- ભારતીય યુવાનોને કમ્પ્યૂટર પર બેસાડી ભારતના જ લોકોને સાઇબર ફ્રોડમાં ફસાવવા મજબૂર કરાય છે
- ચારેક માસ પહેલાં કંબોડિયામાં 5 હજાર ઇન્ડિયન્સ સાયબર સ્લેવના રેકેટમાં ફસાયા
- સરકારના ગૃહ અને વિદેશ મંત્રાલયે હરકતમાં આવી જઇ રેસ્કયું સ્ટ્રેટજી અપવાની
હવે સાયબર સ્લેવના નામના ઇન્ટરનેશનલ રેકેટથી ખળભળાટ મચી ગયો છે. દેશના નોકરીવાંચ્છુ યુવકોને ઊંચા પગારે નોકરીની લાલચ આપી કંબોડિયા બોલાવાઇ રહ્યા છે.લોભામણી સ્કીમમાં ફસાઇ ઊંચા-ઊંચા સપના જોઇ કંબોડિયા પહોંચેલા ભારતના યુવકોને કંબોડિયન્સ સાઇબર માફિયા સાયબર ગુલામ (સાયબર સ્લેવ) બનાવી દેવાનું નેટવર્ક ચલાવી રહ્યા છે.
કોલ સેન્ટર જેવા મોટા હોલમાં કોમ્પ્યુટર કે લેપટોપ સામે ગરજવાન યુવકોને બેસાડી દેવાય છે અને અહીંથી જ ભારતીય નાગરિકોને રેન્ડમલી કોલ કરી સાયબર ક્રાઇમ કરવા મજબૂર કરાઇ રહ્યા છે.કંબોડિયામાં ભારતીય યુવકોનું શોષણ કરાઇ રહ્યું હોવાનો ઘટસ્ફોટ થયો છે. કંબોડિયા દેશ ઉપરાંત લાઓસ, વિએટનામ, મ્યાનમારમાં પણ આ પ્રકારે ભારતીયોને સાયબર ગુલામના રેકેટમાં ધકેલવામાં આવી રહ્યા છે. ચારેક માસ પહેલાં કંબોડિયામાં 5 હજાર ઇન્ડિયન્સ સાયબર સ્લેવના રેકેટમાં ફસાયા હોવાના ઇનપુટ મળતા કેન્દ્ર સરકાર ચોંકી ગઇ હતી. સરકારના ગૃહ અને વિદેશ મંત્રાલયે હરકતમાં આવી જઇ રેસ્કયું સ્ટ્રેટજી અપવાની કંબોડિયામાં ફસાયેલા ભારતીયોને પરત લાવવા કમર કસી હતી. બીજી તરફ કેન્દ્ર સરકારે દરેક રાજ્યની સરકારને છેલ્લાં છ માસમાં કેટલાં યુવકો કંબોડિયા કે આજુબાજુના દેશોમાં ગયા? કેટલાં ત્યાંથી પરત ફર્યા? પરત ફર્યા તો સાયબર સ્લેવનો ભોગ બન્યા છે કે કેમ? તે અંગે તપાસ કહો કે સર્વે કરવા આદેશ કર્યો હતો. જે અંતર્ગત રાજ્ય સરકારે સીઆઇડી ક્રાઇમને તપાસ સોંપી હતી.
સીઆઇડીના સુપરવિઝન હેઠળ સુરત શહેર પોલીસની સાયબર સેલે આ મામલે ગુપ્ત તપાસ હાથ ધરી છે.
છેલ્લાં છ માસમાં કેટલાં યુવકો સુરતથી કંબોડિયા ગયા? અને કેટલા પરત ફર્યા? તે અંગે માહિતી મેળવવાની શરૂ કરી દેવાઇ છે. અમરોલી, ઉત્રાણ, સરથાણા, કતારગામ, કાપોદ્રા પોલીસને સંકલનમાં રાખી સાયબર સેલે કંબોડિયા ગયેલા સુરતીઓ ફરતે તપાસ કેન્દ્રિત કરી છે. કંબોડિયા-વિયેટનામથી પરત ફરેલા યુવકોને પોલીસ દ્વારા કોલ કરી ખરાઇ પણ કરાઇ રહી છે. સુરતીઓ કંબોડિયામાં કોઇ રેકેટનો ભોગ બન્યા છે કે કેમ એ અંગે હાલ ગુપ્ત રાહે તપાસ ચાલી રહી છે. આગામી દિવસોમાં સાયબર સેલ સંપૂર્ણ તપાસ કરી અહેવાલ ઉપરી અધિકારીઓને રજૂ કરનાર હોવાનું જાણવા મળે છે.
ચાઇનીઝ ગેંગ કંબોડિયાથી નેટવર્ક ચલાવે છે
1.68 કરોડની વસતીવાળો કંબોડિયા દેશ હાલ ટૂરિઝમ કરતા સાઇબર સ્લેવ માટે વધુ બદનામ છે. ગોરખધંધામાં માસ્ટર માઇન્ડ કહેવાતા ચીની માફિયાએ કંબોડિયામાં જાળ બિછાવી છે. કંબોડિયા શિફ્ટ થઇ ચીનાઓ આ નેટવર્ક ધમધમાવી રહ્યા છે. ડિજિટલ એરેસ્ટ, ઓનલાઇન હનીટ્રેપ, સેક્સટોર્શન, ટેલિકોલિંગ ફ્રોડ સહિતના સાયબર ફ્રોડ માટે ભારતીયોને બંદી બનાવી જબરદસ્તીથી ભારતીયોને જ ટાર્ગેટ કરવા ધાક-ધમકી ચીનાઓ દ્વારા આપવામાં આવી રહી છે.
પાસપોર્ટ જપ્ત : 16 કલાક કામની ફરજ : ખોરાકના પણ વલખાં
ઓછા પગારે રિબાતા યુવકો લાઇફ સેટ કરવા કંબોડિયા જતા હોય છે. અહીં પહેલાં તો તેઓનો પાસપોર્ટ અને આઇડી પ્રુફ્સ સહિતના ડોક્યુમેન્ટ્સ જપ્ત કરી લેવાય છે. કોલ સેન્ટરની માફક મોટા હોલમાં કોમ્પ્યુટર સામે બેસાડી 16-16 કલાક કામ કરવા દમદાટી અપાય છે. ખોરાક યોગ્ય નહિ આપવા સાથે કોઇક સાથે સંપર્ક કરવા પણ પાબંધી ફરમાવી દેવાઇ છે. તાબે નહિ થાય તો ઇલેકટ્રીક શોક આપવાની પણ ધમકી અપાય છે. આમ બંદક બનાવી કામ કરાવવામાં આવે છે.
