જેતલસર પોસ્ટ ઓફિસના પાર્સલમાંથી રૂ.2.65 લાખનો ગાંજો મળી આવ્યો
ઓરિસ્સાથી મોકલાયેલા પાર્સલમાંથી સવા પાંચ કિલો ગાંજો જપ્ત કરતું એસઓજીનો ; જૂનાગઢમાં ઝડપાયેલા આરોપીની પૂછપરછથી ભેદ ખુલ્યો, સપ્લાયર-રિસીવર સહિત ત્રણ સામે એનડીપીએસ હેઠળ ગુનો
અગ્ર ગુજરાત, રાજકોટ
પોસ્ટ વિભાગનો ઉપયોગ કરી માદક પદાર્થોની હેરાફેરી કરવાનો વધુ એક ચોંકાવનારો કિસ્સો સામે આવ્યો છે. રાજકોટ જિલ્લાના જેતપુર તાલુકાના જેતલસર પોસ્ટ ઓફિસમાં ઓરિસ્સાથી આવેલા એક પાર્સલમાંથી રૂ.2.65 લાખથી વધુ કિંમતનો 5.316 કિલોગ્રામ ગાંજો રાજકોટ રૂરલ એસઓજીએ કબજે કર્યો છે. આ સમગ્ર ભેદ જૂનાગઢ એસઓજી દ્વારા અગાઉ ઝડપાયેલા એક આરોપીની પૂછપરછ દરમિયાન ખુલ્યો હતો. પોલીસે ગાંજો મંગાવનાર, સપ્લાયર અને રિસીવર એમ ત્રણ શખ્સો સામે એનડીપીએસ એક્ટ હેઠળ ગુનો નોંધી વધુ તપાસ હાથ ધરી છે.
રાજકોટ જિલ્લા પોલીસ વડા વિજયસિંહ ગુર્જરના માર્ગદર્શન હેઠળ ચાલી રહેલા ‘સે નો ટુ ડ્રગ્સ’ અભિયાન અંતર્ગત રૂરલ એસઓજી માદક પદાર્થોના નેટવર્ક પર સતત નજર રાખી રહી હતી. દરમિયાન જૂનાગઢ એસઓજી તરફથી માહિતી મળી હતી કે ઓરિસ્સાથી જેતલસર પોસ્ટ ઓફિસમાં શંકાસ્પદ પાર્સલ પહોંચવાનું છે. માહિતી મળતા જ પીઆઈ એફ.એ. પારગીના માર્ગદર્શન હેઠળ એસઓજીની ટીમ પોસ્ટ ઓફિસ પહોંચી હતી.
તપાસ દરમિયાન પાર્સલ ખોલવામાં આવતા અંદરથી 5.316 કિલોગ્રામ વનસ્પતિજન્ય ગાંજો મળી આવ્યો હતો. અંદાજે રૂ.2.65 લાખથી વધુ કિંમતનો આ જથ્થો પોલીસે કબજે કરી કાયદેસરની કાર્યવાહી હાથ ધરી હતી.
પોલીસ તપાસમાં જાણવા મળ્યું છે કે થોડા દિવસો અગાઉ જૂનાગઢ એસઓજીએ વડલી ચોક વિસ્તારમાંથી અમિત ઉર્ફે ચેમ્પિયન ધીરુ રાઠોડને ગાંજા સાથે ઝડપી પાડ્યો હતો. તેની પૂછપરછ દરમિયાન મોબાઇલમાંથી પાર્સલનો ફોટો અને ટ્રેકિંગ નંબર મળી આવતા ઓરિસ્સાથી ગાંજાનું પાર્સલ મંગાવ્યાનો ભેદ ખુલ્યો હતો. ત્યારબાદ આ માહિતી રાજકોટ રૂરલ એસઓજીને આપવામાં આવતા સમયસર કાર્યવાહી કરીને પાર્સલ કબ્જે લેવામાં સફળતા મળી હતી.
આ કેસમાં પોલીસે અમિત ઉર્ફે ચેમ્પિયન ધીરુ રાઠોડ (રહે. ગણેશનગર, વડલી ચોક, જૂનાગઢ), ઓરિસ્સાના રૂપારા રોડ વિસ્તારમાં રહેતા ગોપી દાદા અને સંજય પરાર સામે એનડીપીએસ એક્ટ હેઠળ ગુનો નોંધ્યો છે. હાલ અમિત જૂનાગઢ પોલીસની કસ્ટડીમાં હોવાથી રાજકોટ રૂરલ એસઓજી તેને ટ્રાન્સફર વોરંટથી કબજે લેવા તજવીજ કરી રહી છે, જ્યારે ફરાર સપ્લાયર અને રિસીવર સુધી પહોંચવા તપાસનો દોર તેજ કરવામાં આવ્યો છે.
જૂનાગઢમાં માત્ર પાંચ દિવસના ગાળામાં પોસ્ટ વિભાગ મારફતે ગાંજાની હેરાફેરીનો બીજો બનાવ સામે આવતા તપાસ એજન્સીઓ પણ સતર્ક બની છે. દોલતપરા પોસ્ટ ઓફિસમાં ઓરિસ્સાથી આવેલા અન્ય એક પાર્સલમાંથી પાંચ કિલોથી વધુ ગાંજો ઝડપાયો હોવાનું સામે આવ્યું છે. અગાઉ ભવનાથ પોસ્ટ ઓફિસમાંથી પણ ગાંજાનું પાર્સલ ઝડપાયું હતું. સતત સામે આવી રહેલા આવા બનાવોને પગલે પોસ્ટ સેવાઓનો દુરુપયોગ કરી નશીલા પદાર્થોનું નેટવર્ક કેટલા સમયથી સક્રિય છે અને તેની પાછળ કોણ-કોણ સંકળાયેલા છે તે દિશામાં એસઓજી અને સ્થાનિક પોલીસ દ્વારા ઊંડાણપૂર્વક તપાસ શરૂ કરવામાં આવી છે.
