કેનેડામાં અભ્યાસ કરવા જઈ રહેલા વિદ્યાર્થીઓ માટે મોટા સમાચાર આવી રહ્યા છે. અભ્યાસ માટે કેનેડા જતા મોટાભાગના વિદ્યાર્થીઓ ત્યાં પીઆર (મેળવવાનો પ્રયાસ કરે છે.
કેનેડામાં પીઆર માટે અરજી કરતી વખતે, અંગ્રેજી ભાષાનું જ્ઞાન હોવું આવશ્યક છે કારણ કે આ આધારે ગુણ આપવામાં આવે છે. ઈમિગ્રેશન નિષ્ણાતો કહે છે કે જો કોઈ ભારતીય વિદ્યાર્થી પીઆર ઈચ્છતો હોય, તો તેને બીજી ભાષા શીખવી જોઈએ, કારણ કે કેનેડા હાલમાં દ્વિભાષી વિદેશી નાગરિકોને સ્થાયી કરવા પર ધ્યાન કેન્દ્રિત કરી રહ્યું છે.
મીડિયા રિપોર્ટ મુજબ ભારતમાં ઘણા IELTS સેન્ટરે ફ્રેન્ચ ભાષાના અભ્યાસક્રમો શરૂ કર્યા છે, જેમાં ઈમિગ્રેશન નિષ્ણાતો વિદ્યાર્થીઓને દ્વિભાષી ઈમિગ્રેશન પર કેનેડાના વધતા ધ્યાનનો લાભ લેવા માટે ફ્રેન્ચ ભાષા શીખવાની સલાહ આપી રહ્યા છે.
ક્યૂબેકની સત્તાવાર ભાષા છે ફ્રેન્ચ
છેલ્લા કેટલાક વર્ષોથી, કેનેડા ફ્રેન્ચ બોલતા ઈમિગ્રન્ટ્સને સ્થાયી કરવા પર ધ્યાન કેન્દ્રિત કરી રહ્યું છે. ખાસ કરીને જેઓ ક્યૂબેક પ્રાંતની બહાર સ્થાયી થવા માંગે છે. ક્યૂબેકની સત્તાવાર ભાષા ફ્રેન્ચ છે. આનાથી વિદેશી વિદ્યાર્થીઓ માટે ફ્રેન્ચ શીખવું જરૂરી બન્યું છે.
આનાથી તમને વિદ્યાર્થી વિઝા મળવાની શક્યતાઓ તો વધે જ છે, પણ કાયમી રહેઠાણ મેળવવાનું પણ સરળ બને છે. ઈમિગ્રેશન સલાહકારોના મતે, કેનેડા ફ્રેન્ચ બોલનારાઓને સીધો પીઆર આપી રહ્યું છે. આ પહેલ 2028 સુધી ચાલુ રહેશે.
ભારતીયોને થશે નવા નિયમોની અસર?
કેનેડાએ ફેબ્રુઆરી 2025 થી તેના વિઝા નિયમોમાં મોટા ફેરફારો કર્યા છે, જે હજારો વિદ્યાર્થીઓ, કામદારો અને ઈમિગ્રન્ટ્સ, ખાસ કરીને ભારતીયોને અસર કરશે. નવા નિયમો કેનેડિયન સરહદ અધિકારીઓને વિદ્યાર્થીઓ, કામદારો અને અન્ય કામચલાઉ રહેવાસીઓના વિઝા દરજ્જામાં ફેરફાર કરવાની અમર્યાદિત સત્તાઓ આપે છે.
કેનેડાના નવા ઈમિગ્રેશન અને રેફ્યુજી પ્રોટેક્શન નિયમો હેઠળ, કેનેડિયન બોર્ડર અધિકારીઓ પાસે હવે વર્ક પરમિટ, વિદ્યાર્થી વિઝા અને કામચલાઉ નિવાસ વિઝા (TRV) નામંજૂર અથવા રદ્દ કરવાની સત્તા છે. આ અધિકારીઓ નક્કી કરી શકે છે કે કેનેડામાં તેમના અધિકૃત રોકાણની મુદત પૂરી થયા પછી કોઈ વ્યક્તિ દેશ છોડવા માટે તૈયાર છે કે નહીં.
કેનેડામાં અભ્યાસ કરતા ભારતીય વિદ્યાર્થીઓ
હાલમાં 4.27 લાખ ભારતીય વિદ્યાર્થીઓ કેનેડામાં અભ્યાસ કરી રહ્યા છે. આ સંખ્યા દર વર્ષે વધી રહી છે, જે કેનેડાને ભારતીય વિદ્યાર્થીઓ માટે ટોપનું શૈક્ષણિક સ્થળ બનાવે છે. ગયા વર્ષે 3.65 લાખ ભારતીયોને વિઝિટર વિઝા આપવામાં આવ્યા હતા, જે એ વાતનો પુરાવો છે કે ભારતીય નાગરિકો શિક્ષણ અને રોજગાર માટે કેનેડાને મુખ્ય પસંદગી માને છે.
Disclaimer: અહીં આપેલી તમામ માહિતી માત્ર જાણકારી માટે છે. સંદેશ ન્યૂઝ તેની પુષ્ટિ કરતું નથી.
