રાજયમાં શાંતિપૂર્ણ માહોલ જાળવી રાખવા પોલીસ વિભાગનો પ્લાન
ચૂંટણીમાં કાયદો અને વ્યવસ્થા જાળવવા રાજયમાં ૪૧,3૮3 વધારાના જવાનની ફોર્સ તૈનાત રહેશે
ગેરકાયદે પ્રવૃત્તિઓ રોકવા માટે આંતર-જિલ્લા અને રાજયની સરહદો પર સઘન ચેકીંગના આદેશ કરતા DGP
વિસ્તારોમાં સુરક્ષા સંભાળવા હોમગાર્ડ અને GRD જવાનોને ફરજમાં મૂકવા પોલીસવડાનો આદેશ
અગ્ર ગુજરાત, રાજકોટ
ગુજરાતમાં આવનારી સ્થાનિક સ્વરાજ્યની ચૂંટણીને ધ્યાનમાં રાખીને રાજ્ય પોલીસ તંત્ર સંપૂર્ણ સતર્ક બની ગયું છે. ગાંધીનગર ખાતે રાજ્યના DGPની અધ્યક્ષતામાં યોજાયેલી હાઈલેવલ બેઠકમાં સુરક્ષા વ્યવસ્થાને લઈને વિશાળ માસ્ટર પ્લાન તૈયાર કરવામાં આવ્યો છે. બેઠકમાં તમામ ઉચ્ચ અધિકારીઓને ચૂંટણી દરમિયાન કાયદો અને વ્યવ?સ્થા જળવાઈ રહે તે માટે કડક સૂચનાઓ આપવામાં આવી છે.
ચૂંટણી દરમિયાન કોઈ અનિચ્છનીય ઘટના ન બને તે માટે રાજ્યભરમાં જંગી પોલીસ કાફલો તૈનાત કરવામાં આવશે. આયોજન મુજબ 59,525 હોમગાર્ડ અને GRD જવાનોને ફરજ પર મુકવામાં આવશે, જે વિવિધ વિસ્તારોમાં સુરક્ષા સંભાળશે.
પોલીસ વિભાગે વધુ મજબૂતી માટે 41,383 વધારાના જવાનોની ફોર્સ પણ તૈનાત કરવાનો નિર્ણય લીધો છે. ખાસ કરીને સંવેદનશીલ વિસ્તારોમાં ચુસ્ત પેટ્રોલિંગ, CCTV મોનિટરિંગ અને આધુનિક ટેકનિકલ સાધનોનો ઉપયોગ કરવામાં આવશે.
ચૂંટણી દરમિયાન ગેરકાયદેસર પ્રવૃત્તિઓ અને અસામાજિક તત્વોને રોકવા માટે આંતર-જિલ્લા તેમજ આંતર-રાજ્ય સરહદો પર સઘન ચેકિંગના આદેશ આપવામાં આવ્યા છે.
DGPએ સ્પષ્ટ કર્યું છે કે શાંતિપૂર્ણ અને નિર્ભય મતદાન પોલીસની પ્રથમ પ્રાથમિકતા છે. દરેક બૂથ પર પૂરતો બંદોબસ્ત રાખવામાં આવશે જેથી મતદારો ભયમુક્ત વાતાવરણમાં પોતાનો મત આપી શકે.
રાજકોટમાં ૨૫૦૦થી વધુ પોલીસનો બંદોબસ્ત
રાજકોટમાં આગામી સ્થાનિક સ્વરાજ્યની ચૂંટણીના પર્વને નિર્ભય અને શાંતિપૂર્ણ વાતાવરણમાં સંપન્ન કરવા માટે શહેર પોલીસ તંત્ર દ્વારા અભેદ્ય સુરક્ષા કવચ તૈયાર કરવામાં આવ્યું છે. ચૂંટણી દરમિયાન કાયદો અને વ્યવસ્થા જાળવી રાખવા માટે 2500 થી વધુ પોલીસ કર્મીઓને તૈનાત કરવામાં આવ્યા છે. પોલીસ કમિશનર બ્રજેશકુમાર ઝા ના સીધા સુપરવિઝન હેઠળ સતત બેઠકોનો ધમધમાટ આદરી આખું સુરક્ષા માળખું ગોઠવવામાં આવ્યું છે.
જે સુરક્ષા વ્યવસ્થામાં 4 ડીસીપી, 8 એસીપી, 12 પીઆઈ, 54 પીએસઆઇ, 1120 પોલીસ, 1379 હોમગાર્ડ સહીત કુલ 2500 થી વધું પોલીસ જવાનો આગામી તા.24 થી જ ટીમો ગ્રાઉન્ડ પર કાર્યરત થઈ જશે.
શહેરમાં શાંતિપૂર્ણ અને સુરક્ષિત મતદાન પૂર્ણ થાય તે માટે પોલીસે તમામ સંવેદનશીલ વિસ્તારોની ઓળખ કરી આ વિસ્તારોમાં પોલીસ દ્વારા સતત ગ્રૂપ પેટ્રોલીંગ અને “કોમ્બિંગ હાથ ધરવામાં આવશે. તેમજ મતદાન મથકોની આસપાસ બિનજરૂરી ટોળા એકઠા થવા દેવામાં આવશે નહીં.
જો કોઈ સ્થળે માથાકૂટ કે ઘર્ષણની સ્થિતિ સર્જાશે, તો ક્વિક રિસ્પોન્સ ટીમ ગણતરીની મિનિટોમાં સ્થળ પર પહોંચી જશે. ઉલ્લેખનીય છે કે, ચૂંટણી પૂર્વે જ શહેરના લિસ્ટેડ બુટલેગરો અને હિસ્ટ્રીશીટરો વિરુદ્ધ પાસા જેવી કડક કાયદાકીય કાર્યવાહી શરૂ કરી દેવામાં આવી છે. તેમજ શહેરના એન્ટ્રી અને એક્ઝિટ પોઈન્ટ્સ પર વાહન ચેકિંગની પ્રક્રિયા કરવામાં આવી રહી છે જેથી કોઈ નશીલા પદાર્થો કે રોકડની હેરફેર ન થઈ શકે.
સંવેદનશીલ વિસ્તારમાં ડ્રોનથી ચેકીંગ
શહેરમાં આગામી સમયમાં યોજાનાર ચૂંટણી અનુલક્ષી પોલીસે તૈયારીઓ આરંભી દિધી છે. જેમાં લોકશાહીના પર્વમાં કોઈ માથાકૂટ કે ગુનાહિત પ્રવૃત્તિ ન થાય તે માટે એસઓજીની ડ્રોન ટીમ દ્વારા પણ ખાસ સુરક્ષા સાંભળવામાં આવશે. ઉપરાંત સંવેદનશીલ મતદાન મથકો અને મુખ્ય ચોક પર સીસીટીવી કેમેરા દ્વારા કમાન્ડ એન્ડ કંટ્રોલ સેન્ટરથી સતત નજર રાખવામાં આવશે.
