- જાપાનમાં ભારે વરસાદ બાદ પૂર જેવી સ્થિતિની નિર્માણ
- ઉત્તરી જાપાનમાં ભૂસ્ખલનને લીધે લોકોને સાબદા રહેવા અપીલ
- પરિવહન સેવા ઠપ થઈ જતા સેંકડો લોકો સલામત સ્થાનો પર શરણ લેવા મજબૂર
જાપાનમાં ભારે વરસાદે હાલાકી વધારી દીધી છે. ભારે વરસાદ બાદ આવેલા પૂરને લીધે લોકો કપરી સ્થિતિમાં જીવવા મજબૂર બન્યા છે. ઉત્તરી જાપાનમાં ભારે વરસાદનો કહેર જોવા મળી રહ્યો છે. વરસાદ ખાબકયા પછી પૂર અને ભૂસ્ખલનથી ટ્રાંસપોર્ટ સેવાઓને ભારે અસર પડી છે. સેંકડો લોકોને સુરક્ષિત સ્થળે શરણ લેવાની નોબત આવી છે. જાપાનની હવામાન વિભાગે યામાગાટા અને અકિતા પ્રાંતના ઘણા શહેરો માટે ભારે વરસાદની ચેતવણી જાહેર કરી છે. આ શહેરોમાં અત્યાર સુધી ગરમ હવા ફુંકાવાથી જવાળું વાતાવરણ હતું.
બચાવ કર્મીઓ લોકોની મદદમાં વ્યસ્ત
ફાયર બ્રિગેડ અને કુદરતી હોનારત એજન્સીના જણાવ્યા પ્રમાણે અકિતા પ્રાંતના યુઝાવા શહેરમાં એક વ્યકિત ભૂસ્ખલનની ઝપટે આવતા ગુમ થયો હતો. જેથી બચાવ ટીમના કર્મચારીઓ હોડીની મદદથી પૂરગ્રસ્ત ક્ષેત્રમાં 11 લોકોને સલામત સ્થળે ખસેડયા હતા. પાડોશી શહેર યામાગાટા પ્રાંતમાં સૌથી વધુ અસરગ્રસ્ત બે પરામાં ગુરુવારે એક કલાકની અંદર ચાર ઈંચથી વધુ વરસાદ ખાબક્યો હતો. જેથી આ વિસ્તારના હજારો લોકોને ઉંચાઈ ધરાવતા સ્થળો પર શરણ લેવાની સલાહ આપી છે. જો કે, શરણ લેનાર લોકોની સંખ્યા સામે આવી નથી.
જાપાનના વડાપ્રધાને લોકોને અપીલ કરી
જાપાન દેશના વડાપ્રધાન ફુમિયો કિશિદાએ અસરગ્રસ્ત વિસ્તારના લોકોને હવામાન સંબંધિત જાણકારી પર સતત નજર રાખવે આદેશ આપ્યો છે. આ ઉપરાંત સુરક્ષાને ધ્યાને લેવા લોકોને અપીલ કરી છે. પૂર્વ જાપાન રેલવે દ્વારા બુલેટ ટ્રેન સેવા આંશિર રૂપે મોકૂફ રાખી દીધી છે. જાપાનની હવામાન કચેરીએ વરસાદને લઈ આગાહી કરી છે. આ આગાહી અનુસાર શુક્રવાર સાંજ સુધી આઠ ઈંચથી વધુ વરસાદ વરસવાની ચેતવણી આપી છે. જેથી લોકોને એલર્ટ રહેવા આગ્રહ કર્યો છે.
