મોરબી-બોટાદના મત્સ્યઉદ્યોગ અધિકારી રાજકોટમાં 50 હજારની લાંચ લેતા ઝડપાયા
ટેન્ડરના વર્ક ઓર્ડર આપવા તથા રિજેક્ટ થયેલ ટેન્ડરના ડિમાન્ડ ડ્રાફ્ટ પરત આપવા માટે પૈસા માગતા ACBના છટકામાં ઝડપાયા
અગ્ર ગુજરાત, રાજકોટ
રાજકોટના સિવિલ હોસ્પિટલ ચોક નજીક ભાવનગર એન્ટી કરપ્શન બ્યુરો (ACB) એ એક મોટી સફળ ટ્રેપ ગોઠવીને બોટાદ મત્સ્ય ઉદ્યોગના ઇન્ચાર્જ અધિક્ષકને રૂ. ૫૦,૦૦૦ની લાંચ લેતા રંગે હાથ ઝડપી પાડ્યા છે. સરકારી કામકાજ માટે ટેન્ડરના વર્ક ઓર્ડર આપવા અને રિજેક્ટ થયેલા ટેન્ડરના ડિમાન્ડ ડ્રાફ્ટ (DD) પરત કરવાના બહાને ક્લાસ-૨ અધિકારી દ્વારા આ રકમની માંગણી કરવામાં આવી હતી.
પ્રાપ્ત માહિતી અનુસાર, ફરિયાદીએ ચાલુ વર્ષ દરમિયાન મત્સ્યઉદ્યોગ ખાતામાં કુલ ૭ ટેન્ડર ભર્યા હતા. જેમાંથી 3 ટેન્ડર મંજૂર (પાસ) થયા હતા અને 4 ટેન્ડર રિજેક્ટ થયા હતા. મંજૂર થયેલા ટેન્ડરના વર્ક ઓર્ડર આપવા તેમજ રિજેક્ટ થયેલા ટેન્ડરના ડિમાન્ડ ડ્રાફ્ટ પરત આપવાની અવેજીમાં મત્સ્યઉદ્યોગ વિભાગના અધિક્ષક ખોડાભાઈ વલ્લભભાઈ રામાણી દ્વારા શરૂઆતમાં 1 લાખની લાંચની માંગણી કરવામાં આવી હતી. જોકે, ફરિયાદી સાથે રકઝકના અંતે 50,000 આપવાનું નક્કી થયું હતું. ફરિયાદી આ લાંચની રકમ આપવા માંગતા ન હોવાથી તેમણે તુરંત ભાવનગર એસીબીનો સંપર્ક કરીને સમગ્ર મામલે લેખિત ફરિયાદ નોંધાવી હતી.
ફરિયાદીની કાયદેસરની ફરિયાદના આધારે એસીબીની ટીમે બુધવારે સાંજે રાજકોટ શહેરના સિવિલ હોસ્પિટલ ચોક નજીક આવેલી એસબીઆઈ (SBI) બેંક પાસે લાંચનું છટકું ગોઠવ્યું હતું. આરોપી ખોડા રામાણી ત્યાં આવી પહોંચ્યા હતા અને ફરિયાદી સાથે હેતુલક્ષી વાતચીત કરી 50,000ની લાંચની રકમ સ્વીકારી હતી. તેમણે પૈસા હાથમાં લીધા કે તરત જ પૂર્વ આયોજિત ગોઠવણ મુજબ એસીબીની ટીમે તેમને રંગે હાથ ઝડપી લીધા હતા. એસીબીએ લાંચની રકમ કબ્જે કરી આરોપી સામે ગુનો નોંધી આગળની કાયદેસરની કાર્યવાહી હાથ ધરી છે.
અત્રે ઉલ્લેખનીય છે કે, આરોપી ખોડાભાઇ વલ્લભભાઇ રામાણી મૂળ મોરબી ખાતે મત્સ્યઉદ્યોગના અધિક્ષક (ક્લાસ-2) તરીકે ફરજ બજાવે છે. પરંતુ, તેમની પાસે બોટાદ કચેરીનો પણ વધારાનો (ઇન્ચાર્જ) હવાલો હતો. બોટાદ વિભાગનો ચાર્જ હોવાનો ગેરફાયદો ઉઠાવીને તેમણે કોન્ટ્રાક્ટર પાસે વર્ક ઓર્ડર અને ડિમાન્ડ ડ્રાફ્ટ પરત મેળવવા માટે લાંચની માંગણી કરી હતી, જે અંતે તેમને જેલના સળિયા પાછળ ધકેલી ગઈ છે.
