વિંછીયામાં દારૂના કટીંગ સમયે પોલીસનો દરોડો, 1.09 કરોડનો મુદ્દામાલ ઝડપાયો
મોટા હડમતીયા ગામની સીમમાં બે ટ્રકમાંથી 28,932 બોટલ વિદેશી દારૂ મળી આવ્યો; મુખ્ય સૂત્રધાર ઉદય ખાચર સહિત ચાર શખ્સો ફરાર, પોલીસની શોધખોળ
અગ્ર ગુજરાત, રાજકોટ
દારૂબંધી ધરાવતા ગુજરાતમાં ગેરકાયદે દારૂના વેપાર સામે પોલીસે વધુ એક મોટી સફળતા મેળવી છે. રાજકોટ જિલ્લાના વિંછીયા તાલુકાના મોટા હડમતીયા ગામની સીમમાં વિદેશી દારૂના જથ્થાનું કટીંગ ચાલી રહ્યું હોવાની ચોક્કસ માહિતીના આધારે વિંછીયા પોલીસે ત્રાટકી કરોડો રૂપિયાના દારૂના જથ્થાનો પર્દાફાશ કર્યો હતો. દરોડા દરમિયાન આરોપીઓ પોલીસને જોઈને સ્થળ પરથી ફરાર થઈ ગયા હતા, પરંતુ પોલીસે બે ટ્રકમાં ભરેલો 28,932 બોટલનો વિદેશી દારૂ તેમજ વાહનો સહિત કુલ રૂ.1.09 કરોડથી વધુનો મુદ્દામાલ કબ્જે કરી કાયદેસરની કાર્યવાહી હાથ ધરી છે.
પોલીસ સૂત્રોના જણાવ્યા મુજબ, વિંછીયા પોલીસ મથકના પીઆઈ યુ.આર. ડામોરના માર્ગદર્શન હેઠળ પોલીસની ટીમ નિયમિત પેટ્રોલિંગમાં હતી. તે દરમિયાન આંબલી ચોકી ખાતે હાજર સ્ટાફને ચોક્કસ બાતમી મળી હતી કે મોટા હડમતીયા ગામની સીમમાં આવેલી માવજીભાઈ વાલાણીની વાડીની નજીક સરકારી ખરાબાની જમીનમાં મોટી માત્રામાં વિદેશી દારૂનો જથ્થો ઉતારી તેનું કટીંગ કરવામાં આવી રહ્યું છે. બાતમી વિશ્વસનીય જણાતાં પોલીસે તાત્કાલિક કાર્યવાહીનું આયોજન કર્યું હતું.
એએસઆઈ દિલીપભાઈ માલકીયા, હેડ કોન્સ્ટેબલ વિપુલભાઈ, મનોજભાઈ ડાભી, પ્રકાશભાઈ કુકડીયા સહિતનો પોલીસ સ્ટાફ સ્થળ પર પહોંચ્યો હતો. અચાનક પોલીસને જોઈને ત્યાં હાજર શખ્સોમાં દોડધામ મચી ગઈ હતી અને તમામ વ્યક્તિઓ અંધારાનો લાભ લઈને ભાગી છૂટવામાં સફળ રહ્યા હતા. જોકે પોલીસે સમગ્ર વિસ્તારને કોર્ડન કરી સ્થળ પર ઊભેલા બંને ટ્રકોની તપાસ હાથ ધરી હતી.
ટ્રકમાં રાખેલા કન્ટેનરો ખોલતાં અંદર વિવિધ બ્રાન્ડની વિદેશી દારૂની બોટલોનો વિશાળ જથ્થો મળી આવ્યો હતો. પોલીસે બંને ટ્રકોને વિંછીયા પોલીસ મથકે લઈ જઈ વિગતવાર ગણતરી કરતાં કુલ 28,932 બોટલ વિદેશી દારૂ મળી આવ્યો હતો. જપ્ત કરાયેલા દારૂની કિંમત અંદાજે રૂ.54.47 લાખ હોવાનું સામે આવ્યું છે. જ્યારે બંને ટ્રકો સહિતનો કુલ મુદ્દામાલ રૂ.1.09 કરોડ જેટલો હોવાનું પોલીસના પ્રાથમિક અંદાજમાં જાણવા મળ્યું છે. પ્રાથમિક તપાસમાં આ સમગ્ર દારૂના જથ્થા પાછળ મોટા હડમતીયા ગામના ઉદય ખાચરનું નામ સામે આવ્યું હોવાનું પોલીસ સૂત્રો જણાવે છે. પોલીસના જણાવ્યા મુજબ, ઉદય ખાચરે બે ટ્રક ભરી વિદેશી દારૂનો જથ્થો મંગાવી તેનું કટીંગ કરાવવાની વ્યવસ્થા ગોઠવી હતી. દરોડા પહેલાં જ દારૂને અન્ય સ્થળોએ પહોંચાડવાની તૈયારી ચાલી રહી હોવાનું પણ અનુમાન વ્યક્ત કરવામાં આવી રહ્યું છે.
આ કેસમાં મુખ્ય સૂત્રધાર ઉદય ખાચર સહિત કુલ ચાર શખ્સોને વોન્ટેડ જાહેર કરવામાં આવ્યા છે. પોલીસ દ્વારા તેમની ઓળખ, મોબાઇલ લોકેશન, વાહન વ્યવહાર તેમજ અન્ય ટેક્નિકલ માહિતીના આધારે શોધખોળ શરૂ કરવામાં આવી છે. સાથે જ દારૂનો જથ્થો ક્યાંથી લાવવામાં આવ્યો હતો, તેનો મૂળ સપ્લાયર કોણ છે અને આ સમગ્ર નેટવર્કમાં અન્ય કેટલા લોકો સંડોવાયેલા છે તે દિશામાં પણ તપાસ આગળ ધપાવવામાં આવી રહી છે. પોલીસ અધિકારીઓના જણાવ્યા મુજબ, આટલી મોટી માત્રામાં મળેલો દારૂ માત્ર સ્થાનિક વેચાણ માટે નહીં પરંતુ આસપાસના વિસ્તારોમાં સપ્લાય કરવા માટે લાવવામાં આવ્યો હોવાની પણ શક્યતા છે. તેથી સમગ્ર રેકેટની કડીઓ જોડવા માટે વિવિધ જિલ્લાની પોલીસ સાથે પણ માહિતીની આપ-લે કરવામાં આવી રહી છે.
વિંછીયા પોલીસની આ કાર્યવાહીથી ગેરકાયદે દારૂના વેપારમાં સંકળાયેલા તત્વોમાં ફફડાટ ફેલાયો છે. આગામી દિવસોમાં ફરાર આરોપીઓની ધરપકડ સાથે દારૂના આ મોટા રેકેટ અંગે વધુ મહત્વની વિગતો બહાર આવે તેવી શક્યતા વ્યક્ત કરવામાં આવી રહી છે. પોલીસે લોકોને પણ ગેરકાયદે દારૂના સંગ્રહ કે હેરફેર અંગે કોઈ માહિતી હોય તો તાત્કાલિક પોલીસને જાણ કરવા અપીલ કરી છે.
