સૌરાષ્ટ્ર-કચ્છમાં ચાર ટકા મતદાન ઓછુ થતાં રાજકીય પક્ષો મૂંજવણમાં

વડાપ્રધાને સભા કરેલી બેઠક પર પપ થી ૫૮ ટકા મતદાન

સૌરાષ્ટ્રના ૬૭.૫૦ લાખ લોકો મતદાનથી અળગા રહ્યા

ગરમીનો પારો અને ક્ષત્રિય આંદોલનની અસર થઇ હોવાની ચર્ચા

ગુજરાતની ૨૫ સહિત સૌરાષ્ટ્રની ૮ બેઠકો પર મતદાતાઓએ પોતાની નારાજગી દર્શાવી હોય તે રીતે એકદમ નિરસ મતદાન થયું હતું. જે રીતના મતદાન થવાનો અંદાજો હતો તે અંદાજા મુજબ સૌરાષ્ટ્રની આઠ બેઠકો પર મતદાન નહી થતાં રાજકીય પક્ષો પણ મુંઝવણમાં મૂકાયા છે. જે લીડથી જીતના દાવા કરવામાં આવી રહ્યા હતા તે લીડ સુધી પહોંચી વળશે કે કેમ તે પણ એક પ્રશ્ન ઉભો થયો છે. સૌરાષ્ટ્રમાં રાજકોટ, જામનગર, ભાવનગર, પોરબંદર, કચ્છ, જૂનાગઢ, સુરેન્દ્રનગર અને અમરેલી લોકસભા બેઠક પર સરેરાશ ૫૪ ટકા જેટલું મતદાન થયું હતું. જો કે ગત વર્ષ કરતા  ચાર ટકા જેટલું મતદાન ઓછું થયું છે અને સૌરાષ્ટ્રના દોઢ કરોડ મતદાતાઓમાંથી ૭૦ લાખ જેટલા મતદાતાઓ મતદાન કરવાથી અળગા રહ્યા હતા.

વડાપ્રધાનની જ્યાં સભા થઈ હતી અને ક્ષત્રિય આંદોલનની અસર ઓછી હતી તે જુનાગઢમાં સૌથી વધારે ૫૮.૮૭ ટકા અને બીજા નંબરે જામનગર કે જ્યાં ક્ષત્રિય આંદોલનની અસર હતી ત્યાં ૫૭.૬૭ ટકા મતદાન થયું છે જે સરેરાશ કરતા ૪ ટકા જેટલું વધારે છે. પરંતુ, સુરેન્દ્રનગર કે જ્યાં પહેલેથી જ ક્ષત્રિય આંદોલન વધુ તેજ બન્યું હતું ત્યાં માત્ર ૫૨.૨૨ ટકા મતદાન થયું છે. 

અમરેલી કે જ્યાં અંબરીશ ડેર સહિત અનેક કોંગી નેતાઓએ પક્ષપલ્ટો કર્યો છે અને ભાજપ-કોંગ્રેસના બે નેતાઓ રાજકોટ ચૂંટણી લડવા આવ્યા છે ત્યાં રાજ્યનું સૌથી ઓછું મતદાન માત્ર ૫૦.૦૭ ટકા થયું છે. પક્ષપલ્ટાને કારણે જ્યાં ચૂંટણી આવી પડી તે માણાવદરમાં પણ ૫૩.૯૩ ટકા જેવું પાંખુ મતદાન રહ્યું છે. 

સૌરાષ્ટ્રમાં ગત ધારાસભા-૨૦૨૨ની ચૂંટણીમાં ભાજપ,કોંગ્રેસ અને આમ આદમી પાર્ટી વચ્ચે ત્રિપાંખિયો જંગ હતો ત્યારે આ વખતે ભાવનગરમાં ભાજપ અને આપ વચ્ચે તથા અન્ય તમામ બેઠકો પર ભાજપ-કોંગ્રેસ વચ્ચે સીધો જંગ હતો. આમ, શાસનવિરોધી મતોમાં ભાગલા ઓછા પડવાનો અંદાજ છે. કૂલ ૯૨ ઉમેદવારોનું રાજકીય ભાવિ આજે ઈ.વી.એમ.માં સીલ થયું છે. 

સૌરાષ્ટ્રની જનતામાં સ્થાનિક ભંગાર રસ્તા જેવા અનેક પ્રશ્નોથી માંડીને ટોલટેક્સ સહિત વધુ કરબોજ, વેપાર ઉદ્યોગ અને ખેડૂતોથી માંડીને ગૃહિણીઓને સ્પર્શતા મોંઘવારી,શિક્ષિત બેરોજગારી અને સામાન્ય નોકરી માટે લાંબી કતારો, સરકારી સેવાઓનું ખાનગીકરણ અને લોકોને હાલાકીથી માંડીને ગામેગામ,ઘરે ઘરે જેનો મહોત્સવ ઉજવાયો તે રામમંદિરની પ્રાણ પ્રતિષ્ઠા, કાશ્મીરને ભારત સાથે જોડતી ક.૩૭૦ રદ કરવાનું ઐતહાસિક પગલુ, નરેન્દ્ર મોદીની અડીખમ લોકચાહના,સોમનાથ,દ્વારકા સહિત ધર્મસ્થાનો અને સાંસ્કૃતિક સ્થળોનો વિકાસ, એઈમ્સથી એરપોર્ટ સહિતની સુવિધા વગેરે મુદ્દાઓ હતા. પરંતુ, ચૂંટણી પૂર્વે વધુ ગાજેલો મુદ્દો પરસોતમ રૂપાલાનો રાજા-મહારાજાઓ વિષે ખોટો અને અનુચીત બફાટ કે જેના કારણે રાજ્યભરમાં ક્ષત્રિય આંદોલન સળગ્યું તે રહ્યો હતો. ઉપરાંત ભાજપ-કોંગ્રેસના નેતાઓના વાણીવિલાસ પણ મુદ્દા બન્યા હતા. 

સૌરાષ્ટ્રની 8 બેઠકો પર 2019 અને 2024માં થયેલું મતદાન