- ભાજપની કોર કમિટીની બેઠકમાં કેન્દ્રીય ગૃહ મંત્રી અમિત શાહ પણ હાજર
- બેઠકમાં ઉત્તરપ્રદેશ, રાજસ્થાન, પશ્ચિમ બંગાળ વગેરે રાજ્યોની બેઠકોની ચર્ચા
- યુપીની 25 બેઠકો, રાજસ્થાનની 10 બેઠકો અને બંગાળની 23 બેઠકોની ચર્ચા
લોકસભા ચૂંટણી 2024ની તૈયારીઓ તડામાર ચાલી રહી છે ત્યારે ભાજપની કોર કમિટીની બેઠક સોમવારે મોડી રાત સુધી દિલ્હી પાર્ટી હેડક્વાર્ટરમાં ચાલી હતી. જેમાં લોકસભા ચૂંટણી માટે વિવિધ રાજ્યોના સંભવિત ઉમેદવારો અંગે ચર્ચા કરવામાં આવી હતી. બેઠકમાં ઉત્તરપ્રદેશ, રાજસ્થાન, પશ્ચિમ બંગાળ, હરિયાણા, ઓડિશા, સિક્કિમ, મહારાષ્ટ્ર અને ગુજરાતની લોકસભા બેઠકો અને સંભવિત ઉમેદવારો અંગે ચર્ચા કરવામાં આવી હતી. આ બેઠકની અધ્યક્ષતા ભાજપના રાષ્ટ્રીય અધ્યક્ષ જેપી નડ્ડાએ કરી હતી, જેમાં કેન્દ્રીય ગૃહ પ્રધાન અમિત શાહ અને પાર્ટીના રાષ્ટ્રીય મહાસચિવ બીએલ સંતોષ પણ હાજર હતા.
ઉત્તરપ્રદેશની 25 લોકસભા સીટો પર ચર્ચા કરવામાં આવી
સૂત્રો પાસેથી મળતી માહિતી અનુસાર, બેઠકમાં ઉત્તર પ્રદેશની બાકીની લોકસભા બેઠકો પર ચર્ચા થઈ, જ્યાં ભાજપે હજુ સુધી ઉમેદવારોની જાહેરાત કરી નથી. આ બેઠકમાં ઉત્તરપ્રદેશના મુખ્યમંત્રી યોગી આદિત્યનાથ, બંને નાયબ મુખ્યમંત્રી કેશવ પ્રસાદ મૌર્ય અને બ્રિજેશ પાઠક, યુપી બીજેપી અધ્યક્ષ ભૂપેન્દ્ર ચૌધરી હાજર હતા. સૂત્રોના જણાવ્યા અનુસાર, બીજેપી કોર ગ્રુપની બેઠકમાં ઉત્તરપ્રદેશની 25 લોકસભા સીટો પર ચર્ચા કરવામાં આવી હતી. નેશનલ ડેમોક્રેટિક એલાયન્સના સહયોગી અપના દળને યુપીમાં બે બેઠકો મળી શકે છે, એક મિર્ઝાપુરમાં અને બીજી સોનભદ્રમાં. ગાઝિયાબાદના સાંસદ જનરલ વીકે સિંહને ફરીથી મેદાનમાં ઉતારવામાં આવી શકે છે, જ્યારે ભાજપ બારાબંકી બેઠક પરથી પોતાનો ઉમેદવાર બદલી શકે છે.
હરિયાણાની બેઠકો પર ચર્ચા થઈ હતી
બીજા તબક્કામાં હરિયાણાની બેઠકો પર ચર્ચા થઈ હતી. આ બેઠકમાં હરિયાણાના નવનિયુક્ત મુખ્યમંત્રી નાયબ સૈની અને પૂર્વ મુખ્યમંત્રી મનોહર લાલ ખટ્ટર હાજર હતા. ત્રીજા તબક્કામાં રાજસ્થાનની 10 લોકસભા સીટોને લઈને મંથન થયું હતું. આ ચર્ચા રાજસ્થાનના મુખ્યમંત્રી ભજનલાલ શર્મા, પ્રદેશ અધ્યક્ષ સીપી જોશી, પ્રભારી અરુણ સિંહ અને સહ પ્રભારી વિજયા રાહટકરની હાજરીમાં થઈ હતી. સૂત્રોના જણાવ્યા અનુસાર રાજસ્થાનના કોર ગ્રુપે નામો નક્કી કરી લીધા છે.ભાજપની કેન્દ્રીય ચૂંટણી સમિતિ આગામી એક-બે દિવસમાં ઉમેદવારોની યાદીને મંજૂરી આપશે. તમને જણાવી દઈએ કે રાજસ્થાનમાં ભાજપે 15 સીટો પર પોતાના ઉમેદવારો જાહેર કરી દીધા છે.
બંગાળ અને ઓડિશા પર પણ મંથન
કોર ગ્રૂપની બેઠકમાં પશ્ચિમ બંગાળની બાકીની 23 લોકસભા બેઠકોના ઉમેદવારો અંગે ચર્ચા કરવામાં આવી હતી. આ બેઠકમાં પશ્ચિમ બંગાળ ભાજપના અધ્યક્ષ સુકાંત મજુમદાર, પશ્ચિમ બંગાળ વિધાનસભામાં વિપક્ષના નેતા સુવેન્દુ અધિકારી અને અમિતાભ ચક્રવર્તી હાજર હતા. સિક્કિમ, ઓડિશા અને મહારાષ્ટ્ર માટે અનુક્રમે કોર કમિટીની બેઠકો પણ યોજાઈ હતી, જેમાં ઓડિશા ભાજપના પ્રમુખ મન મોહન સામલ અને કેન્દ્રીય મંત્રી ધર્મેન્દ્ર પ્રધાન ઓડિશા માટે ચર્ચાનું નેતૃત્વ કરી રહ્યા હતા. આ ઉપરાંત બેઠકમાં બીજેપી સાંસદ જોએલ ઓરમ, સંબિત પાત્રા, બૈજયંત પાંડા, સુનીલ બંસલ, લતા તેનેન્ડી, વિજય પાલ સિંહ તોમર, માનસ મોહંતી હાજર હતા.
MNS ચીફ રાજ ઠાકરે દિલ્હી પહોંચી ગયા છે
મહારાષ્ટ્ર નવનિર્માણ સેના (MNS)ના પ્રમુખ રાજ ઠાકરે સોમવારે મોડી રાત્રે દિલ્હી પહોંચ્યા હતા. તેઓ આજે કેન્દ્રીય ગૃહમંત્રી અમિત શાહને મળી શકે છે. સૂત્રોના જણાવ્યા અનુસાર રાજ ઠાકરે ભાજપ-શિવસેના-એનસીપી મહાગઠબંધનમાં સામેલ થઈ શકે છે. MNSને લોકસભાની બે બેઠકો આપવામાં આવી શકે છે. મીડિયાકર્મીઓ દ્વારા પૂછવામાં આવતા રાજ ઠાકરેએ કહ્યું, ‘મને હજુ સુધી ખબર નથી કે મારું શેડ્યૂલ શું છે. મને માત્ર દિલ્હી આવવાનું કહેવામાં આવ્યું હતું. જોઈએ’. ચૂંટણી પંચે શનિવારે 2024ની લોકસભા ચૂંટણી માટેનો કાર્યક્રમ જાહેર કર્યો છે. 19 એપ્રિલથી 1 જૂન સુધી દેશભરમાં 7 તબક્કામાં મતદાન થશે. 4 જૂને મતગણતરી થશે.
