- શ્રીલંકાની નૌકાદળે ફરી 11 ભારતીય માછીમારોની માછીમારી માટે ધરપકડ કરી છે
- શ્રીલંકાના પ્રાદેશિક જળસીમામાં પ્રવેશ કરવા બદલ ધરપકડ કરી છે
- તમિલનાડુના મુખ્યમંત્રી એમકે સ્ટાલિને જયશંકરને પત્ર લખીને સ્થિતિને ચિંતાજનક ગણાવી છે
શ્રીલંકા વારંવાર ભારતીય માછીમારોની ધરપકડ કરી રહ્યું છે. આ વખતે ફરી શ્રીલંકાની નૌકાદળે દેશના પ્રાદેશિક જળસીમામાં કથિત રીતે શિકાર કરવા બદલ વધુ 11 ભારતીય માછીમારોની ધરપકડ કરી છે. આ વર્ષે અત્યાર સુધીમાં પકડાયેલા ભારતીય માછીમારોની કુલ સંખ્યા 333 પર પહોંચી ગઈ છે. એક જાહેરાતમાં આ વાત કહેવામાં આવી છે. આ ઘટના બાદ તમિલનાડુના મુખ્યમંત્રી એમકે સ્ટાલિને વિદેશ મંત્રી એસ જયશંકરને પત્ર લખ્યો છે. તેમને શ્રીલંકાની વારંવારની આ કાર્યવાહીને ચિંતાજનક ગણાવી છે.
જપ્ત કરાયેલા જહાજોની સંખ્યામાં વધારો
શ્રીલંકાના નૌકાદળે એક અખબારી યાદીમાં જણાવ્યું હતું કે, અગિયાર ભારતીય માછીમારોની ધરપકડ કરવામાં આવી હતી અને તેમની માછીમારી બોટને શુક્રવારે ઉત્તરી પ્રાંત જાફનામાં પોઈન્ટ પેડ્રો કિનારેથી જપ્ત કરવામાં આવી હતી. તેમાં કહેવામાં આવ્યું છે કે પકડાયેલા લોકોને આગળની પ્રક્રિયા માટે કનકેસંથુરાઈ ફિશિંગ બંદર પર લાવવામાં આવ્યા હતા. પ્રેસ રિલીઝ મુજબ આ સાથે આ વર્ષે શ્રીલંકન નેવી દ્વારા ધરપકડ કરાયેલા ભારતીયોની સંખ્યા વધીને 333 થઈ ગઈ છે અને તેમના જપ્ત કરાયેલા જહાજોની સંખ્યા વધીને 45 થઈ ગઈ છે.
સ્ટાલિને પત્રમાં માછીમારોની પીડા વિશે લખ્યું હતું
આ દરમિયાન તમિલનાડુના મુખ્યમંત્રી એમકે સ્ટાલિને વધુ 11 માછીમારોની ધરપકડ બાદ વિદેશ મંત્રી એસ જયશંકરને પત્ર લખ્યો છે. તેમને કહ્યું, “મેં વારંવાર જણાવ્યું છે કે આવી ઘટનાઓ ચિંતાજનક આવર્તન પર બની રહી છે. માત્ર 2024માં જ શ્રીલંકાના નૌકાદળ દ્વારા 324 માછીમારો અને 44 બોટની ધરપકડ કરવામાં આવી હતી. તમિલનાડુમાં માછીમારોની વારંવાર ધરપકડ કરવામાં આવી છે જેના કારણે તેઓને ભારે મુશ્કેલીઓનો સામનો કરવો પડી રહ્યો છે. જેનાથી તેમના નિર્વાહના સાધનોને ગંભીર અસર થઈ રહી છે.
