CNC મશીનના બહાને 67.26 લાખની ઠગાઈ કરનાર શખ્સને EOW ની ટીમે ઝડપી લીધો
સાવરીયા કોર્પોરેશનના નામે વેપારીને ફસાવ્યા હતા : બે સાગરીત હજુ ફરાર
અગ્ર ગુજરાત, રાજકોટ
રાજકોટ શહેરમાં CNC મશીન ખરીદવાની આડમાં વેપારી સાથે ₹67.26 લાખની છેતરપીંડી કરનાર આરોપી રાહુલ લક્ષ્મણ સાગઠિયા પોલીસના જાળમાં ફસાયો છે. આર્થિક ગુના નિવારણ શાખા (EOW)ની ટીમે ટેકનિકલ માહિતી અને હ્યુમન સોર્સિસના આધારે મુખ્ય સૂત્રધારને ઝડપી કાર્યવાહી કરી છે, જ્યારે આ મામલામાં સંડોવાયેલા અન્ય બે શખ્સો હજી પોલીસ પકડથી દૂર છે.
મળતી માહિતી મુજબ, રાજકોટના એક વેપારીએ પોતાના સોના-ચાંદીના વ્યવસાય માટે CNC મશીન ખરીદવાનું નક્કી કર્યું હતું. આ દરમિયાન આરોપી રાહુલ સાગઠિયા, જે ‘સાવરીયા કોર્પોરેશન’ નામની પેઢીનો પ્રોપ્રાયટર હોવાનું જણાવી રહ્યો હતો, તેણે મશીન પૂરું પાડવાની ખાતરી આપી વેપારીનો વિશ્વાસ જીત્યો હતો.
ફરિયાદ મુજબ, આરોપીના કહેવા મુજબ પ્રથમ તબક્કે વેપારીએ ₹17.36 લાખ RTGS દ્વારા ટ્રાન્સફર કર્યા હતા. ત્યારબાદ લોન લઈને વધુ ₹49.90 લાખ ટ્રાન્સફર કરતાં કુલ ₹67.26 લાખની રકમ આરોપીના ખાતામાં જમા થઈ હતી. જોકે, આટલી મોટી રકમ ચૂકવ્યા છતાં વેપારીને CNC મશીન મળ્યું નહોતું અને આરોપીઓએ પૈસા પણ પરત આપ્યા નહોતા, જેના કારણે છેતરપીંડીનો ભોગ બન્યાનો ખુલાસો થયો હતો.
આ મામલે રાજકોટ DCB પોલીસ મથકમાં ફરિયાદ નોંધાયા બાદ શહેર પોલીસ કમિશ્નર બ્રજેશકુમાર ઝા, એડિશનલ સીપી ચૈતન્ય માંડલિક, ડીસીપી ક્રાઈમ જગદીશ બાંગરવા અને એસીપી ક્રાઈમ ભરત બસીયાના માર્ગદર્શન હેઠળ EOW ટીમ સક્રિય બની હતી. પીઆઈ એ.એચ. ચાવડા અને આર.જી. પઢીયારની આગેવાનીમાં ટીમે આરોપીની શોધખોળ હાથ ધરી હતી.
ટેકનિકલ એનાલિસિસ અને ગુપ્ત સૂત્રોની મદદથી પોલીસે મુખ્ય આરોપી રાહુલ સાગઠિયાને રાજકોટના બાલાજી હોલ નજીકથી ઝડપી પાડ્યો હતો. તપાસ દરમિયાન આરોપીએ કબૂલાત આપી હતી કે, તે પોતે જ ફ્રોડ પેઢી ચલાવતો હતો અને વેપારીને ફસાવી રૂપિયા પડાવ્યા હતા. આરોપીએ વધુમાં જણાવ્યું કે, આ પૈસામાંથી મોટો હિસ્સો જયદીપ ગીરીશ નનેરા અને જયદીપ પટેલ નામના તેના સાગરીતો લઈ ફરાર થઈ ગયા છે. હાલ પોલીસે બંને ફરાર આરોપીઓની શોધખોળ શરૂ કરી છે. ઉલ્લેખનીય છે કે, આરોપી રાહુલ સાગઠિયા વિરુદ્ધ અગાઉ પણ તાલુકા પોલીસ મથકમાં મારામારીનો ગુનો નોંધાયેલ છે. આ કેસમાં વધુ તપાસ ચાલુ છે અને અન્ય સંડોવાયેલા શખ્સોને ઝડપી પાડવા માટે પોલીસે કાર્યવાહી તેજ કરી છે.
