- ઘણા દેશોએ ભારતીય પ્રવાસીઓ માટે વિઝા પ્રક્રિયાને ખૂબ જ સરળ બનાવી દીધી
- ભારતીય પાસપોર્ટ ધારકો માટે આ દેશોની મુસાફરીની પ્રોસેસ ખૂબ જ સરળ બની છે
- વિદેશ મંત્રાલય પ્રયાસ કરે છે અન્ય દેશો પણ ભારતીયોની યાત્રા સરળ બનાવવા માટે આગળ આવે
ભારતીય પ્રવાસીઓ માટે વિશ્વના લગભગ ઘણા દેશોએ વિઝા પ્રક્રિયાને ખૂબ જ સરળ બનાવી દીધી છે. ભારતીય પાસપોર્ટ ધારકો માટે આ દેશોની મુસાફરીની પ્રોસેસ ખૂબ જ સરળ બની ગઈ છે. વિદેશ મંત્રાલયના જણાવ્યા મુજબ વિઝા ફ્રી એન્ટ્રી હાલમાં 16 દેશોએ શરૂ કરી છે, આ સિવાય 40 દેશોએ વિઝા ઓન અરાઈવલ અને 47 દેશોએ ઈ-વિઝા શરૂ કર્યા છે. વિદેશ મંત્રાલય સતત એ સુનિશ્ચિત કરવાનો પ્રયાસ કરી રહ્યું છે કે વિશ્વના અન્ય દેશો પણ ભારતીયોની યાત્રા સરળ બનાવવા માટે આગળ આવે.
વિદેશ મંત્રાલયે કહ્યું કે વિઝા પ્રોસેસ માટે ઉપરોક્ત સુવિધાઓ આપવી એ દેશની પોતાની બાબત છે, પરંતુ તે મોટાભાગે ભારત સાથેના તેના સંબંધો પર પણ આધારિત છે. જેમ જેમ અન્ય દેશો સાથે ભારતના સંબંધો વધી રહ્યા છે તેમ તેમ સરળ વિઝા સુવિધા આપતા દેશોની સંખ્યા વધી રહી છે. વિદેશ મંત્રાલયના સૂત્રોએ જણાવ્યું કે ઘણા દેશો સાથે ચર્ચા ચાલી રહી છે અને આ વર્ષના અંત સુધીમાં આ લિસ્ટમાં વધુ દેશોનો સમાવેશ થઈ શકે છે.
આ દેશોમાં વિઝા ફ્રી ટ્રાવેલ
આ દેશોમાં મુખ્યત્વે થાઈલેન્ડ, ભૂતાન, હોંગકોંગ, માલદીવ્સ, મોરેશિયસનો સમાવેશ થાય છે. ઘણા દેશો ઈ-વિઝા અને વિઝા ઓન અરાઈવલ બંને સુવિધાઓ આપી રહ્યા છે. ઈ-વિઝા સુવિધા આપનારા દેશોમાં વિયેતનામ, રશિયા, યુએઈ, અઝરબૈજાન, કઝાકિસ્તાન, કિર્ગિસ્તાન, આર્જેન્ટિના, બહેરીન, મલેશિયા, ન્યુઝીલેન્ડ, ઓમાન, સિંગાપોર, દક્ષિણ કોરિયા, તાઈવાન, યુગાન્ડા, ઉઝબેકિસ્તાન વગેરેનો સમાવેશ થાય છે. આ સિવાય અન્ય અરાઈવલ વિઝા સુવિધા આપનારા દેશોમાં ફિજી, ઈન્ડોનેશિયા, ઈરાન, જમૈકા, જોર્ડન, નાઈજીરીયા, કતાર, ઝિમ્બાબ્વે, ટ્યુનિશિયા વગેરે પણ સામેલ છે. આમાં ઘણા એવા દેશો છે જે ઈ-વિઝા અને અરાઈવલ વિઝા બંનેની સુવિધા પૂરી પાડી રહ્યા છે.
ટૂરિસ્ટ વિઝા પર જ સુવિધાઓ ઉપલબ્ધ
જે દેશોએ વિઝા ફ્રી, અરાઈવલ વિઝા અથવા ઈ-વિઝાની સુવિધા પૂરી પાડી છે, તેઓ મૂળભૂત રીતે માત્ર ટૂરિસ્ટ વિઝા માટે જ અરજી કરે છે. 15 દિવસથી લઈને વધુમાં વધુ ત્રણ મહિના સુધી આ દેશમાં રહેવાની પરવાનગી હોય છે.
સમયની થાય છે બચત
આ વિઝાનો ફાયદો એમ્બેસીમાંથી નિયમિત વિઝા મેળવવાની પ્રક્રિયામાં સમય બચાવે છે. ઈ-વિઝા, અરાઈવલ વિઝાની પ્રક્રિયા સરળ છે. અરાઈવલ વિઝા લેતી વખતે જરૂરી ડોક્યુમેન્ટ અપલોડ કરવાના હોય છે અથવા રજૂ કરવાના હોય છે, જેના આધારે ઝડપી વિઝા મળી જાય છે.
ભારત ઘણા દેશોને ઈ-વિઝા, અરાઈવલ વિઝા અને વિઝા ફ્રી એન્ટ્રી પણ આપી રહ્યું છે. ભારત લગભગ 170 દેશોને ઈ-વિઝા સુવિધા પ્રદાન કરી રહ્યું છે, જાપાન, દક્ષિણ કોરિયા, યુએઈ સહિત ઘણા દેશોને વિઝા ઓન અરાઈવલ સુવિધા આપે છે.
પાસપોર્ટ રેન્કમાં 82મું સ્થાન
ભારતમાં વિઝા ફ્રી અથવા સરળ વિઝા એન્ટ્રી આપનારા દેશોની સંખ્યા ભારતના પાસપોર્ટની તાકાતમાં વધારો કરશે. ગ્લોબલ પાસપોર્ટ રેન્કિંગ 2024માં ભારત 82માં નંબર પર છે. ગયા વર્ષે તેમનો રેન્ક 84 હતો. તેમાં સતત સુધારો થઈ રહ્યો છે.
