યુક્રેન સાથેના યુદ્ધ દરમિયાન રશિયાના રાષ્ટ્રપતિ વ્લાદિમીર પુતિને ત્રીજી વખત પોતાની સેનાની સંખ્યા વધારવાનો આદેશ આપ્યો છે. રશિયન પ્રમુખ વ્લાદિમીર પુતિને 1.5 મિલિયન સક્રિય સૈનિકો સુધી પહોંચવા માટે વધુ 180,000 સૈન્ય ભરતીનો આદેશ આપ્યો છે. આ આદેશના અમલ પછી રશિયા પાસે ચીન પછી વિશ્વની બીજી સૌથી મોટી સેના હશે.
આ આદેશ ડિસેમ્બર સુધીમાં લાગુ કરવામાં આવશે
રશિયાની સત્તાવાર વેબસાઇટ પર મળતી માહિતી અનુસાર, આ આદેશ આ વર્ષે ડિસેમ્બર સુધીમાં લાગુ કરવામાં આવશે અને સશસ્ત્ર દળોની કુલ સંખ્યા વધારીને 2.38 મિલિયન કરવામાં આવશે. પુતિને ડિસેમ્બર 2023માં પણ આવો જ આદેશ જારી કર્યો હતો, જેના હેઠળ રશિયન સેનામાં જવાનોની કુલ સંખ્યા વધારીને 2.2 મિલિયનથી વધુ કરવામાં આવી હતી, જેમાં 1.3 મિલિયન સૈનિકો સામેલ હતા.
રશિયા પાસે વિશ્વની બીજી સૌથી મોટી સેના
મિલિટરી થિંક ટેન્ક ઇન્ટરનેશનલ ઇન્સ્ટિટ્યૂટ ફોર સ્ટ્રેટેજિક સ્ટડીઝ (IISS)ના ડેટા અનુસાર, આ વધારા પછી રશિયા પાસે અમેરિકા અને ભારત કરતાં વધુ સક્રિય સૈનિકો હશે અને તેની સેના ચીન પછી બીજી સૌથી મોટી સેના બની જશે. IISS અનુસાર, ચીન પાસે 20 લાખથી વધુ સક્રિય ફરજ સૈનિકો છે.
સૈનિકોની સંખ્યા વધારવાનો આદેશ આપ્યો
લગભગ ત્રણ વર્ષ પહેલા શરૂ થયેલા યુક્રેન યુદ્ધ બાદ આ ત્રીજો ઓર્ડર છે, જ્યાં પુતિને સેનાની સંખ્યા વધારવાની વાત કરી છે. આ આદેશ એવા સમયે આવ્યો છે જ્યારે આ યુદ્ધ ચરમસીમાએ છે અને રશિયન સેના પૂર્વ યુક્રેનમાં આગળ વધી રહી છે અને યુક્રેનિયન સેનાને રશિયાના કુર્સ્ક વિસ્તારમાંથી પાછી ખેંચવાનો પ્રયાસ કરી રહી છે.
