- ભરૂચના આમોદમાં વરસાદની ધમાકેદાર બેટિંગ
- આમોદમાં ગાજવીજ સાથે ધોધમાર વરસાદ
- શહેરની મોટાભાગની દુકાનોમાં ઘૂસ્યા પાણી
ભરૂચના આમોદમાં વરસાદે ધમાકેદાર બેટિંગ શરૂ કરી છે. આમોદમાં ફરી એકવાર સાંજના સમયે વરસાદે તોફાની બેટિંગ શરૂ કરી છે. વિસ્તારમાં ગાજવીજ સાથે ધોધમાર વરસાદ વરસ્યો છે. ઉલ્લેખનીય છે કે છેલ્લા 2 દિવસથી સાંજના સમયે વરસાદ ગાજવીજ સાથે તોફાની બેટિંગ કરે છે.
જોરદાર ગરમી અને ઉકરાટ વચ્ચે વરસાદે એન્ટ્રી મારી
ત્યારે શહેરની મોટાભાગની દુકાનોમાં પણ ધોધમાર વરસાદને પગલે વરસાદી પાણી ઘુસી ગયા છે અને આખુ નગર પાણી પાણી થયું છે. આમોદમાં મુખ્ય બજાર, તિલક મેદાન અને મચ્છી માર્કેટમાં પણ ઘુંટણ સમા પાણી ભરાયા છે. જોરદાર ગરમી અને ઉકરાટ વચ્ચે વરસાદે એન્ટ્રી મારી છે, જેના કારણે લોકોને ગરમીના બફારામાંથી થોડાકઅંશે રાહત મળી છે, ત્યારે બાળકોએ વરસાદમાં ન્હાવાની પણ મજા માણી છે.
બપોર બાદ પણ વાદળછાયુ વાતાવરણ છવાયુ
બે દિવસથી આમોદમાં વરસાદ વરસી રહ્યો છે, ત્યારે આજે બપોર બાદ પણ વાદળછાયુ વાતાવરણ રહ્યું હતું અને જોત જોતામાં વરસાદે તાબડતોડ બેટિંગ શરૂ કરી હતી અને થોડા જ સમયમાં વરસાદી પાણીથી આમોદ નગર પાણી પાણી થયું હતું.
રાજ્યના 99 તાલુકામાં વરસાદની બેટિંગ
આજે સાંજે 6 વાગ્યા સુધી રાજ્યમાં કુલ 99 તાલુકામાં વરસાદ ખાબક્યો છે. જેમાં સૌથી વધુ નવસારીના ખેરગામમાં 6.2 ઈંચ વરસાદ વરસ્યો છે. જ્યારે ડાંગના આહવામાં 4.5 ઈંચ વરસાદ તો વલસાડના કપરાડામાં પણ 4.5 ઈંચ વરસાદ નોંધાયો છે. બીજી તરફ નવસારીના ચીખલીમાં 4.2 ઈંચ વરસાદ, નવસારીના વાંસદામાં 4 ઈંચ વરસાદ, વલસાડ તાલુકામાં 3.7 ઈંચ વરસાદ, ડાંગના વઘઈમાં 3.6 ઈંચ વરસાદ, ડાંગના સુબીરમાં 3.6 ઈંચ વરસાદ, વલસાડના ધરમપુરમાં 3.4 ઈંચ વરસાદ, તાપીના ડોલવણમાં 2.4 ઈંચ વરસાદ તો વલસાડના પારડીમાં 2 ઈંચ વરસાદ નોંધાયો છે. વરસાદને પગલે ઘણા લોકોને હાલાકી પડી છે અને ઘણા વાહનો વરસાદી પાણી ભરાઈ જવાના કારણે બંધ પડ્યા હતા.
