ભારત આવી રહેલા જહાજ પર ઇરાનથી થયો ડ્રોન એટેક,અમેરિકી રક્ષા મંત્રાલયનો દાવો

• હિંદ મહાસાગરમાં એક રાસાયણિક ટેન્કરને ડ્રોન દ્વારા નિશાન બનાવવામાં આવ્યું હતું
  
• હુમલા બાદ જહાજમાં આગ લાગી હતી
  
• જોકે સમયસર આગ ઓલવાઈ ગઈ હતી

ભારતીય દરિયાકાંઠાની નજીક હિંદ મહાસાગરમાં લાઇબેરિયન-ધ્વજવાળા ટેન્કર (જહાજ) પર ડ્રોન દ્વારા હુમલો કરવામાં આવ્યો છે.યુએસ સંરક્ષણ વિભાગ પેન્ટાગોને જણાવ્યું હતું કે શનિવારે વહેલી સવારે હિંદ મહાસાગરમાં એક રાસાયણિક ટેન્કરને ડ્રોન દ્વારા નિશાન બનાવવામાં આવ્યું હતું. હુમલા બાદ જહાજમાં આગ લાગી હતી, જોકે સમયસર આગ ઓલવાઈ ગઈ હતી. આ જહાજ સાઉદી અરેબિયાના એક બંદરેથી ભારતના મેંગલોર આવી રહ્યું હતું. 

એક નિવેદન જારી કરીને પેન્ટાગોને કહ્યું, ‘મોટર શિપ CHEM પ્લુટો, જે જાપાનની કંપનીની માલિકીનું હતું અને નેધરલેન્ડથી સંચાલિત હતું, તે લાઇબેરિયાનો ધ્વજ હતો.આ ડ્રોન હુમલો સ્થાનિક સમય અનુસાર સવારે 10 વાગ્યે (જીએમટી 6 વાગ્યે) ગુજરાતના વેરાવળ કિનારેથી 200 નોટિકલ માઈલના અંતરે એક કેમિકલ ટેન્કર પર કરવામાં આવ્યો હતો. આ હુમલો ઈરાનના ડ્રોન દ્વારા કરવામાં આવ્યો હતો.

જહાજમાં 21 ભારતીયો સવાર હતા

આ જહાજમાં 21 ભારતીય ક્રૂ સભ્યો હતા. ભારતીય નૌકાદળ દ્વારા તૈનાત P-8I લાંબા અંતરના દરિયાઈ સર્વેલન્સ એરક્રાફ્ટે એમવી કેમ પ્લુટો જહાજને જોયો હતો અને તેના ક્રૂની સલામતીની ખાતરી કરી હતી. ભારતીય નૌકાદળે વેપારી જહાજની મદદ માટે એક એડવાન્સ યુદ્ધ જહાજ મોકલ્યું છે, જ્યારે ભારતીય કોસ્ટ ગાર્ડે પણ તેના જહાજ ICGS વિક્રમને ઘટનાના વિસ્તાર તરફ વાળ્યું છે.

ICGS વિક્રમ એસ્કોર્ટ કરશે

ICGS વિક્રમને ભારતના વિશિષ્ટ આર્થિક ક્ષેત્રમાં પેટ્રોલિંગ કરવા માટે તૈનાત કરવામાં આવ્યા હતા. માલવાહક જહાજ પર હુમલાના સમાચાર મળતાની સાથે જ ICGS વિક્રમને તે તરફ જવાનો નિર્દેશ આપવામાં આવ્યો હતો. સંરક્ષણ અધિકારીના જણાવ્યા અનુસાર, આ વિસ્તારના તમામ જહાજોને મદદ પૂરી પાડવા માટે એલર્ટ કરવામાં આવ્યા છે. બીજી તરફ ભારતીય કોસ્ટ ગાર્ડ ડોર્નિયર મેરીટાઇમ સર્વેલન્સ એરક્રાફ્ટે પીડિત જહાજ એમવી કેમ પ્લુટો સાથે વાતચીત કરી છે. ડ્રોન હુમલાના સમાચાર સામે આવ્યા બાદ તરત જ P-8I સર્વેલન્સ એરક્રાફ્ટે ગોવાના INS હંસા નેવલ એરબેઝ પરથી ઉડાન ભરી હતી.

ભારત માટે ખતરો!

આ હુમલો દર્શાવે છે કે ઇઝરાયેલ અને હમાસ વચ્ચે ચાલી રહેલા યુદ્ધ બાદ વધી રહેલા પ્રાદેશિક તણાવે શિપિંગ લેન માટે પણ નવો ખતરો ઉભો કર્યો છે. ઈઝરાયલ અને હમાસ વચ્ચેના યુદ્ધમાં ભારતને હજુ સુધી સીધી અસર થઈ નથી તેથી ગુજરાત નજીક આ ડ્રોન હુમલાને કારણે ભારતની ચિંતા ચોક્કસપણે વધશે.

યમનમાં ઈરાન સરકાર અને તેના સહયોગી આતંકવાદી દળોએ ગાઝામાં ઈઝરાયેલ સરકારના સૈન્ય અભિયાનની જાહેરમાં ટીકા કરી છે. અરબી સમુદ્ર એ ભારતની ઉર્જા જરૂરિયાતોને પહોંચી વળવા માટે એક મહત્વપૂર્ણ દરિયાઈ માર્ગ છે. પેન્ટાગોનના નિવેદનમાં જણાવવામાં આવ્યું છે કે 2021 પછી કોમર્શિયલ શિપિંગ પર આ સાતમો ઈરાની હુમલો હતો. સંયુક્ત રાષ્ટ્રમાં ઈરાની પ્રતિનિધિમંડળના પ્રવક્તાએ હુમલા અંગે કોઈ ટિપ્પણી કરી ન હતી.