ભાવનગર એરપોર્ટના પરીસરમાં કાચબાની મિઝબાની માણતા ચાર શખ્સો ઝડપાયા
શ્રમિકોની ઓરડીમાંથી એક મૃત અને એક જીવતો કાચબો મળ્યો : પર્યાવરણ પ્રેમીઓમાં રોષ
અગ્ર ગુજરાત, ભાવનગર
ગુજરાતના ભાવનગરમાં વન્યજીવ સંરક્ષણ કાયદાના ભંગની એક ચોંકાવનારી ઘટના સામે આવી છે. ભાવનગર એરપોર્ટ પરિસરમાં વન વિભાગની ટીમે એક ગુપ્ત બાતમીના આધારે અચાનક દરોડા પાડ્યા હતા. આ દરોડા દરમિયાન એરપોર્ટ વિસ્તારમાં આવેલી શ્રમિકોની ઓરડીમાંથી 4 શખ્સો રંગેહાથ ઝડપાઈ ગયા હતા. આ શખ્સો કાયદાકીય રીતે અત્યંત સુરક્ષિત અને પ્રતિબંધિત એવા કાચબાની મિજબાની માણી રહ્યા હતા. વન વિભાગની આ ત્વરિત કાર્યવાહીથી સ્થાનિક સ્તરે વન્યજીવોની તસ્કરી અને શિકાર કરતા તત્વોમાં ભારે ફફડાટ વ્યાપી ગયો છે.
વન વિભાગના અધિકારીઓના જણાવ્યા અનુસાર, પકડાયેલા શખ્સોએ વન્યજીવ સંરક્ષણ અધિનિયમની કલમો હેઠળ આવતા શેડ્યુલ-1 ના પ્રતિબંધિત કાચબાને માર્યો હતો. આ કાચબો લુપ્ત થતી પ્રજાતિમાં આવતો હોવાથી તેનો શિકાર કરવો કે તેને નુકસાન પહોંચાડવું એ ગંભીર કાનૂની ગુનો બને છે. વન વિભાગની ટીમે જ્યારે ઘટનાસ્થળે તપાસ હાથ ધરી ત્યારે ઓરડીમાંથી એક મરેલો કાચબો અને તેની સાથે અન્ય 1 જીવતો કાચબો પણ મળી આવ્યો હતો. વન વિભાગે આ જીવતા કાચબાને તાત્કાલિક પોતાના કબજામાં લઈને તેને સુરક્ષિત સ્થાને મુક્ત કરવાની તજવીજ હાથ ધરી છે.
આ ગુનાની વૈજ્ઞાનિક તપાસ અને કોર્ટમાં મજબૂત પુરાવા રજૂ કરવા માટે વન વિભાગની ટીમે મરેલા કાચબાના અવશેષો અને સેમ્પલ મેળવ્યા છે. આ તમામ સેમ્પલને ફોરેન્સિક સાયન્સ લેબોરેટરી એટલે કે એફએસએલમાં પરીક્ષણ માટે મોકલી આપવામાં આવ્યા છે. પ્રાથમિક પૂછપરછમાં એવો ખુલાસો થયો છે કે ઝડપાયેલા ચારેય (4) શખ્સો પરપ્રાંતિય છે, જેઓ અહીં મજૂરી કામ અર્થે આવ્યા હતા. વન વિભાગે વન્યજીવ ધારાની કડક કલમો હેઠળ ગુનો નોંધીને આ ચારેય આરોપીઓની વિધિવત અટકાયત કરી લીધી છે અને કાયદેસરની કોર્ટ કાર્યવાહીની તૈયારીઓ શરૂ કરી છે.
આ ઘટના બાદ વન વિભાગની ટીમે તપાસનો ધમધમાટ તેજ કર્યો છે. વાઇલ્ડલાઇફ પ્રોટેક્શનને લઈને અત્યારે એ મુદ્દે ઉંડાણપૂર્વકની તપાસ શરૂ કરવામાં આવી છે કે આ શ્રમિકો શેડ્યુલ-1ના આ દુર્લભ કાચબા ક્યાંથી અને કોની પાસેથી લાવ્યા હતા. શું ભાવનગર અથવા તેની આસપાસ કોઈ વન્યજીવ શિકારની સક્રિય ગેંગ કામ કરી રહી છે કે કેમ, તે દિશામાં પણ પૂછપરછ લંબાવવામાં આવી છે. અધિકારીઓએ જણાવ્યું છે કે આ મામલે જે કોઈ પણ દોષિત હશે તેમની સામે આકરા પગલાં લેવાશે.
