આવી છે. તેમણે કહ્યું, ‘જ્યાં સુધી પીટીઆઈના ઉમેદવારોનો સવાલ છે, અમારા જેલમાં બંધ કાર્યકરોને 100 ટકા ટિકિટ અગ્રતાના આધારે આપવામાં આવશે. બાકીના ઉમેદવારો પણ ફાઈનલ થઈ ગયા છે અને ટૂંક સમયમાં તેમના નામની જાહેરાત કરવામાં આવશે. તેમણે કહ્યું કે પક્ષના કાર્યકરોને ઉમેદવારી પત્રો ભરવાથી અટકાવવું એ ‘અલોકતાંત્રિક પગલું’ છે અને તે મુક્ત અને નિષ્પક્ષ ચૂંટણીને જોખમમાં મૂકશે.
