આયોજકો સાથેની બેઠકમાં ગણેશ પંડાલોમાં સીસીટીવી અને ૨૪ કલાકો સ્વયંસેવકો રાખવા સૂચના
સુરતમાં ગણેશ મહોત્સવ દરમિયાન અસામાજીક તત્વોએ પથ્થરમારો કાયદો વ્યવસ્થા હાથમાં લેતા પોલીસ તંત્ર સમગ્ર રાજયમાં એલર્ટ થઇ ગયું છે. કોઇ કોમી, અનિચ્છનીય ઘટના ન બને તે માટે તકેદારીના પગલા લેવાયા છે. રાજકોટ પોલીસ કમિશ્નરે ગણેશ મહોત્સવના તમામ આયોજકો સાથે એક બેઠક યોજી એસઓપી નક્કી કરી છે. જે મુજબ આયોજકોએ તેમના ગણેશ પંડાલોમાં સીસીટીવી રાખવા તથા ૨૪ કલાક કોઇને કોઇ સ્વયંસેવકો હાજર રહે તેવી વ્યવસ્થા ગોઠવવા તાકીદ કરી હતી.
શહેરના એડિશ્નલ પોલીસ કમિશનર, તમામ ડીસીપી અને એસીપી સહિતના અધિકારીઓની હાજરીમાં યોજાયેલી આ મિટીંગમાં ગણપતિ પંડાલના આયોજકોને સીસીટીવી કેમેરા રાખવા, પંડાલમાં 24 કલાક સ્વયંસેવકો રહે તેનું ધ્યાન રાખવા, ભીડભાડ ન થાય તે માટે એન્ટ્રી અને એકઝીટ ગેટ અલગ રાખવા સહિતની સુચનાઓ આપવામાં આવી હતી.
તેની સાથે પોલીસ પણ ગણપતિ પંડાલો આસપાસ પેટ્રોલીંગ કરતી રહેશે તેની ખાતરી આપવામાં આવી હતી. પોલીસને ગણપતિ પંડાલોમાં નિયમીત રીતે જઈ નિરીક્ષણ કરવા અને આયોજકોને કોઈ પ્રશ્નો હોય તો તેનો ત્વરીત નિકાલ કરવા પણ સુચના આપવામાં આવી હતી. જેના પગલે હવેથી ગણપતિ પંડાલો આસપાસ દરેક પોલીસ મથકોની પીસીઆર અને બાઈક પર પોલીસ પેટ્રોલીંગ કરતી રહેશે.
ખાસ કરીને રાતના સમયે કોઈ અનિચ્છનીય ઘટના ન બને તે માટે વિશેષ તકેદારી રાખવા ગણપતિ પંડાલના આયોજકોને પોલીસે સુચના આપી હતી. એટલું જ નહીં વિર્સજન વખતે પણ ધાર્મિક લાગણી દુભાય તેવા ગીતો નહીં વગાડવા સહિતની પણ સુચના આપી હતી. પોલીસ સૂત્રોએ જણાવ્યું કે આ વખતે શહેરમાં 324 ગણપતિ પંડાલના આયોજકોએ જે-તે વિસ્તારના પોલીસ મથકોમાં નોંધણી કરાવી છે. આ તમામ આયોજકો સાથે આજે મિટીંગ ગોઠવવામાં આવી હતી. ગણપતિ વિર્સજન સુધી પોલીસ આયોજકો સાથે સતત સંપર્કમાં રહેશે. એટલું જ નહીં આયોજકોને પણ પોલીસ સાથે સંપર્કમાં રહેવા જણાવાયું છે.
